ថ្ងៃទី១៧ ខែកុម្ភៈ ឆ្នាំ២០២០ មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានសហការជាមួយអាជ្ញាធរស្រុកសូទ្រនិគម ចុះផ្សព្វផ្សាយសេចក្តីជូនដំណឹងស្តីពី ការទប់ស្កាត់ ការធ្វើនេសាទឈ្នាងអូសលៀស ឬខ្ចៅរួមផ្សំដោយកម្លាំងម៉ាស៊ីន ស្ថិតនៅវត្តកំពង់ឃ្លាំង ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
តាមរយៈរបាយការណ៍ផ្ដល់ដោយមន្ត្រី មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បង្ហាញថា ការនេសាទលៀសនិងខ្ចៅ ក្នុងភូមិសាស្ត្របឹងទន្លេខេត្តសៀមរាប មានចំនួនជាមធ្យមក្នុងមួយថ្ងៃ ៧០ទូក និងទន្និផលដែលទទួល ជាមធ្យម ១៥តោន។
ការចុះផ្សព្វផ្សាយសេចក្តីជូនដំណឹងរបស់ក្រសួងកសិកម្ម រុក្ខាប្រមាញ់ និងនេសាទនេះ មានបំណងបញ្ជ្រាបការយល់ដឹងពីការអនុវត្តច្បាប់របស់អាជ្ញាធរ និងណែនាំដល់ប្រជានេសាទចៀសផុតពីការប្រព្រឹត្តបទល្មើស ដែលច្បាប់ជលផល បានប្រកាសឱ្យប្រើប្រាស់តាំងពីឆ្នាំ២០១៦មក។
ជាមួយនោះ តំណាងប្រជាពលរដ្ឋមួយរូប លើកមតិថា ក្នុងឃុំកំពង់ឃ្លាំង មានប្រជាពលរដ្ឋ ពឹងផ្អែកលើការនេសាទ ចំនួន៨៥ភាគរយ។ ប្រសិនបើក្រសួងកសិកម្ម មិនអនុញ្ញាតឲ្យនេសាទដោយឈ្នាងអូសលៀស ឬខ្ចៅ ដោយប្រើម៉ាស៊ីន តើជីវភាពប្រជាពលរដ្ឋនៅក្នុងភូមិសាស្ត្រនេះនឹងទៅជាយ៉ាងណា?
មានវត្តមានក្នុងវេទិកានោះ លោក ទា គឺមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ពន្យល់ថា ពាក់ព័ន្ឋទៅនឹងវិស័យជលផល រាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ បានចុះសិក្សា និងវាយតម្លៃលើផលប៉ះពាល់ ទៅនឹងជីវភាពប្រជានេសាទច្រើនលើកច្រើនសារជាមុនរួចមកហើយ ទើបនៅប៉ុន្មានឆ្នាំកន្លងមកនេះ ក្រសួង បានណែនាំដល់មន្ទីរកសិកម្មខេត្ត ធ្វើការផ្សព្វផ្សាយសេចក្តីជូនដំណឹង លិខិតបទដ្ឋានផ្សេងៗ ជូនដល់ប្រជាពលរដ្ឋ រស់នៅតាមបណ្តាស្រុកជាប់ភូមិសាស្ត្របឹងទន្លេសាបក្នុងខេត្តសៀមរាប។
លោកប្រធានមន្ទីរ ពន្យល់បន្ថែមថា ដោយសារបម្រែបម្រួលអាកាសធាតុ ធ្វើឲ្យទឹកទន្លេគោករាក់ជាបន្តបន្ទាប់ និងបានបណ្តាលឲ្យផលនេសាទ មានការថយចុះពីមួយឆ្នាំទៅមួយឆ្នាំ។ កត្តានេះ ធ្វើឲ្យប្រជានេសាទមួយចំនួន ប្តូរពីការនេសាទត្រី មកនេសាទលៀសវិញ។ ការកើនឡើងចំនួនអ្នកនេសាទលៀឬខ្ចៅនេះ បង្កឲ្យបាត់បង់ប្រព័ន្ឋជីវចម្រុះនៅបាតទន្លេ បាត់បង់ជម្រកសម្រាប់ត្រីពងកូន ដែលបង្កឲ្យពូជត្រីក្នុងបឹងទន្លេឈានទៅរកការដាច់ពូជ។
លោកប្រធានមន្ទីរ បញ្ជាក់ថា យោងតាមសេចក្តីជូនដំណឹងលេខ១១៧៣ស.ជ.ណ.កសក ស្តីពីការទប់ស្កាត់ការធ្វើនេសាទឈ្នាងអូសលៀស ឬខ្ចៅរួមផ្សំ ដោយកម្លាំងម៉ាស៊ីន ជនល្មើសនឹងត្រូវផ្ដន្ទាទោសតាមច្បាប់ស្តីពីជលផល មានចែងក្នុងមាត្រា៩៤ ថា៖ ត្រូវទទួទលពិន័យអន្តរការណ៍ពីរដ្ឋបាលជលផល ជាប្រាក់ពីមួយដង ទៅពីរដងលើតម្លៃទីផ្សារនៃវត្ថុតាងពិតប្រាកដ ឯវត្ថុតាងទាំងអស់ត្រូវប្រគល់ឱ្យសាម៉ីជនវិញ។
អត្ថបទ និង រូបភាព៖ យូ វង្ស
កែសម្រួល៖ សេង ផល្លី
