នៅព្រឹកថ្ងៃទី២៨ ខែវិច្ឆិកា ឆ្នាំ២០១៨ម្សិលមិញនេះ មន្ត្រីក្រុមលេខាធិការដ្ឋាន នៃអនុគណៈកម្មការសុវត្ថិភាពចរាចរណ៍ផ្លូវគោក សហការជាមួយអង្គភាពនគរបាលចរាចរណ៍ផ្លូវគោកខេត្តសៀមរាប បានចុះផ្សព្វផ្សាយច្បាប់ស្តីពីចរាចរណ៍ផ្លូវគោក នៅគោលដៅរង្វង់មូលវត្តដំណាក់ ក្នុងសង្កាត់សាលាកំរើក ក្រុងសៀមរាប ដោយមានកម្មវិធីសួរសំណួរយកមួកសុវត្ថិភាព និងចែកខិត្តបណ្ណ ដែលពាក់ព័ន្ធនឹងច្បាប់ចរាចរណ៍ផ្លូវគោក ។
តាមរយៈនៃសកម្មភាពនេះ ក្រុមមន្ត្រីបានចែកនូវផ្ទាំងរូបភាពសញ្ញាចរាចរណ៍សំខាន់ៗចំនួន១០សន្លឹក , សៀវភៅអ្នកបើកបរទោចក្រយានយន្តត្រូវយល់ដឹងចំនួន ១៥០ក្បាល , សៀវភៅផ្លាកសញ្ញាចរាចរណ៍ចំនួន ០២ក្បាល , សៀវភៅច្បាប់ស្តីពីចរាចរណ៍ផ្លូវគោកចំនួន ២៥ក្បាល , ផ្ទាំងរូបភាពសម្រាប់អ្នកថ្មើរជើងចំនួន ១០សន្លឹក , ស្ទីកឃ័រចំណាំងផ្លាតចំនួន១០០សន្លឹក និង ខិត្តបណ្ណជំនួយស្មារតី ស្ដីពីច្បាប់ចរាចរណ៍ផ្លូវគោកសម្រាប់ផ្សព្វផ្សាយប្រការសំខាន់ៗ ដែលត្រូវចងចាំចំពោះអ្នកប្រើប្រាស់ផ្លូវចំនួន ៣០០សន្លឹក ៕
អត្ថបទ និង រូបថត ៖ អនុគណៈកម្មការសុវត្ថិភាពចរាចរណ៍ផ្លូវគោក
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
