មនុស្សវ័យក្មេង ដែលចេញរោគសញ្ញា ថាមានផ្ទុកជំងឺCovid-19 មានចំនួនតិច បើធៀបនឹងចំនួនឆ្លងនៅទូទាំងពិភពលោក ក្នុងនោះ អាយុក្រោម ១៤ឆ្នាំ មានត្រឹមតែ ០.៥ភាគរយនៃចំនួនសរុប។ ប៉ុន្តែកត្តាសំខាន់ ប្រជាពលរដ្ឋទាំងអស់ ត្រូវថែទាំសុខភាព ត្រូវហាត់ប្រាណ ហូបចំណីអាហារមានជីវជាតិ ចម្អិនអាហារឲ្យបានឆ្អិនល្អ ធ្វើអនាម័យដៃ និងពាក់ម៉ាសនៅកន្លែងមានមនុស្សកុះករ។
នេះ បើតាមប្រសាសន៍ របស់ឯកឧត្តម លី សុវណ្ណ អ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល សហការជាមួយមន្ទីរសុខាភិបាលខេត្តសៀមរាប ក្នុងកម្មវិធីអប់រំសុខភាពអំពីជំងឺកូវីត១៩ រួមនិងសំណួរចម្លើយ ជូនដល់ ប្រជាពលរដ្ឋចំនួន ១១៨នាក់ ស្ថិតក្នុងបុរីប្រិមប្រិយ ភូមិត្រពាំងសេះ សង្កាត់គោកចក ក្រុងសៀមរាប។
ឯកឧត្តម បញ្ជាក់ថា ភាគច្រើនជំងឺCovid-19នេះ បង្កគ្រោះថ្នាក់ធ្ងន់ធ្ងរចំពោះមនុស្សមានអាយុចាប់ពី៦០ឆ្នាំ និងអ្នកដែលមានប្រព័ន្ធភាពស៊ាំខ្សោយ ដូចជាអ្នកជំងឺរលាកថ្លើម រលាកសួត ជំងឺអេដស៍ ឬជំងឺលើសឈាមជាដើម ។
ឯកឧត្តម បង្ហាញថា ជំងឺកូវីត១៩ មិនមែនជាជំងឺកាចសាហាវឡើយ មេរោគនេះ វាងាយនឹងស្លាប់ ក្នុងសីតុណ្ហភាពចាប់ពី៦០អង្សាឡើងទៅ ហើយក៏មានថ្នាំច្រើនប្រភេទអាចព្យាបាលអ្នកឆ្លងជំងឺបានដែរ។
ឯកឧត្តម លើកឡើថា នៅទូទាំងពិភពលោក មានករណីឆ្លងជំងឺCovid-19 ជាង១០ម៉ឹនករណី ភាគច្រើនឆ្លងតាមផ្លូវដង្ហើម ដូចនេះវិធីការពារ ក្នុងស្ថានភាពនៅក្នុងក្រុមមនុស្សច្រើន គួរពាក់ម៉ាស មិនលើសពី១ម៉ោង។ ក្នុងករណី ទៅជួបអ្នកសង្ស័យថា មានជំងឺនេះ បន្ទាប់ពីជួបរួចរាល់ សូមបោះចោលភ្លាម។
ឯកឧត្តម សង្កត់ធ្ងន់ថា កត្តាដែលលោកព្រួយបារម្ភបំផុត និងមានភាគរយឆ្លងខ្ពស់ គឺ ដៃ ដែលយើងបានប៉ះសម្ភារនានា ដែលអាចជាប្រភពចម្លងជំងឺនេះ បន្ទាប់មកប្រជាពលរដ្ឋយកដៃមកប៉ះពាល់លើផ្ទៃមុខ។
ឯកឧត្តមប្រធាននាយកដ្ឋានប្រយុទ្ធនឹងជំងឺឆ្លង អំពាវនាវដល់ប្រជាពលរដ្ឋគ្រប់រូប ជំនួសឲ្យការភ័យខ្លាចជ្រុល សូមធ្វើអនាម័យដៃ ឲ្យបានញឹកញាប់ នៅពេលចេញទៅក្រៅផ្ទះ ថែរក្សាសុខភាពឲ្យបានល្អ និងព្រួយបារម្ភហួសហេតុ ដែលបណ្ដាលឲ្យសុខភាព ជាពិសេសប្រព័ន្ធភាពស៊ាំរបស់សរីរាង្គមានការអន់ខ្សោយផងដែរ។
រូបភាព៖ ខេង ឧត្តម
អត្ថបទ៖ សេង ផល្លី
