អាជ្ញាធរជាតិអប្សរា បានអំពាវនាវដល់សាធារណៈ ប្រជាពលរដ្ឋ ភ្ញៀវជាតិ និងអន្ដរជាតិ ចូលទស្សនាសារមន្ទីរចំនួន៣ នៅក្នុងខេត្ដសៀមរាប ដោយមិនគិតថ្លៃចំនួនមួយឆ្នាំ ដើម្បីអបអរពិធីខួប២៥ឆ្នាំ នៃការបង្កើតអាជ្ញាធរជាតិអប្សរា និងដើម្បីទាក់ទាញអ្នកទេសចរណ៍មកកាន់ប្រទេសកម្ពុជា ។
សារមន្ទីរទាំងបីនោះមាន ទី១ សារមន្ទីរនរោត្ដម ព្រះសីហនុ អង្គរ ទី២ សារមន្ទីរវាយនភណ្ឌប្រពៃណីអាស៊ីស្ថិតនៅក្រុងសៀមរាប និងទី៣ សារមន្ទីរកុលាលភាជន៍អង្គរស្ថិតនៅភូមិតានី ស្រុកបន្ទាយស្រីខេត្ដសៀមរាប ។
លោក ឡុង កុសល អ្នកនាំពាក្យអាជ្ញាធរជាតិអប្សរា បានអោយដឹងកាលពីថ្ងៃទី០៥ ខែមិនា ឆ្នាំ២០២០នេះថា អាជ្ញាធរជាតិអប្សរា នឹងបើកអោយសិស្សនិស្សិត ភ្ញៀវជាតិ និងអន្ដរជាតិ ចូលទស្សនាសារមន្ទីរចំនួន១ឆ្នាំ ដោយមិនគិតថ្លៃ ចាប់ពីថ្ងៃទី០៩ ខែមិនា ឆ្នាំ២០២០ ដើម្បីអបអរខួប២៥ឆ្នាំនៃការបង្កើតអាជ្ញាធរជាតិអប្សរា និងដើម្បីឲ្យពួកគាត់សិក្សាស្វែងយល់ពីវប្បធម៌ និងប្រវត្ដិសាស្ដ្រខ្មែរ អោយកាន់តែប្រសើរ ព្រមទាំងដើម្បីអោយមានការទាក់ទាញភ្ញៀវទេសចរណ៍មកកាន់ប្រទេសកម្ពុជា ជាពិសេសខេត្ដសៀមរាប អោយកាន់តែច្រើន ។
សារមន្ទីរនរោត្ដម ព្រះសីហនុ អង្គរ មានដាក់តាំងនូវរូបចម្លាក់បដិមាជាច្រើន ដែលជាវប្បធម៌បុរាណ បង្ហាញពីប្រវត្ដិសាស្ដ្រដ៍អស្ចារ្យក្នុងសម័យអង្គរ ដែលអ្នកទស្សនាអាចយកចំណេះដឹងនៅទីនោះ។ សារមន្ទីរវាយនភណ្ឌប្រពៃណីអាស៊ី មានការដាក់តំាងនូវសំលៀកបំពាក់ប្រពៃណីអាស៊ី ដែលមានវប្បធម៌ឥណ្ឌា-កម្ពុជា និងមានសំលៀកបំពាក់នៅតាមបណ្ដាប្រទេសនៅតាមទន្លេមេគង្គចូលរួមពិព័រណ៌នៅទីនោះផងដែរ។ ដោយឡែកសារមន្ទីរកុលាលភាជន៍ ភូមិតានី បានដើរតួនាទីយ៉ាងសំខាន់ក្នុងការផលិតកុលាលភាជន៍សម្រាប់ប្រើប្រាស់ប្រចាំថ្ងៃនាសម័យបុរាណ។
លោក ឡុង កុសល បានអំពាវនាវដល់គ្រិះស្ថានអប់រំ និងសាធារណៈជន ជាតិ និងអន្ដរជាតិ ទៅទស្សនាសារមន្ទីរទាំងបីនេះ ដោយលោកថា សិស្សនិស្សិតនឹងមានចំណេះដឹងបន្ថែមទៀតពីប្រវត្ដិសាស្ដ្ររបស់ខ្មែរ។ សូមជម្រាបថា សារមន្ទីរនរោត្ដមព្រះសីហនុ អង្គរ ចាប់ពីឆ្នាំ២០០៨ ដល់ឆ្នាំ២០១៩ ទទួលបានភ្ញៀវទេសចរណ៍ជាតិ និងអន្ដរជាតិចូលទស្សនាប្រមាណជាង៣ម៉ឺននាក់។ ចំណែកសារមន្ទីរវាយនភណ្ឌប្រពៃណីអាស៊ី ចាប់ពីឆ្នាំ២០១៦ ដល់ឆ្នាំ២០១៨ ទទួលបានភ្ញៀវទេសចរ ចូលទស្សនាចំនួន៦១៣នាក់ ខណៈដែលសារមន្ទីរកុលាលភាជន៍នៅភូមិតានី ស្រុកបន្ទាយស្រីមិនទាន់ដឹងចំនួនពិតនៅឡើយ៕
អត្ថបទ និងរូបភាព ៖ បូ សាវី
