សមត្ថកិច្ចនគរបាលខេត្តសៀមរាប បានឲ្យដឹងថា បន្ទាប់ពីបានទទួលព័ត៌មានពីក្មេងៗដើរឆ្លុះកង្កែបដែលបានប្រាប់នៅវេលាម៉ោង២០និង៣០នាទី ថ្ងៃទី២៨ ខែវិច្ឆិកា ឆ្នាំ២០១៨ ថាមានជនបរទេសស្លាប់នៅចំណុចគោកតាប៉ះ ស្ថិតក្នុងភូមិតាស្រី ឃុំសែនសុខ ស្រុកក្រឡាញ់ ចម្ងាយពីថ្នល់ជាតិប្រមាណ៣០០ម៉ែត្រ។
កងកម្លាំងនគរបាលនៃអធិការស្រុកក្រឡាញ់ បានសហការជាមួយកម្លាំងនគរបាលការិយាល័យជំនាញ នៃស្នងការនគរបាលខេត្ត ចុះទៅដល់កន្លែងកើតហេតុ បានពិនិត្យឃើញថា សាកសពឈ្មោះ Li SIHO ភេទប្រុស អាយុ៥៤ ឆ្នាំជនជាតិកូរ៉េ ប៉ុន្តែលិខិតឆ្លងដែនមិននៅជាប់ខ្លួននោះទេ ដែលបានស្នាក់នៅបន្ទប់ជួលស្ថិតក្នុងភូមិគ្រួស សង្កាត់ស្វាយដង្គំ ក្រុងសៀមរាប បានជិះរថយន្តម៉ាកAtoz ពណ៌ខៀវ ពាក់ស្លាកលេខ ៖ ភ្នំពេញ 2k-2986 ទៅចង-កសម្លាប់ខ្លួន ។
សមត្ថកិច្ចនគរបាលខេត្តសៀមរាប បានឲ្យដឹងទៀតថា តាមការពិនិត្យនិងសន្និដ្ឋានរបស់នគរបាលការិល័យបច្ចេកទេស និងកោសល្យវិច្ឆ័យ បានបញ្ជាក់ថា ជនរងគ្រោះបានស្លាប់នាវេលាម៉ោង ប្រហែល៥ល្ងាច បានធ្វើអត្តឃាតដោយចង-កសម្លាប់ខ្លួន ប៉ុន្តែចំពោះមូលហេតុដែលជនរងគ្រោះសម្លាប់ខ្លួននេះ សមត្ថកិច្ចកំពុងស្រាវជ្រាវបន្ត ហើយសាកសព ត្រូវកម្លាំងសមត្ថកិច្ច យកមករក្សាទុកបណ្តោះអាសន្ននៅមន្ទីរពេទ្យបង្អែកខេត្តសៀមរាប រង់ចាំឯកសារពីស្ថានទូត ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
