កាលពីថ្ងៃទី១៧ ខែកុម្ភៈឆ្នាំ២០២០ លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ប្រកាសជាផ្លូវការថា នឹងផ្ដល់ប្រាក់លើកទឹកចិត្ត ចំនួន១លានរៀល ដល់ជនណា ដែលបានផ្ដល់ព័ត៌មានពីការលួចដុតព្រៃក្នុងខេត្តសៀមរាបមកកាន់រូបលោកផ្ទាល់ ក្នុងឱកាសដែលលោក ធ្វើការចុះផ្សព្វផ្សាយសេចក្តីណែនាំស្តីពីវីធានការការពារ និងទប់ស្កាត់ភ្លើងឆេះព្រៃ ស្ថិតក្នុងឃុំកំពង់ឃ្លាំង ស្រុកសូទ្រនិគម ខេត្តសៀមរាប។
លោកប្រធានមន្ទីរបានបញ្ជាក់ថា ចំពោះអត្តសញ្ញាណ របស់អ្នកដែលបានការផ្ដល់ព័ត៌មានបទល្មើសនេះ លោកនឹងលាក់ជាការសម្ងាត់។
ជាមួយនោះដែរ វេទិកាផ្សព្វផ្សាយសេចក្តីណែនាំស្តីពីវីធានការការពារ និងទប់ស្កាត់ភ្លើងឆេះព្រៃនេះ មានគោលបំណងបញ្ជ្រាបការយល់ដឹង ដល់ប្រជាសហគមន៍ អាជ្ញាធរដែនដី និងអ្នកពាក់ព័ន្ឋទាំងអស់ យល់ដឹងបន្ថែមទៀត អំពីសេចក្តីជូនដំណឹង របស់ក្រសួងកសិកម្ម រុក្ខាប្រមាញ់ និងនេសាទ និងចៀសវាងប្រព្រឹត្តបទល្មើស ដែលឈានទៅដល់ការចាប់ខ្លួន និងបញ្ជូនទៅកាន់តុលាការ
ព័ត៌មានជាតិ ថ្មីៗ
តាមរយៈសេចក្តីណែនាំលេខ០១៦ស.ណ.ន.កសក ស្តីពីវីធានការការពារ និងទប់ស្កាត់ភ្លើងឆេះព្រៃ បញ្ជាក់ថា៖អនុលោមតាមច្បាប់ស្តីពីព្រៃឈើ និងច្បាប់ស្តីពីជលផល ប្រជាពលរដ្ឋ កងកម្លាំងប្រដាប់អាវុធ និងអាជ្ញាធរដែនដីគ្រប់ថ្នាក់ត្រូវមានករណីកិច្ចទទួលខុសត្រូវ ថែរក្សា ការពារព្រៃឈើ បង្ការនិងប្រយុទ្ឋនឹងភ្លើងឆេះព្រៃ ចូលរួមថែរក្សាជម្រកមច្ឆជាតិ ការពារ បង្ការ និងប្រយុទ្ឋនឹងភ្លើងឆេះព្រៃលិចទឹកនៅតាមមូលដ្ឋានរៀងៗខ្លួន។ ជនណាដែលបានប្រព្រឹត្តិ ឬបង្កឱ្យមានភ្លើងឆេះព្រៃ ឬភ្លើងឆេះព្រៃលិចទឹកដោយចេតនា ត្រូវផ្តន្ទាទោសក្រោមបទល្មើសព្រៃឈើថ្នាក់ទី១ ឬបទល្មើសជលផលថ្នាក់ទី១ ដែលត្រូវជាប់ពន្ឋនាគារពី០៣ ទៅ០៥ឆ្នាំឬពី០៥ទៅ១០ឆ្នាំ។
គួរជម្រាបថា តាមរបាយការណ៍ផ្ដល់ដោយមន្ត្រីមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នៅឆ្នាំ២០១៩ មានបទល្មើសលួចកាប់ និងដុតព្រៃទន្ទ្រានយកដីព្រៃសាធារណសរុប៣៦ករណី សរុប ១៥០ហិចតា ចាប់ជនល្មើស និងបញ្ជូនទៅតុលាការចំនួន ១៣នាក់ និងកំពុងបន្តស្រាវជ្រាវរកជនសង្ស័យសរុប ៣១នាក់។
អត្ថបទ និង រូបភាព៖ យូ វង្ស
កែសម្រួល៖ សេង ផល្លី
