នារសៀលថ្ងៃទី០៦ ខែមីនា ឆ្នាំ២០២០នេះ នៅសាលាខេត្តសៀមរាប លោកពិន ប្រាកដ អភិបាលរងខេត្តសៀមរាប បានដឹកនាំកិច្ចប្រជុំផ្សព្វផ្សាយ និងណែនាំ ស្តីពីការអនុវត្តវិធានការបង្ការជំងឺរលាកសួតកូវីត-១៩ (Covid-19) នៅក្នុងខេត្តសៀមរាប ដោយមានការអញ្ជើញចូលរួមពីលោកវិជ្ជ ក្រុស សារ៉ាត់ ប្រធានមន្ទីរសុខសភិបាលខេត្ត, តំណាងមជ្ឈមណ្ឌលគ្រប់គ្រង និងបង្ការជំងឺសហរដ្ឋអាមេរិក (US CDC ), តំណាងមជ្ឈមណ្ឌលប្រយុទ្ធនឹងជំងឺឆ្លងកម្ពុជា (C CDC ), តំណាងអង្គការសុខភាពពិភពលោក, តំណាងវិទ្យាស្ថានជាតិប៉ាស្ទ័រ ព្រមទាំងមេបញ្ជាការរងកងកម្លាំងប្រដាប់អាវុធ តំណាងអាកាសយានដ្ឋានអន្តរជាតិសៀមរាប លោក លោកស្រី ប្រធាន អនុប្រធានមន្ទីរ អង្គភាពពាក់ព័ន្ធក្នុងខេត្ត ជាច្រើននាក់បានចូលរួម ។ ការបើកកិច្ចប្រជុំនេះគឺផ្ដោតសំខាន់លើការទប់ស្កាត់ចំពោះ ស្ថានភាពថ្មីៗ ដែលបាននិងកំពុងកើតឡើងនៅលើទឹកដីខេត្តសៀមរាប ក្រោយបុរសជនជាតិជប៉ុនម្នាក់ ត្រូវបានប្រកាសពីការឆ្លងកូវីដ១៩ កាលពីប៉ុន្មានថ្ងៃមុននេះ ក្រោយពីគាត់បានធ្វើដំណើរចាកចេញពីខេត្តសៀមរាប។ក្រោយទទួលបានព័ត៌មាន ពីការឆ្លងកូវីដ១៩ ទៅលើបុរសជនជាតិជប៉ុនរូបនេះ ក្រសួងសុខាភិបាល និងអាជ្ញាធរខេត្តសៀមរាប បានរួមគ្នាចាត់វិធានការភ្លាមៗ ដោយនាំមនុស្ស ៤នាក់ ដែលមានទំនាក់ទំនងផ្ទាល់ ពោលជាអ្នកធ្វើការជាមួយអ្នកជំងឺយកទៅទុកដាច់ដោយឡែក ដដើម្បីតាមដានសុខភាពរបស់ពួកគេរង់ចាំលទ្ធផលពិនិត្យសំណាក។ ចំណែកមនុស្ស៤៤នាក់ទៀត ក៏ត្រូវបានណែនាំឲ្យបង្កើនការយកចិត្តទុកដាក់តាមដានអំពីសុខភាពផងដែរ។
លោកពិន ប្រាកដ អភិបាលរងខេត្តសៀមរាប ក៏បានមានប្រសាសន៍ថា ដើម្បីឆ្លើយតបទៅនឹងស្ថានភាព នៃការរាតត្បាតជំងឺរលាកសួតកូវីដ១៩ (Covid-19) នៅជុំវិញពិភពលោក និងនៅតាមបណ្តាប្រទេសមួយចំនួននៅទ្វីបអាស៊ីក៏ដូចជាការព្រួយបារម្ភរបស់ប្រជាជនក្នុងខេត្ត ដោយសារជំងឺនេះមិនទាន់ មានថ្នាំព្យាបាលឬវ៉ាក់សាំងបង្ការនៅឡើយ។ ក្នុងគោលបំណងជំរុញការអនុវត្តវិធានការបង្ការទប់ស្កាត់ជំងឺនេះ រដ្ឋបាលខេត្ត ក៏ដូចជាមន្ទីរសុខាភិបាលខេត្ត សូមអោយធ្វើការណែនាំបន្ថែមដល់ម្ចាស់សហគ្រាស អាជីវកម្ម ពាណិជ្ជករ អាជីវករ និងសេវាករ ព្រមទាំងបងប្អូនប្រជាពលរដ្ឋទាំងអស់ ត្រូវតាមដាន និងចូលរួមបង្ការ ទប់ស្កាត់ជំងឺរលាកសួតកូវីដ១៩(Covid-19) ឱ្យបានខ្លាំងក្លាបំផុត ដើម្បីការពារសេចក្តីសុខសុវត្ថិភាពផ្នែកសុខភាពជូនប្រជាពលរដ្ឋ និងភ្ញៀវទេសចរជាតិ និងអន្តរជាតិឲ្យបានល្អប្រសើរ ។
លោកវិជ្ជ ក្រុស សារ៉ាត់ ប្រធានមន្ទីរសុខាភិបាលខេត្ត បានជម្រាបជូនអង្គប្រជុំថាក្រុមការងាររបស់លោកបាននឹងកំពុងយកចិត្តទុកដាក់ខ្ពស់បំផុតចំពោះជំងឺរលាកសួតកូវីដ១៩ (Covid-19) ហើយគិតមកដល់ពេលនេះ សម្រាប់ប្រទេសកម្ពុជា និងខេត្តសៀមរាបយើងនៅមិនទាន់មានករណីឆ្លងនេះនៅឡើយទេ ។
មុននឹងបញ្ចប់កិច្ចប្រជុំ លោកអភិបាលរងខេត្ត បានណែនាំទៅក្រុមការងារពាក់ព័ន្ធទាំងអស់របស់ខេត្តធ្វើការផ្សព្វផ្សាយឲ្យបានទូលំទូលាយជូនប្រជាពលរដ្ឋ នូវព័ត៌មាន ដែលកំពុងមានជាក់ស្ដែង ដែលបច្ចុប្បន្ននៅប្រទេសកម្ពុជាយើងទាំងមូលពុំទាន់មានករណីឆ្លងមេរោគនេះឡើយ ផ្ទុយមកវិញក្រុមការងារត្រូវនាំគ្នាយកចិត្តទុកដាក់ទប់ស្កាត់នូវរាល់ព័ត៌មានក្លែងក្លាយដែលទទួលបានពីប្រភពមិនច្បាស់លាស់ ដែលការផ្សាយនោះធ្វើឱ្យសាធារណជនមានការយល់ច្រឡំ មានការភ័យខ្លាចនៅក្នុងខេត្តក៏ដូចជានៅក្នុងប្រទេសកម្ពុជាយើងទាំងមូលដែរ ៕
អត្ថបទ និងរូបភាពៈលោកទ្រា ពន្លឺ
កែសម្រួលដោយៈ លីវ សុខុន
