ដីលំនៅឋាន របស់ប្រជាពលរដ្ឋចំនួន ៨គ្រួសារ ដែលកំពុងរស់នៅរំលោភលើដីចំណីផ្លូវ និងពុំមានប័ណ្ណសំគាល់ម្ចាស់អចលនទ្រព្យ ស្ថិតនៅភូមិពោធិបន្ទាយជ័យ សង្កាត់សៀមរាប ក្រុងសៀមរាប ត្រូវបានអាជ្ញាធរសង្កាត់ និងរដ្ឋបាលក្រុងសៀមរាប សម្រេចអនុញ្ញាតឲ្យសាងសង់លំនៅឋានលើទីតាំងដដែល និងកាត់ចេញនូវដីចំណីផ្លូវដែលរដ្ឋត្រូវការ។
នេះបើតាមរបាយការណ៍របស់លោក នួន ពុទ្ឋារ៉ា អភិបាលក្រុងសៀមរាប ជម្រាបជូន ឯកឧត្តម ទៀ សីហា អភិបាលខេត្តសៀមរាប ក្នុងឱកាសចុះសួរសុខទុក្ខប្រជាពលរដ្ឋ ទាំង៨គ្រួសារនេះ ដល់លំនៅឋាន នៅព្រឹកថ្ងៃទី១០ខែមីនាឆ្នាំ២០២០។
តាមការឲ្យដឹងរបស់អាជ្ញាធរមូលដ្ឋាន និងរដ្ឋបាលក្រុងសៀមរាប ក្នុងឱកាសនោះ បានបង្ហាញថា បន្ទាប់ពីមានការជួបពិភាក្សា ដោះស្រាយជាច្រើនលើកនាពេលកន្លងមក ប្រជាពលរដ្ឋទាំង៨គ្រួសារ បានឯកភាពទទួលយកតាមការស្នើសុំរបស់អាជ្ញាធរមូលដ្ឋាន ក្នុងការរុះរើសំណង់ និងកាត់ដី ដែលបានរំលោភលើចំណីផ្លូវ ដើម្បីពង្រីកផ្លូវចុះពីស្ពានថ្មថ្មី ដែលស្ពាននេះគ្រោងនឹងសម្ពោធដាក់ឱ្យប្រើប្រាស់នៅអំឡុងខែឧសភាខាងមុខនេះ។
មានប្រសាសន៍សំណេះសំណាលទៅកាន់ប្រជាពលរដ្ឋ ឯកឧត្តម ទៀ សីហា ថ្លែងអំណរគុណ ដល់ប្រជាពលរដ្ឋទាំង៨គ្រួសារ ដែលបានសហការ និងយោគយល់ ដល់កិច្ចការអភិវឌ្ឍ របស់រដ្ឋបាលក្រុង ក៏ដូចជារដ្ឋបាលខេត្តសៀមរាប ដើម្បីកែលំអសោភណ្ឌភាព ទីក្រុងទេសចរណ៍ប្រវត្កិសាស្ត្ររបស់យើង កាន់តែប្រសើរឡើងជាបន្តបន្ទាប់។
ជាមួយនោះ ការយោគយល់ និងឯកភាពរបស់ប្រជាពលរដ្ឋ និងអាជ្ញាធរនាពេលនេះ ស្របទៅនឹងគោលនយោបាយឈ្នះឈ្នះ របស់សម្តេចតេជោ ហ៊ុន សែន នាយករដ្ឋមន្ត្រី ដោយភាគីទាំងសងខាងសុទ្ធតែប្រកាន់ធម៌អហិង្សា និងជាអ្នកឈ្នះដូចគ្នា។
ឆ្លៀងក្នុងឱកាសនោះដែរ ឯកឧត្តមអភិបាលខេត្ត បញ្ជាក់ថា នៅពេលដ៏ខ្លីខាងមុខនេះ អាជ្ញាធរខេត្ត និង មានកិច្ចសហការជាមួយ មន្ទីរសុខាភិបាលខេត្ត អាជ្ញាធរមូលដ្ឋាន សហភាពសហព័ន្ធយុវជនកម្ពុជាខេត្តសៀមរាប រៀបចំព្រឹត្តិការណ៍ សៀមរាបផ្ទះខ្ញុំ បើកយុទ្ធនាការបាញ់ថ្នាំសម្លាប់មេរោគ សំអាតបរិស្ថាននៅតាមទីប្រជុំជន តាមគ្រឺះស្ថាន សាលារៀន ។ល។ ដើម្បីការពារ ប្រយុទ្ធនឹង វីរុស កូវិដ១៩ និងបង្កើនភាពកក់ក្តៅជូនបងប្អូនប្រជាពលរដ្ឋក្នុងខេត្តសៀមរាប៕
អត្ថបទ និងរូបភាព៖ យូ វង្ស
កែសម្រួល៖ សេង ផល្លី
