(តូក្យូ)៖ នាយករដ្ឋមន្ត្រីជប៉ុន លោក ស៊ីនហ្សូ អាបេ បានផ្ដល់យោបល់ ក៏ដូចជាលើកទឹកចិត្តឱ្យប្រជាជនជប៉ុនទាំងអស់នៅទូទាំងប្រទេស កុំទៅធ្វើការ ឬក៏ទៅសាលារៀន នៅក្នុងករណីដែលមានរោគសញ្ញាផ្ដាសាយ ឬគ្រុនក្ដៅ ខណៈរដ្ឋាភិបាលរបស់លោកកំពុងប្រយុទ្ធនឹងការរីករាលដាលនៃជំងឺ COVID-19។ នេះបើតាមការដកស្រង់ចេញផ្សាយពីសារព័ត៌មាន Kyodo នៅថ្ងៃពុធ ទី១៩ ខែកុម្ភៈ ឆ្នាំ២០២០។
លោក អាបេ ធ្វើការកត់សម្គាល់ខាងលើ នៅក្នុងកិច្ចប្រជុំជាមួយក្រុមមន្ត្រីដែលកំពុងប្រយុទ្ធប្រឆាំងនឹង COVID-19 ក្នុងសប្ដាហ៍នេះ។ ថ្លែងនាឱកាសនោះ លោកនាយករដ្ឋមន្ត្រីជប៉ុន បានគូសបញ្ជាក់ ថា៖ «អ្វីដែលខ្ញុំចង់ឱ្យប្រជាជនជប៉ុន ធ្វើមុនគេ នោះគឺកុំទៅធ្វើការ និងទៅសាលារៀន បើសិនមានអាការៈ ឬរោគសញ្ញាគ្រុនក្ដៅ ឬក៏ផ្ដាសាយ…រីឯបណ្ដាក្រុមហ៊ុននានាវិញក៏គួរតែជំរុញឱ្យបុគ្គលិករបស់ខ្លួនឈប់សម្រាកផងដែរ នៅក្នុងករណីពួកគេមិនស្រួលខ្លួន»។
លោក អាបេ បន្ថែមថាការធ្វើការងារពីផ្ទះ គឺជាមធ្យោបាយមួយដ៏មានប្រសិទ្ធភាព ដើម្បីចូលរួមចំណែកទប់ស្កាត់ការរីករាលដាល COVID-19 ហើយ ជាពិសេសអ្នកដែលមានកម្ដៅរាងកាយ ៣៧.៥អង្សាសេ ឬខ្ពស់ជាងនេះ គួរតែទៅពិគ្រោះយោបល់ជាមួយគ្រូពេទ្យ ឬក៏ទៅពិនិត្យ សុខភាពនៅឯមន្ទីពេទ្យតែម្ដង៕
