នៅព្រឹកថ្ងៃទី១៤ ខែកុមុ្ភៈ ឆ្នាំ២០២០នេះ លោកជំទាវ សុខ ណារ៉ូ អនុប្រធានគណៈកម្មាធិការ សាខាកាកបាទក្រហមកម្ពុជា ខេត្តសៀមរាប អញ្ជើញជាអធិបតីក្នុងពិធី បំពាក់កន្សែងយុវជនកាកបាទក្រហមកម្ពុជា ជូនដល់សិស្សានុសិស្ស វិទ្យាល័យ ចំណេះទូទៅ និងបច្ចេកទេសពួក ចំនួន៦៥នាក់ ស្ថិតនៅក្នុងឃុំពួក ស្រុកពួក ខេត្តសៀមរាប ។
មានប្រសាសន៍នាឱកាសនោះ លោកជំទាវអនុប្រធាន បានសំណេះសំណាល និងនាំយកការសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ទៀ សីហា ប្រធានគណៈកម្មាធិការសាខាខេត្ត ព្រមទាំង បានលើកឡើងថា៖ ដើម្បីអបអរសាទរខួបលើក៦៥ឆ្នាំ ថ្ងៃកំណើតកាកបាទក្រហមកម្ពុជា ១៨ កុម្ភៈ ១៩៥៥ – ១៨ កុម្ភៈ ២០១៨ សាខាបានរៀបចំពិធីនេះឡើង ហើយកម្ពុជាបានចាត់ទុកយុវជនជាធនធានគន្លឹះ និងមានតម្លៃបំផុតសម្រាប់ការអភិវឌ្ឍសេដ្ឋកិច្ច សង្គមកិច្ច វប្បធម៌ បរិស្ថាន និងការរក្សាសន្តិភាព។
លោកជំទាវ លើកឡើងថា នៅគ្រប់សម័យកាល គ្រប់សង្គម យុវជនជាកម្លាំងស្រួច ដែលមានកម្លាំងកាយ-កម្លាំងចិត្ត និងស្មារតីភ្លឺស្វាង មានទឹកចិត្តក្លាហាន ពុះពារមិនរារែកគ្រប់ឧបសគ្គ ការលំបាកនានា ពិសេសយុវជនគឺជាសសរទ្រូងរបស់ប្រទេសជាតិទាំងនៅពេលបច្ចុប្បន្ន និងទៅអនាគត។ ជាមួយគ្នានេះដែរ កាកបាទក្រហមកម្ពុជា បានទទួលស្គាល់ថា យុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេង ជាកម្លាំងស្នូលមួយដ៏មានសារៈសំខាន់ និងសកម្មបំផុត ក្នុងការផ្ដល់នូវសេវាកម្មមនុស្សធម៌ ប្រកបដោយការប្ដេជ្ញាចិត្តខ្ពស់ និងការលះបង់ឥតងាករេ ស្របតាមប្រធានបទ “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា” និង “យុវជនជាភ្នាក់ងារនៃការផ្លាស់ប្តូរឥរិយាបថក្នុងសង្គម” ។
ព័ត៌មានជាតិ ថ្មីៗ
គួរជម្រាបថា យុវជនកាកបាទក្រហមកម្ពុជាទាំង៦៥នាក់នេះ ត្រូវបានបណ្ដុះបណ្ដាល អំពីការយល់ដឹងជាមូលដ្ឋានពីចលនាអន្តរជាតិកាកបាទក្រហម អឌ្ឍចន្ទក្រហម និងវិជ្ជាសង្គ្រោះបឋម ដោយផ្ដោតលើប្រធានបទដូចជា៖
– ប្រវត្តិចលនាអន្តរជាតិ កាកបាទក្រហម អឌ្ឍចន្ទក្រហម
– សមាសភាគ និងបដិរូបកាកបាទក្រហម អឌ្ឍចន្ទក្រហម
– គោលការណ៍គ្រឹះរបស់ចលនាកាកបាទក្រហម អឌ្ឍចន្ទក្រហម
– ប្រវត្តិ សកម្មភាព កាកបាទក្រហមកម្ពុជា
– គោលនយោបាយ តួនាទី ភារកិច្ចក្លឹប និងសមាជិកយុវជនកាកបាទក្រហមកម្ពុជា និងបញ្ជ្រាបការងារគ្រោះថ្នាក់ចរាចរណ៍
– ចំណេះដឹងសង្ខេប ប្រធានបទមួយចំនួន នៃវិជ្ជាសង្គ្រោះបឋម៖ – គោលការណ៍គ្រឹះនៃការសង្គ្រោះ -ការដាក់ស្ថានភាពដំណេក -សន្លប់ ស្លាក់-របួស ហូរឈាម និងបាក់ឆ្អឹង។
អត្ថបទ និង រូបភាព៖ យូ វង្ស និង គឿន វេត
កែសម្រួល៖ សេង ផល្លី
