នៅក្នុងបទបង្ហាញនៃកិច្ចប្រជុំគណៈកម្មការតាមដាននិងត្រួតពិនិត្យអ្នកជំនាញទេសចរណ៍អាស៊ាននៅខេត្តសៀមរាប នាព្រឹកថ្ងៃទី២៨ខែវិច្ឆិកាឆ្នាំ២០១៨នេះ លោក ទ្រី ឈីវ អគ្គនាយរងគ្រប់គ្រងឧស្សាហកម្មទេសចរណ៍ នៃក្រសួងទេសចរណ៍ បានមានប្រសាសន៍ថា បច្ចុប្បន្ននេះ កម្ពុជាត្រូវការធនធានមនុស្សដែលមានជំនាញជាច្រើនសម្រាប់បម្រើឱ្យវិស័យទេសចរណ៍ ក្នុងនោះអ្នកជំនាញផ្នែកស្ប៉ា និងសុខុមាលភាពភាព គឺកំពុងតែមានតម្រូវយ៉ាងច្រើន ។
ព្រោះសេវាកម្មមួយនេះកំពុងតែមានការពេញសម្រាប់អ្នកទេសចរ ខណៈកន្លងមក ក្រសួងទេសចរណ៍បានយកចិត្តទុកដាក់ ធ្វើការបណ្តុះបណ្តាលជំនាញបច្ចេកទេស និងបដិសណ្ឋារកិច្ច និងអ្នកជំនាញស្ប៉ា និងសុខុមាលភាព បានរាប់ពាន់នាក់រួចហើយ នៅតាមគោលដៅទេសចរណ៍សំខាន់ៗ ដើម្បីទទួលស្វាគមន៍ភ្ញៀវទេសចរជាតិ និងអន្តរជាតិ ដោយផ្តល់សេវាកម្មប្រកបដោយភាពពេញចិត្ត និងក្រមសីលធម៌វិជ្ជាជីវៈខ្ពស់ ។
លោក ទ្រី ឈីវ បានសង្ឃឹមថា នៅកិច្ចប្រជុំពិសេសនេះ នឹងជំរុញការបណ្តុះបណ្តាលជំនាញថ្មីៗបន្ថែមទៀត ដល់អ្នកកំពុងបម្រើការងារក្នុងសេវាកម្មស្ប៉ា និងសុខុមាលភាព ឲ្យស្របតាមស្តង់ដាអាស៊ាន ទាំងទ្រឹស្តី និងការអនុវត្តផ្ទាល់ ពីលើជំនាញដែលមានស្រាប់ ។
ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានមានប្រសាសន៍ថា កិច្ចប្រជុំពិសេសនៃគណៈកម្មការតាមដាន និងត្រួតពិនិត្យអ្នកជំនាញទេសចរណ៍អាស៊ាននៅពេលនេះ នឹងពិភាក្សាបញ្ចប់លើពង្រាងស្តង់ដាបណ្តុះបណ្តាលស្ប៉ា និងសុខុមាលភាពអាស៊ាន ដែលកម្ពុជាទទួលបន្ទុករៀបចំក្នុងការបង្កើតស្តង់ដាកម្មវិធីបណ្តុះបណ្តាលរួមរបស់អាស៊ាន ព្រមទាំងលើកកម្ពស់ការបណ្តុះបណ្តាលដល់អ្នកជំនាញវិជ្ជាជីវៈស្ប៉ា និងសុខុមាលភាព និងផ្តល់ជំនាញបន្ថែមដល់អ្នកជំនាញស្ប៉ា ស្របតាមស្តង់ដាជាតិ-អាស៊ាន ដែលឆ្លើយតបទៅនឹងស្តង់ដារួមក្នុងតំបន់។
ឯកឧត្តម បានមានប្រសាសន៍ទៀតថា បើតាមផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ ឆ្នាំ២០២០ នឹងសម្រេចបាននូវការងារបណ្តុះបណ្តាល និងវាយតម្លៃ អ្នកជំនាញទេសចរណ៍កម្ពុជាបានចំនួន៥០ភាគរយ ស្របតាមស្តង់ដាជាតិ និងអាស៊ាន ឆ្នាំ២០២៥ នឹងសម្រេចបាននូវការងារបណ្តុះបណ្តាល និងវាយតម្លៃ អ្នកជំនាញទេសចរណ៍កម្ពុជា បានចំនួន១០០ភាគរយ ដោយចូលរួមសម្រេចយុទ្ធនាការផ្សព្វផ្សាយ “បុគ្គលិកម្នាក់ ជំនាញមួយ” ហើយជាមួយនឹងកំណើនទេសចរជាតិ និងអន្តរជាតិ ដ៏ខ្លាំងក្លានាប៉ុន្មានឆ្នាំចុងក្រោយនេះ វិស័យទេសចរណ៍ បានបង្កើតការងារផ្ទាល់បានប្រមាណ ៦២ ម៉ឺននាក់ ស្មើនឹង១៣ភាគរយ នៃការងារសរុប និងនៅក្នុងឆ្នាំ២០២០ នឹងបង្កើតការងារផ្ទាល់បានប្រមាណ ជិត១លាននាក់ នៅឆ្នាំ២០២៥ ប្រមាណ ១,២លាននាក់ និងនៅឆ្នាំ២០៣០ បានចំនួន ២លាននាក់ ដោយមិនគិតពីការងារដោយប្រយោល រាប់សិបម៉ឺននាក់ទៀត៕
អត្ថបទ និង រូបថត ៖ លោក ទ្រា ពន្លឺ និង លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
