នៅព្រឹកថ្ងៃ២៩ ខែវិច្ឆិកា ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញដឹកនាំគណៈប្រតិភូជាន់ខ្ពស់កម្ពុជា ទៅបំពេញទស្សនកិច្ចផ្លូវការ និងចូលរួមកិច្ចប្រជុំកំពូលអាស៊ី-ប៉ាស៊ីហ្វិកឆ្នាំ២០១៨ នៅទីក្រុងកដ្ឋមណ្ឌូ នៃសាធារណរដ្ឋសហព័ន្ធប្រជាធិបតេយ្យ នេប៉ាល់ ចាប់ពីថ្ងៃទី ៣០ វិច្ឆិកា-០២ ខែធ្នូ ២០១៨។
យោងតាមសេចក្ដីជូនដំណឹង របស់ក្រសួងការបរទេស និងសហប្រតិបត្តិការកម្ពុជា បានបង្ហាញថា តបតាមការអញ្ជើញរបស់ លោក ខាតហ្គា ប្រាសាទ សាម៉ាអូលី នាយករដ្ឋមន្ត្រី នៃសាធារណរដ្ឋសហព័ន្ធប្រជាធិបតេយ្យ នេប៉ាល់ សម្ដេចតេជោ ហ៊ុនសែន នឹងអញ្ជើញធ្វើទស្សនកិច្ចជាផ្លូវការ នៅក្នុងប្រទេសនេប៉ាល់ ចាប់ពីថ្ងៃទី ២៩ ដល់ថ្ងៃទី ៣០ ខែវិច្ឆិកាឆ្នាំ ២០១៨។ នៅក្នុងទស្សនកិច្ចនេះ សម្ដេចតេជោ ហ៊ុន សែន នឹងជួបសម្ដែងការគួរសមជាមួយ អ្នកស្រី បីតយ៉ាដេវី ប៉ាដេវី ប្រធានាធិបតី នៃសាធារណរដ្ឋសហព័ន្ធប្រជាធិបតេយ្យ នេប៉ាល់។
ដោយឡែក សម្ដេចក៏នឹងមានជំនួបទ្វេរភាគីផងដែរ ជាមួយ លោក ខាតហ្គា ប្រាសាទ សាម៉ាអូលី នាយករដ្ឋមន្ត្រី នៃសាធារណរដ្ឋសហព័ន្ធប្រជាធិបតេយ្យ នេប៉ាល់ ដែលក្នុងជំនួបនេះ សម្ដេចតេជោ ហ៊ុន សែន នឹងមានវត្តមានជាអធិបតី ក្នុងការចុះហត្ថលេខា ទៅលើឯកសារសំខាន់ៗ នៃកិច្ចសហប្រតិបត្តិការរវាងប្រទេសកម្ពុជានិងនេប៉ាល់។
ក្រៅពី ការអញ្ជើញទស្សនកិច្ចផ្លូវការនៅប្រទេសនេប៉ាល់ សម្ដេចតេជោ ហ៊ុន សែន នឹងចូលរួមកិច្ចប្រជុំកំពូលអាស៊ី-ប៉ាស៊ីហ្វិកឆ្នាំ២០១៨ ដែលក្នុងកិច្ចប្រជុំនោះ សម្ដេចនឹងថ្លែងសន្ទរកថា អំពីសារសំខាន់ នៃកិច្ចប្រជុំកំពូលអាស៊ី-ប៉ាស៊ីហ្វិកឆ្នាំ២០១៨ លើប្រធានបទ“ការដោះស្រាយបញ្ហាប្រឈមសំខាន់ៗ នៃយុគសម័យរបស់យើង ការរំពឹងប្រាស្រ័យគ្នា វិបុលភាពទៅវិញទៅមក និងតម្លៃជាសាកល”។
ក្នុងដំណើរទស្សនកិច្ចផ្លូវការនេះ សម្ដេចតេជោនាយករដ្ឋមន្ត្រី នឹងអញ្ជើញទៅទស្សនាទីប្រជុំជនបុរាណ ប៉ាតាន់ ឌូបា របស់ប្រទេសនេប៉ាល់ ដែលជារមណីយដ្ឋាន ត្រូវបានដាក់បញ្ចូលទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូផងដែរ។
អត្ថបទ៖ លោក សេង ផល្លី
