នៅព្រឹកថ្ងៃទី១០ ខែកុម្ភៈ ឆ្នាំ២០២០ សិក្ខាកាម២០រូប មកពីអង្គភាពពាក់ព័ន្ធស្តង់ដារអន្តរជាតិ ៣ប្រទេស រួមមាន កម្ពុជា មីយ៉ាន់ម៉ា និង ឡាវ បានចួលរួមវគ្គបណ្តុះបណ្តាល សវនករផ្នែកប្រព័ន្ធគ្រប់គ្រងគុណភាព ISO 9001 : 2015 វគ្គបណ្តុះបណ្តាលនេះដែរ នឹងជួយដល់កម្ពុជា វាយតម្លៃលើប្រព័ន្ធគ្រប់គ្រងរបស់វិស័យឯកជន ដែលទទួលស្គាល់ដោយអន្តរជាតិ។
មានប្រសាសន៍ ក្នុងឱកាសនោះ ក្នុងក្រុងសៀមរាប ឯកឧត្តម ចាន់ សូផា អគ្គនាយកវិទ្យាស្ថានស្តង់ដារកម្ពុជា នៃក្រសួងឧស្សាហកម្ម និងសិប្បកម្ម លើកឡើងថា បច្ចុប្បន្ននេះការធ្វើពាណិជ្ជកម្មមានលក្ខណៈប្រកួតប្រជែងខ្ពស់នៅលើទីផ្សារ ទាំងនៅក្នុងប្រទេស និងការនាំចេញទៅក្រៅប្រទេស ។ ជាមួយនោះ ប្រទេសជាសមាជិក នៃអង្គការពាណិជ្ជកម្មពិភពលោក នៅពេលចាប់ផ្តើមធ្វើចរាចរណ៍ទំនិញនាំចេញ-នាំចូល គឺត្រូវអនុវត្តតាមប្រព័ន្ធគ្រប់គ្រងគុណភាព ISO នេះ។ ដោយឡែក នៅកម្ពុជា ក្រុមហ៊ុនមួយចំនួនធំ ពុំទាន់មានប្រព័ន្ធគ្រប់គ្រងគុណភាពស្ដង់ដាអន្តរជាតិនេះនៅឡើយទេ។
ឯកឧត្តម ក៏បានបង្ហាញផងដែរថា នាពេលកន្លងមក នៅកម្ពុជា ប្រព័ន្ធគ្រប់គ្រងគុណភាពនេះ ពុំទាន់បានដំណើរការល្អនៅឡើយទេ។ ឆ្លងកាត់នូវវគ្គបណ្តុះបណ្តាលនេះ សិក្ខាកាមទាំង២០រូប នឹងក្លាយជាសវនករមានសមត្ថភាព ក្នុងការ វាយតម្លៃលើប្រព័ន្ធគ្រប់គ្រងគុណភាព របស់វិស័យឯកជន ឬក្រុមហ៊ុននានា ក្នុងការនាំចេញផលិតផល ឬទំនិញរបស់ខ្លួន ទៅក្រៅប្រទេស ដែលទទួលស្គាល់ដោយស្តង់ដារអន្តរជាតិ ។
ឯកឧត្តម បញ្ជាក់បន្ថែមថា ក្នុងវគ្គបណ្ដុះបណ្ដាលនេះ សិក្ខាកាម នឹងត្រូវឆ្លងកាត់ការប្រឡងយកពិន្ទុ និងធ្វើកំណែចម្លើយវិញ្ញាសាររបស់សិក្ខាកាម នៅប្រទេសអង់គ្លេស ដោយអង្គភាព RCA ដែលជាអង្គការអន្តរជាតិទទួលស្គាល់លើសមត្ថភាពសវនករ ៕
អត្ថបទ និង រូបភាព៖ លោក យូ វង្ស និង លោក ងិន គឹមឡេង
កែសម្រួល៖ លោក សេង ផល្លី
