នៅព្រឹកថ្ងៃទី០១ ខែធ្នូ ឆ្នាំ២០១៨ព្រឹកមិញនេះ កម្មវិធីប្រណាំងកង់ដើម្បីកុមារលើកទី១៣ ដែលជាព្រឹត្តិការណ៍មនុស្សធម៌ និងទេសចរណ៍ និងជាព្រឹត្តិការណ៍ប្រចាំឆ្នាំនៅខេត្តសៀមរាប បានចាប់ដំណើរការហើយ នៅព្រះលានជល់ដំរី ក្នុងបរិវេណប្រាសាទបាយ័ន ដែលជាតំបន់វប្បធម៌ប្រវត្តិសាស្រ្ត នៃឧទ្យានអង្គរ ដោយមានភ្ញៀវជាតិនិងអន្តរជាតិចំនួន៥០២នាក់ បានចូលរួម ក្នុងនេះកីឡាករ កីឡាការិនីជាតិមានចំនួន ៣៦៣នាក់ កីឡាករ កីឡាការិនីអន្តរជាតិ ១៣៩នាក់ ដោយបែងចែកជា៣ប្រភេទចម្ងាយ គឺ ជិះកង់ជាលក្ខណៈគ្រួសារក្នុងចម្ងាយ ១៧ គីឡូម៉ែត្រ ប្រណាំងកង់ជាលក្ខណៈមិត្តភាព ក្នុងចម្ងាយ ៣៧គីឡូម៉ែត្រ និងចម្ងាយ ១១៧គីឡូម៉ែត្រ ។
ថ្លែងក្នុងឱកាសបើកកម្មវិធីនេះ លោក ពៅ ពិសិដ្ឋ អភិបាលរងខេត្តសៀមរាប បានបញ្ជាក់ថា តាមរយៈនៃព្រឹត្តិការណ៍មួយនេះ គឺជាការផ្សព្វផ្សាយតំបន់ទេសចរណ៍ដ៏មានសក្តានុពលនៃកម្ពុជា និង លើកស្ទួយមុខមាត់ប្រទេសជាតិទៅកាន់ពិភពលោក ជាសំខាន់ គឺបានរួមចំណែកលើកស្ទួយវិស័យកីឡាកម្ពុជា តាមរយៈការជិះកង់កំសាន្តជាលក្ខណៈគ្រួសារ ជាលក្ខណៈមិត្តភាព និង ដើម្បីប្រមូលថវិកា ដែលនៅសល់ពីការចំណាយលើកម្មវិធី ជួយដល់កុមារនិងស្រ្តី ដែលរស់នៅក្នុងពន្ធនាគារ តាមរយៈអង្គការមនុស្សធម៌ដើម្បីកុមារនិងស្រ្តី ( IL NODO ) ជាពិសេសទោចក្រយានចំនួន៧០គ្រឿង ត្រូវបានចែកជូនដល់សិស្សក្រីក្រ ដែលនេះគឺជាផ្នែកមួយនៃការលើកកម្ពស់ និង ជំរុញការសិក្សារបស់កុមារដែលមានជីវភាពខ្វះខាតក្នុងគ្រួសារ ឲ្យមានឱកាស និងលទ្ធភាពបានបន្តការសិក្សារបស់ខ្លួន ដូចកុមារទូទៅផងដែរ ។
សូមបញ្ជាក់ថា កម្មវិធីប្រណាំងកង់ដើម្បីកុមារលើកទី១៣ នៅអង្គរវត្តនេះ សហការរៀបចំឡើងរវាងអង្គការមនុស្សធម៌ដើម្បីកុមារនិងស្រ្តី ( IL NODO ) និង សហភាពសហព័ន្ធយុវជនកម្ពុជាខេត្តសៀមរាប ដែលគាំទ្រដោយក្រសួងទេសចរណ៍ អាជ្ញាធរខេត្តសៀមរាប អាជ្ញាធរជាតិអប្សរា និងឧបត្ថម្ភធំដោយក្រុមហ៊ុន Khmer Beverager ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
