នាពេលបច្ចុប្បន្ន ព្រៃលិចទឹកក្នុងតំបន់២ ក្នុងចំណោមតំបន់ព្រៃលិចទាំង៣តំបន់ ក្នុងខេត្តសៀមរាប កំពុងប្រឈមនឹងការបាត់បង់ ដោយសារប្រជាពលរដ្ឋ កាប់ទន្ទ្រានធ្វើស្រែចំការ នេះបើតាមប្រសាសន៍ លោក ធិន នីសុទ្ធី នាយរងខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ក្នុងកម្មវិធីសន្ទនាមតិ ថ្ងៃទី១៩ ខែកុម្ភៈ ឆ្នាំ២០២០។
នាយរងខណ្ឌរដ្ឋបាលជលផល បង្ហាញថា តំបន់ព្រៃលិចទឹកក្នុងខេត្តសៀមរាប មានផ្ទៃដីសរុប ១៣៤,៨៧៩ហិកតា។ នៅឆ្នាំ២០១២ អាជ្ញាធរបឹងទន្លេសាប បានបែងចែកផ្ទៃដីទាំងនោះ ជា៣តំបន់ ក្នុងនោះ តំបន់១ ជាតំបន់សម្រាប់ប្រជាពលរដ្ឋរស់នៅ តំបន់២ ជាតំបន់ព្រៃលិចទឹក និងអាចអភិវឌ្ឍន៍បាន ប្រសិនបើមានការអនុញ្ញាតពីក្រសួងកសិកម្ម រុក្ខាប្រមាញ់ និងនេសាទ និងតំបន់៣ ជាតំបន់មិនអនុញ្ញាតឲ្យប្រជាពលរដ្ឋធ្វើការរស់នៅ ឬអភិវឌ្ឍឡើយ។
ព័ត៌មានជាតិ ថ្មីៗ
តាមរយៈសេចក្ដីជូនដំណឺងរបស់ក្រសួងកសិកម្ម លោកនាយរងខណ្ឌរដ្ឋបាលជលផល បានឲ្យដឹងថា បញ្ហាដែលបង្កឲ្យបាត់បង់ព្រៃលិចទឹក បណ្ដាលមកពី កត្តាធម្មជាតិភ្លើងឆេះព្រៃ ការដុតព្រៃដោយប្រជាពលរដ្ឋ ដើម្បីពង្រីកដីកសិកម្ម ចាប់សត្វ ។ល។ ជាពិសេសការដុតព្រៃនេះ ក៏បានបង្កឲ្យឆេះភូមិដ្ឋានប្រជាពលរដ្ឋ និងស្រូវរបស់ប្រជាពលរដ្ឋផងដែរ។
មានវត្តមានក្នុងកម្មវិធីសន្ទនាមតិនោះដែរ លោក ឃឺន សុគុណវិសិដ្ធ អនុប្រធានមន្ទីរបរិស្ថានខេត្តសៀមរាប បានបញ្ជាក់ថា នៅក្នុងតំបន់បឹងទន្លេសាបខេត្តសៀមរាប មានស្ថាប័ន៣ ដែលមានសមត្ថកិច្ចត្រួតស៊ីគ្នា រួមមាន មន្ទីរកសិកម្ម រុក្ខាប្រមាញ់និងនេសាទ មន្ទីរបរិស្ថាន និងអាជ្ញាធរបឹងទន្លេសាប។ ក្រៅពីកិច្ចខិតខំប្រឹងប្រែងការពារតំបន់ព្រៃលិចទឹក តាមរយៈការចុះផ្សព្វផ្សាយសេចក្ដីណែនាំរបស់ស្ថាប័នសាម៉ីនីមួយៗ។ បន្ថែមពីនោះ នៅឆ្នាំ២០១៩ ស្ថាប័នទាំងបីនេះ ក៏បានសហការបង្ក្រាបបទល្មើសលួចកាប់ និងដុតព្រៃទន្ទ្រានយកដីព្រៃសាធារណសរុប ៣៦ករណី សរុប ១៥០ហិចតា ចាប់ជនល្មើស និងបញ្ជូនទៅតុលាការចំនួន ១៣នាក់ និងកំពុងបន្តស្រាវជ្រាវរកជនសង្ស័យសរុប ៣១នាក់។
គួរជម្រាបថា យោងតាមច្បាប់ នៃ បទល្មើសជលផលថ្នាក់លេខ១ ឬព្រៃឈើថ្នាក់លេខ១ ជនណា ដែលបង្កឲ្យមានភ្លើងឆេះព្រៃដោយចេតនា នឹងប្រឈមនឹងការជាប់ពន្ធនាគារចាប់ ៣ ដល់ ៥ឆ្នាំ និងពី ៥ដល់១០ឆ្នាំ។
អត្ថបទ និង រូបភាព៖ សេង ផល្លី
