ឯកឧត្តម ម៉ី ម៉ារ៉ាឌី ទីប្រឹក្សាអាជ្ញាធរជាតិអប្សរា និង ជាប្រធានគម្រោងអភិវឌ្ឍន៍ភូមិធម្មជាតិរុនតាឯក បានមានប្រសាសន៍ថា កាលពីថ្ងៃទី២៨ ខែវិច្ឆិកា ឆ្នាំ២០១៨ កន្លងទៅនេះ ភូមិធម្មជាតិរុនតាឯក ទទួលបានពានរង្វាន់ «សហគមន៍ទេសចរណ៍គំរូភូមិធម្មជាតិរុនតាឯក» ដែលជាពានរង្វាន់ថ្មី រៀបចំឡើងដោយក្រសួងទេសចរណ៍ នៃព្រះរាជាណាចក្រកម្ពុជា នៅក្នុងសិក្ខាសាលាបូកសរុប ការប្រឡងប្រណាំងរមណីយដ្ឋានទេសចរណ៍គំរូលើកទី២ និង ការប្រឡងប្រណាំងសហគមន៍ទេសចរណ៍ និងអេកូទេសចរណ៍គំរូលើកទី១ ឆ្នាំ២០១៨ នៅសណ្ឋាគារភ្នំពេញ ក្រោមអធិបតីភាពឯកឧត្តម ថោង ខុន រដ្ឋមន្ត្រីក្រសួងទេសចរណ៍។
ឯកឧត្តម មានប្រសាសន៍ទៀតថា មុននឹងទទួលបានពានរង្វាន់នេះ គឺក្រុមការងារដឹកនាំគម្រោងអភិវឌ្ឍន៍ភូមិធម្មជាតិរុនតាឯក បានទទួលដំណឹងអំពីការប្រកួតប្រជែងនេះ និងដោយពិនិត្យឃើញកត្តាសមស្របរបស់ភូមិធម្មជាតិរុនតាឯកនោះ ក្រុមការងារក៏បានដាក់ពាក្យទៅក្រសួងទេសចរណ៍ដើម្បីចូលរួម ហើយក្រោយមានការត្រួតពិនិត្យបច្ចេកទេសរួចមក មន្ទីរទេសចរណ៍ខេត្តសៀមរាប បានចុះមកធ្វើការត្រួតពិនិត្យ និងវាយតម្លៃជំហានដំបូង ខណៈដែលការវាយតម្លៃនោះឃើញថា ភូមិធម្មជាតិរុនតាឯក ពិតជាមានបរិស្ថានល្អ ស្អាត អនាម័យខ្ពស់ មានផ្ទះស្នាក់ មានអាហារដ្ឋាន សៀវភៅមុខម្ហូបពុំមានប្រភេទគ្រឿងស្រវឹង និងបារី ថែមទាំងសកម្មភាពកសិកម្មពុំមានវត្តមានសារជាតិគីមី ហើយភូមិធម្មជាតិរុនតាឯកក៏មានការគាំទ្រពីក្រសួងវប្បធម៌ និងវិចិត្រសិល្បៈ អាជ្ញាធរជាតិអប្សរា អាជ្ញាធរភូមិ ឃុំ/ស្រុកបន្ទាយស្រី និងអង្គការ GIZ ដែលគាំទ្រលើការបណ្តុះបណ្តាល និងបច្ចេកទេសផ្សេងៗ ក៏ដូចជាអង្គការ EDOTA ដែលធ្វើការលើការលើកស្ទួយផ្សព្វផ្សាយវិស័យទេសចរណ៍ប្រចាំស្រុកបន្ទាយស្រីផងដែរ។
ឯកឧត្តម ម៉ី ម៉ារ៉ាឌី បញ្ជាក់ទៀតថា កម្មវិធីប្រកួតប្រជែងនេះ ធ្វើឡើងដើម្បីបង្កើតស្តង់ដារសហគមន៍ទេសចរណ៍កម្ពុជា ដោយផ្អែកលើគោលបំណងបួនសំខាន់គឺ៖ ទី១. តាមដាន ត្រួតពិនិត្យ និងវាយតម្លៃការអភិវឌ្ឍសហគមន៍ទេសចរណ៍កម្ពុជា , ទី២. ពង្រឹងការគ្រប់គ្រងសហគមន៍ទេសចរណ៍ប្រកបដោយនិរន្តរភាព គុណភាព ប្រសិទ្ធភាព និងការទទួលខុសត្រូវ , ទី៣. ជំរុញនិងលើកទឹកចិត្តឱ្យមានការចូលរួមពីប្រជាពលរដ្ឋសហគមន៍មូលដ្ឋាន និង ទី៤. ពង្រឹងនិងពង្រីកការជឿទុកចិត្តទៅលើសហគមន៍ទេសចរណ៍ពីគ្រប់ភាគីពាក់ព័ន្ធទាំងអស់។
សូមបញ្ជាក់ដែរថា កន្លងមកភូមិធម្មជាតិរុនតាឯកក៏ធ្លាប់បានទទួលពានរង្វាន់ចំនួន០៤មកហើយនាឆ្នាំ២០១៥-២០១៧ ដូចជា ពានរង្វាន់សុខុមាលភាពសង្គមនិងបេតិកភណ្ឌវប្បធម៌ , ពានរង្វាន់អនាម័យ និងបរិស្ថាន , ពានរង្វាន់ពិសេសរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ពានរង្វាន់ ASEAN Homestay Standard (2017-2019)៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ភូមិធម្មជាតិរុនតាឯក
