ព្រឹកថ្ងៃទី៩ ខែមីនា ឆ្នាំ២០២០ នៅសាលានគរបាលជាតិភូមិភាគទី៤ មានរៀបចំបើកវគ្គបណ្តុះបណ្តាលកម្រឹតបឋមវិជ្ជាជីវៈនគរបាល សម្រាប់សិស្សនាយនគរបាល និងសិស្សនាយនគរបាលរង ក្របខ័ណ្ឌថ្មី ឆ្នាំ២០១៩ ចំនួន២២៨នាក់ ក្នុងនោះ មាននារី ៦១នាក់ដែលចាត់បញ្ចូនមកពីស្នងការដ្ឋាននគរបាលខេត្តសៀមរាប ខេត្តឧត្តរមានជ័យ និងខេត្តបន្ទាយមានជ័យ ដែលវគ្គបណ្តុះបណ្តាលមានរយៈពេល ៤ខែ។
ឯកឧត្តម នាយឧត្តមសេនីយ៍ សាស្ត្រាចារ្យ ឯក មនោសែន អនុប្រធានបណ្ឌិត្យសភានគរបាលកម្ពុជា និងជាប្រធាននាយកដ្ឋានបណ្តុះបណ្តាល លើកឡើងថា វគ្គបណ្តុះបណ្តាលដ៏មានសារសំខាន់ និងប្រវត្តិសាស្រ្តក្នុងឆាកជីវិតសិក្ខាកាម ដោយបានផ្លាស់ប្តូរជីវភាពការងារជាជនស៊ីវិល មកជាកងកម្លាំងនគរបាលជាតិ។ សិស្សដែលទទួលបានវិញ្ញាបនប័ត្រ និងទទួលការប្រកាសតាំងស៊ប់ក្នុងក្របខ័ណ្ឌមន្រ្តីនគរបាលជាតិកម្ពុជា លុះត្រាតែបានទទួលការសិក្សាពេញលេញប្រកបដោយជោគជ័យ និងត្រូវបានអនុវត្តិតាមនីតិវិធី ជាធរមាន។
បណ្ឌិតសភានគរបាលកម្ពុជា បានដាក់ចេញនូវផែនការយុទ្ធសាស្រ្ត និងកម្មវិធីកំណែទម្រង់លើការងារសំខាន់ៗមួយចំនួន ដូចជាការងារដឹកនាំគ្រប់គ្រង ការអភិវឌ្ឍកម្មវិធីអប់រំ ការអភិវឌ្ឍសមត្ថភាពគ្រូបង្រៀន ការពង្រឹងវិន័យនិស្សិត សិក្ខាកាម-សិស្សនាយនគរបាល និងសិស្សនាយនគរបាលរង ការអភិវឌ្ឍធនធានមនុស្ស បង្កើតឲ្យមានយន្តការពង្រឹងគុណភាពអប់រំផ្ទៃក្នុង អភិវឌ្ឍហេដ្ឋារចនាសម្ព័ន្ធនិងសម្ភារៈសិក្សា ពង្រឹងសមត្ថភាពស្រាវជ្រាវវិទ្យាសាស្រ្តនគរបាល និងការពង្រឹងពង្រីកកិច្ចសហប្រតិបត្តិការជាតិនិងអន្តរជាតិ សំដៅលើកកម្ពស់គុណភាពអប់រំបណ្តុះបណ្តាល ព្រមទាំងឆ្លើយតបទៅនឹងអង្គភាពប្រើប្រាស់កងកម្លាំងនគរបាលជាតិ ស្របតាមទិសដៅរបស់ក្រសួងមហាផ្ទៃ និងគោលនយោបាយកំណែទម្រង់កងកម្លាំងប្រដាប់អាវុធរបស់រាជរដ្ឋាភិបាល ដែលមានសម្តេចតេជោ ជានាយករដ្ឋមន្រ្តី៕
ព័ត៌មានជាតិ ថ្មីៗ
អត្ថបទ និងរូបភាព៖ ងិន គីមឡេង
