កាលពីរសៀលថ្ងៃទី០៩ ខែមីនា ឆ្នាំ២០២០ម្សិលមិញនេះ នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល សហការជាមួយមន្ទីរសុខាភិបាលខេត្តសៀមរាប និងអាជ្ញាធរមូលដ្ឋាន មានរៀបចំកម្មវិធីអប់រំសុខភាពអំពីជំងឺកូវីត១៩ រួមនិងសំណួរចម្លើយ ជូនដល់ ប្រជាពលរដ្ឋចំនួន ១១៨នាក់ ក្នុងនោះស្រី៧០នាក់ ស្ថិតក្នុងបុរីប្រិមប្រិយ ភូមិត្រពាំងសេះ សង្កាតគោកចក ក្រុងសៀមរាប។
ឯកឧត្តម លី សុវណ្ណ អ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធនឹងជំងឺឆ្លង បង្ហាញថា ការឆ្លងជំងឺកូវីតនាពេលបច្ចុប្បន្នជាង១០ម៉ឹនករណីនៅទូទាំងពិភពលោក ភាគច្រើនឆ្លងតាមផ្លូវដង្ហើម ដូច្នេះវិធីការពារ ត្រូវ ការពាក់ម៉ាសឲ្យបានត្រឹមត្រូវ ការលាងសម្អាតដៃ ឲ្យបានញឹកញាប់គឺជាវិធានការសម្រាប់ការពារការឆ្លងជំងឺកូវីត១៩។
ឯកឧត្តម លី សុវណ្ណ បញ្ជាក់ថា ជំងឺកូវីត១៩ មិនមែនជាជំងឺកាចសាហាវឡើយ មេរោគនេះ វាងាយនឹងស្លាប់ ក្នុងសីតុណ្ហភាពចាប់ពី៦០អង្សាឡើងទៅ ហើយក៏មានថ្នាំច្រើនប្រភេទអាចព្យាបាលអ្នកឆ្លងជំងឺបានដែរ។
ឯកឧត្តម បញ្ជាក់បន្ថែមថា ភាគច្រើនជំងឺនេះ បង្កគ្រោះថ្នាក់ធ្ងន់ធ្ងរចំពោះមនុស្សមានអាយុចាប់ពី៦០ឆ្នាំ និងអ្នកដែលមានប្រព័ន្ធភាពស៊ាំខ្សោយ ដូចជាអ្នកជំងឺរលាកថ្លើម រលាកសួត ជំងឺអេដស៍ ឬជំងឺលើសឈាមជាដើម ។ ដោយឡែក អ្នកដែលហាត់ប្រាណទៀងទាត់ មានសុខភាពល្អ និងមានប្រព័ន្ធភាពស៊ាំខ្លាំង ទោះបីជាឆ្លងជំងឺកូវីត១៩នេះ ក៏វានឹងជាដោយឯកឯង។
គួរបញ្ជាក់ថា តាមសេចក្តីសន្និដ្ឋានរួមរបស់ មន្រ្តីជំនាញអង្គការសុខភាពពិភពលោក មជ្ឈមណ្ឌលប្រយុទ្ធនឹងជំងឺឆ្លងសហរដ្ឋអាមេរិក វិទ្យាស្ថានប៉ាស្ទ័រកម្ពុជា និងនាយកដ្ឋានប្រយុទ្ធនឹងជំងឺឆ្លងកម្ពុជា គិតត្រឹមម៉ោង ៥:៣០នាទីល្ងាច ថ្ងៃទី០៩ មីនា ២០២០ នៅទូទាំងប្រទេសកម្ពុជា មានមនុស្សសរុបទាំងអស់ចំនួន ៤៦២ករណី និងពុំមានភស្តុតាងបញ្ជាក់ថាមានឆ្លងជំងឺកូវីត១៩ បន្ថែមទៀតឡើយ។
រូបភាព៖ ខេង ឧត្តម
អត្ថបទ៖ សេង ផល្លី
