បើទោះបីប្រជាជនកម្ពុជា មិនមែនជាប្រជាជនអ្នកមានក៏ដោយ ប៉ុន្តែទឹកចិត្តមនុស្សធម៌ និងមិត្តភាពរបស់ពួកគាត់ ពិតជាមានទំហំធំធេង មិនអាចកាត់ថ្លៃបាន នេះបើតាមប្រសាសន៍ ឯកឧត្តម លីវ ជឺជា ប្រធានការិយាល័យកុងស៊ុលចិនប្រចាំខេត្តសៀមរាប កាលពីល្ងាចថ្ងៃទី២៧ ខែកុម្ភៈ ឆ្នាំ២០២០ ក្នុងឱកាសបញ្ចប់ ព្រឹត្តិការណ៍សម្តែងសិល្បៈសប្បុរសធម៌ និងទទួលថវិកាមូនិធិជាង៥ម៉ឺនដុល្លារអាមេរិច នៅសាលមហោស្រពអាណាចក្រអង្គរ នាក្រុងសៀមរាប។
ព្រឹត្តិការណ៍នៃការសម្តែងសិល្បៈសប្បុរសធម៌ ដើម្បីប្រមូលកៀងគរថវិកា ជួយដល់មន្ទីរពេទ្យ និងប្រជាជនក្រុងវូហាន ខេត្តហឺប៉ី នៃសាធារណរដ្ឋប្រជាមានិតចិន ដែលបាននិងកំពុងរងផលប៉ះពាល់ដោយសារឆ្លងជំងឺ Covid-19 បានដំណើរការរយៈពេល៣ថ្ងៃ គឺនៅថ្ងៃទី២២ ថ្ងៃទី២៤ និងថ្ងៃទី២៦ ខែកុម្ភៈ ឆ្នាំ២០២០ រៀបចំដោយ មហោស្រពអាណាចក្រអង្គរ សហការជាមួយការិយាល័យកុងស៊ុលចិនប្រចាំនៅខេត្តសៀមរាប និងចូលរួមគាំទ្រដោយរដ្ឋបាលខេត្តសៀមរាប។ ថវិកាសប្បុរសធម៌នេះដែរ មួយចំនួនទទួលបានពីការលក់សំបុត្រចូលទស្សនា និងមួយចំនួនទៀត ទទួលបានពីការជួយឧបត្ថម្ភ របស់បណ្តាអង្គភាព ស្ថាប័ន ម្ចាស់ក្រុមហ៊ុន សហគ្រិន និងសមាគមផ្សេងៗទៀតផងដែរ។
ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា បន្ទាប់ពីការផ្ទុះឡើងនៃជម្ងឺឆ្លងCovid-19 ទីក្រុងវូហានត្រូវបានបិទទាំងស្រុង រួមមានផ្សារជំនួញ ភោជនីយដ្ឋាន រោងចក្រ សាលារៀន កន្លែងកំសាន្តនានា ដើម្បីទប់ស្កាត់ការរាតត្បាត នៃមេរោគដ៏សាហាវនេះ។ ក្រៅពីព្រឹត្តិការណ៍សប្បុរសធម៌នេះ ជាមនោសញ្ចេតនារួមសុខរួមទុក្ខជាមួយគ្នា នាពេលកន្លងមក រដ្ឋបាលខេត្តសៀមរាប បានឧបត្ថម្ភម៉ាសការពារចំនួនជាង ១២ម៉ឺនម៉ាស ជូនដល់ខេត្ត-ក្រុងសម្ព័ន្ធមេត្រីភាពចំនួន៤ រួមមាន ខេត្តយូណាន ក្រុងណានជីង ក្រុងឆុងឈីង និងក្រុងលីសួយ។ ជាមួយគ្នានេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ ក៏បានប្រកាសផ្តល់ម៉ាសចំនួន៣០ម៉ឺនម៉ាស និងសំលៀកបំពាក់ការពារការឆ្លងជំងឺCovid-19 ជូនដល់ក្រសួងការពារជាតិចិនផងដែរ។
ព័ត៌មានជាតិ ថ្មីៗ
លើសពីនោះ ក្រៅពីការប្រគល់ថវិកាមូនិធិជាង៥ម៉ឺនដុល្លារអាមេរិច ដែលទទួលបានពីព្រឹត្តិការណ៍សម្ដែងនេះ គេក៏ឃើញមានការចូលរួមឧបត្ថម្ភជា ម៉ាសការពារចំនួន១ពាន់ និងអាកុលសម្លាប់មេរោគ ៣៥០ គីឡូក្រាមផងដែរ។
ឯកឧត្តមប្រធានការិយាល័យកុងស៊ុលចិនប្រចាំខេត្តសៀមរាប បានថ្លែងអំណរគុណ ចំពោះរាជរដ្ឋាភិបាលកម្ពុជា ក៏ដូចជារដ្ឋបាលខេត្តសៀមរាប សាខាកាកបាទក្រហមសៀមរាប និងប្រជាពលរដ្ឋកម្ពុជាទាំងអស់ ដែលបានបង្ហាញឲ្យឃើញច្បាស់ អំពីមនោសញ្ចេតនា ទឹកចិត្តសប្បុរសធម៌ ជាពិសេសបង្ហាញនូវគោលជំហរមិត្តភាពដែកថែបរវាង ប្រទេសទាំងពីរ កម្ពុជា-ចិន។
គួរជម្រាបថា គិតត្រឹមថ្ងៃទី២៧ ខែកុម្ភៈ ឆ្នាំ២០២០នេះ ប្រទេសចិន មានករណីឆ្លងជំងឺកូរ៉ូណាវីរុស ឬCovid-19 ជិត៨ម៉ឺននាក់ហើយ ក្នុងនោះមានអ្នកស្លាប់ជិត៣ពាន់អ្នក។ ដោយឡែកមានប្រទេសចំនួន៥៦ហើយ ក៏កំពុងរងគ្រោះដោយសារមេរោគដ៏កាចសាហាវនេះ។
អត្ថបទ និងរូបភាព: លោក ងិន គឹមឡេង
កែសម្រួលដោយ៖ លោក សេង ផល្លី
