ឯកឧត្តម សែម សុខា រដ្ឋលេខាធិការក្រសួងសង្គមកិច្ច អតីតយុទ្ធជន និង យុវនីតិសម្បទា មានប្រសាសន៍ថា ទាំងរយៈកាលកន្លងមក ក៏ដូចជាបច្ចុប្បន្ននេះ ប្រមុខរាជរដ្ឋាភិបាលកម្ពុជា បានយកចិត្តទុកដាក់ឲ្យមានការគោរពសិទ្ធិជនពិការជាមូលដ្ឋាន ខណៈច្បាប់ស្តីពីកិច្ចការពារនិងលើកកម្ពស់សិទ្ធិជនពិការ មានសារៈសំខាន់ណាស់ សម្រាប់ការដោះស្រាយការលំបាករបស់ជនពិការនៅក្នុងសង្គម ។
ព្រោះច្បាប់នេះត្រូវបានជំរុញឲ្យមានការគោរពសិទ្ធិជនពិការជាមូលដ្ឋាន កាត់បន្ថយការរើសអើងជនពិការ ពង្រឹងទស្សនៈមើលឃើញសមត្ថភាពជនពិការ ប្រសើរជាងការមើលឃើញពិការភាព ដោយផ្តល់ឱកាសស្មើភាពចំពោះជនពិការ ក្នុងការបង្កើតមុខរបរ ដោះស្រាយការងារ បង្កើនប្រាក់ចំណូល ជួយសម្រួលដល់ការធ្វើដំណើរចល័តទីរបស់ជនពិការ ការទទួលបាននូវសេវាអប់រំ សុខាភិបាល សង្គមកិច្ច ការចូលរួមសកម្មភាពនយោបាយនិងការអភិវឌ្ឍសង្គម ។
ឯកឧត្តម សែម សុខា មានប្រសាសន៍ទៀតថា ការអនុវត្តរបបគោលនយោបាយចំពោះជនពិការក្រីក្រនៅតាមសហគមន៍ ពិតជាមានសារៈសំខាន់បំផុតក្នុងការលើកកម្ពស់ជីវភាពរស់នៅ ការកាត់បន្ថយ និងការទប់ស្កាត់ភាពក្រីក្រ ភាពងាយរងគ្រោះរបស់ជនពិការ វិសមភាព និងបង្កើនលទ្ធភាពទទួលបានសេវាជំនួយសង្គម ដូចជាការព្យាបាលដោយឥតគិតថ្លៃ ការអប់រំពិសេសនិងការអប់រំបញ្ចូលគ្នាសម្រាប់ជនពិការ បង្កើនមុខរបរនិងការងារធ្វើ ការស្តារលទ្ធភាពពលកម្មកាយសម្បទា និងសេវាសាធារណៈជាច្រើនទៀត ជូនបងប្អូនជនពិការគ្រប់ប្រភេទ និងគ្រប់កម្រិតរបស់យើង ដូច្នេះដើម្បីធ្វើអត្ដសញ្ញាណកម្មកំណត់ក្រ១ ក្រ២ និងលក្ខណៈពិការប្រភេទ១ ប្រភេទ២ ឲ្យបានច្បាស់ សូមឲ្យស្ថាប័នពាក់ព័ន្ធ ត្រូវបន្តសហការជាមួយនឹងគណៈកម្មការគ្រប់គ្រងរបបគោលនយោបាយ ចំពោះជនពិការនៃខេត្តគោលដៅ ក្នុងការពន្លឿនការធ្វើបច្ចុប្បន្នភាពជនពិការក្រីក្រនៅតាមសហគមន៍ខេត្តគោលដៅទាំង១២ សម្រាប់ឆ្នាំ២០១៩ ឲ្យបានមុនខែកុម្ភៈ ឆ្នាំ២០១៩ ខាងមុននេះ ។
ឯកឧត្តម សែម សុខា មានប្រសាសន៍យ៉ាងដូច្នេះ ក្នុងឱកាសបើកសិក្ខាសាលាថ្នាក់ជាតិ លើការអនុវត្តអនុក្រឹត្យលេខ១០៨ ស្តីពីការកំណត់អត្រា និងបែបបទជ្រើសរើសជនពិការចូលបំរើការងារ រសៀលថ្ងៃទី២៧ ខែវិច្ឆិកា ឆ្នាំ២០១៨ នៅក្រុងសៀមរាប ដោយមានការចូលរួមពីសំណាក់ប្រធាន និង អនុប្រធាន នៃមន្ទីរសង្គមកិច្ច អតីតយុទ្ធជននិងយុវនីតិសម្បទារាជធានី-ខេត្ត ទាំង២៥ និង តំណាងមកពីវិស័យឯកជន ។
ក្នុងឱកាសនោះដែរ ឯកឧត្តម សែម សុខា បានជំរុញឲ្យមន្ដ្រីមន្ទីរសង្គមកិច្ច អតីតយុទ្ធជន និងយុវនិតិសម្បទា ត្រូវសហការជាមួយមន្ទីរផែនការ មន្ទីរសុខាភិបាល ឬស្ថាប័នពាក់ព័ន្ធ ស្រង់ស្ថិតិជនពិការនៅតាមបណ្ដាស្រុកឃុំឲ្យអស់ ហើយធ្វើអត្ដសញ្ញាណកម្ម លើប្រភេទក្រីក្រ និងប្រភេទពិការឲ្យបានច្បាស់លាស់ ដើម្បីដោះស្រាយបញ្ហានានាជូនជនពិការប្រកបដោយប្រសិទ្ធភាព ជំរុញឲ្យសង្គមមួយដែលគ្មានឧបសគ្គសម្រាប់ជនពិការ ហើយជនពិការអាចរស់នៅប្រកបដោយភាពស្មើមុខស្មើមាត់ក្នុងសង្គម ដោយគ្មានការរើសអើង ដូចជាប្រជាពលរដ្ឋទូទៅដែរ ៕
អត្ថបទ និង រូបថត ៖ លោក ងិន គឹមឡេង និង លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
