ឧបករណ៍ហាត់ប្រាណជាច្រើនមុខ ដែលបានបំពាក់នៅសួនកម្សាន្តមុខព្រះរាជដំណាក់ក្រុងសៀមរាប ត្រូវបានសម្ពោធដាក់ឲ្យប្រើប្រាស់ជាផ្លូវការហើយ កាលពីព្រឹកមិញនេះ
ឧបករណ៍ហាត់ប្រាណអាឃ្វ័ររៀស ចំនួន ១០គ្រឿង ជាអំណោយរបស់យក្រុមហ៊ុនភេសជ្ជៈកម្ពុជា កូកា-កូឡា ដែលបានបំពាក់នៅសួនកម្សាន្តមុខព្រះរាជដំណាក់ក្រុងសៀមរាប សម្រាប់ដាក់ ជូន សាធារណ ជនប្រើប្រាស់នោះ ត្រូវបានសម្ពោធដាក់ឲ្យប្រើប្រាស់ជាផ្លូវការហើយ កាលពីព្រឹកថ្ងៃទី២៨ ខែកុម្ភៈ ឆ្នាំ២០២០នេះ ក្រោមអធិបតីភាពលោក នាក់ ណេរ៉ុន អភិបាលរងខេត្ត និង ជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប ។
លោក រស់ សោភា តំណាងក្រុមហ៊ុនភេសជ្ជៈកម្ពុជា កូកា-កូឡា មានប្រសាសន៍ថា ការនាំយកឧបករណ៍ហាត់ប្រាណអាឃ្វ័ររៀសនាថ្ងៃនេះ គឺជាសកម្មភាពចម្បងមួយ នៃគម្រោងជាសាកលរបស់ក្រុមហ៊ុនកូកា-កូឡា ក្រោមឈ្មោះថា សុខុមាលភាពល្អ ក៏ដូចជាដើម្បីសម្តែងនូវឆន្ទៈគាំទ្រយ៉ាងពេញទំហឹង ចំពោះគោលនយោបាយរបស់រាជរដ្ឋាភិបាលកម្ពុជា លើការលើកកម្ពស់សុខុមាលភាពប្រជាជនកម្ពុជា តាមរយៈជំរុញប្រជាសហគមន៍មូលដ្ឋានធ្វើលំហាត់ប្រាណ ដើម្បីថែទាំសុខភាពប្រចាំថ្ងៃ និងបញ្ជៀសឱកាសសេពគ្រឿងញៀន ហើយក្រុមហ៊ុនរំពឹងថា ឧបករណ៍ហាត់ប្រាណនេះ នឹងជួយឲ្យពួកគាត់ធ្វើលំហាត់ប្រាណបានយ៉ាងត្រឹមត្រូវ តាមក្បួនជារៀងរាល់ថ្ងៃ ក៏ដូចជាកាត់បន្ថយការចំណាយលើការហាត់ប្រាណ ។
មានប្រសាសន៍ក្នុងឱកាសនោះ លោក នាក់ ណេរ៉ុន អភិបាលរងខេត្តសៀមរាប បានសម្ដែងនូវការថ្លែងអំណរគុណចំពោះក្រុមហ៊ុនភេសជ្ជៈកម្ពុជា កូកា-កូឡា ដែលបានជួយឧបត្ថម្ភនូវឧបករណ៍ហាត់ប្រាណជាសាធារណៈនាពេលនេះ ក្នុងគោលបំណងលើកកម្ពស់សុខុមាលភាពប្រជាជនកម្ពុជា ព្រោះថា ការហាត់ប្រាណនេះ បានជួយដល់សុខភាពដល់ទៅ០៨ចំណុច គឺ១. កាត់បន្ថយជំងឺ បេះដូង និងសួត , ២. កាត់បន្ថយការប្រឈមនឹងការស្លាប់ , ៣. បង្កើនអាយុដល់ទៅ០៣ឆ្នាំ បើធៀបទៅនឹងអ្នកដែលមិនបានហាត់ប្រាណជាប្រចាំ , ៤. ធ្វើឲ្យចង្វាក់បេះដូងមានដំណើរការល្អ , ៥. កាត់បន្ថយជាតិស្ករក្នុងរាយកាយ , ៦. ធ្វើឲ្យមានអារម្មណ៍ល្អ , ៧. ធ្វើឲ្យយើងគេងបានលក់ស្រួល និង ៨. ធ្វើឲ្យខួរក្បាលយើង ឆ្លាតវាងវៃ ជាពិសេស គឺជាចំណែកមួយនៃការកាត់បន្ថយពេលវេលាដែលឥតប្រយោជន៍ និង ប្រព្រឹត្តអំពើអបាយមុខទាំងឡាយ ដែលធ្វើឲ្យប៉ះពាល់ដល់សន្តិសុខសង្គម ។
លោក នាក់ ណេរ៉ុន មានប្រសាសន៍បន្ថែមថា ឧបករណ៍ហាត់ប្រាណត្រូវបានបំពាក់នៅសួនសាធារណៈ ហើយវាក៏ក្លាយទៅជាសម្បត្តិ សាធារណៈផងដែរ ប៉ុន្តែសូមឲ្យយើងទាំងអស់គ្នាត្រូវរួមគ្នាបណ្ដុះគំនិតស្រឡាញ់ទ្រព្យសម្បត្តិសាធារណៈ ព្រោះវាជារបស់យើងទាំងអស់គ្នា មិនមែនជារបស់អ្នកណាម្នាក់ឡើយ ដូច្នេះតាមរយៈនេះ សូមអំពាវនាវដល់ប្រជាពលរដ្ឋទូទៅ ត្រូវចូលរួមទាំងអស់គ្នា ថែរក្សា ការពារសម្បត្តិសាធារណៈនេះ ឲ្យបានស្ថិតនៅគង់វង្សយូរអង្វែង និង ជួយចែករំលែកឲ្យប្រជាពលរដ្ឋយើង បានប្រើប្រាស់ដើម្បីសុខភាពគ្រប់ៗគ្នា ៕
អត្ថបទ ៖ លោក លីវ សាន្ត
រូបភាព ៖ លោក សេង ផល្លី
