ឯកឧត្តម ឡេង វី រដ្ឋលេខាធិការក្រសួងមហាផ្ទៃ បានមាន ប្រសាសន៍ថា ប៉ុន្មានឆ្នាំកន្លងមកនេះ កម្ពុជាបានក្លាយជាគោលដៅរបស់វិនិយោគិនជប៉ុន ដែលបច្ចុប្បន្នមានក្រុមហ៊ុនជប៉ុនប្រមាណជា២០០ កំពុងប្រតិបត្តិការនៅកម្ពុជា ហើយទំនាក់ទំនងពាណិជ្ជកម្មទ្វេភាគីមានប្រមាណ ១.៥កោដិដុល្លារសហរដ្ឋអាមេរិកនៅក្នុងឆ្នាំ២០១៦ ក្នុងនោះការនាំចេញពីកម្ពុជាមានប្រមាណជា ១.២កោដិដុល្លាសហរដ្ឋអាមេរិក និងក្នុងរយៈពេល១១ខែ ដើមឆ្នាំ២០១៧ ទំហំពាណិជ្ជកម្មមានប្រមាណ ១.៥កោដិដុល្លារសហរដ្ឋអាមេរិក ។
ឯកឧត្តម ឡេង វី មានប្រសាសន៍ទៀតថា ជាក់ស្តែងនៅឆ្នាំ២០១៣ ប្រទេសទាំងពីរបានបង្កើតភាពជាដៃគូ ក្នុងកម្រិតដៃគូជាយុទ្ធសាស្រ្ត នៅចំឆ្នាំខួបទី៦០ នៃចំណងការទូត ហើយសម្រាប់ដោយឡែកក្នុងកម្រិតកំរឹតអាស៊ាន-ជប៉ុន ក៏បានដើរតួនាទីជាចម្បងក្នុងនាមជាមិត្តភ័ក្តិល្អ ជាដៃគូ និង ជាអ្នកគាំទ្រដល់យន្តការនានា ដើម្បីពង្រឹងសមត្ថភាពផលិត និងទីផ្សារអាស៊ាន ក៏ស្ថិតក្នុងបេសកកម្មផងដែរ ជំរុញឲ្យការធ្វើសមាហរណកម្មអាស៊ានទាំងចាស់ទាំងថ្មី និង អាស៊ាន-ជប៉ុន ប្រកបដោយជោគជ័យ ។
ឯកឧត្តម ឡេង វី មានប្រសាសន៍យ៉ាងដូច្នេះ នៅក្នុងឱកាសបើកអង្គវេទិកាអ្នកដឹកនាំតំបន់លើកទី២៤ របស់សមាគម អតីតកម្មសិក្សាការី ចាយកា- កម្ពុជា នាព្រឹកថ្ងៃទី៣០ ខែវិច្ឆិកា ឆ្នាំ២០១៨ នៅក្រុងសៀមរាប ក្រោមប្រធានបទ ទេសចរណ៍បៃតង ដែលអង្គវេទិកានេះ ជាវេនរបស់សមាគមអតីតកម្មសិក្សាការី ចាយកា-កម្ពុជា ក្រោមកិច្ចសហការដោយសមាគមមិត្តភាព ជប៉ុន-អាស៊ាន សតវត្សរ៍ទី២១ ។
ព័ត៌មានជាតិ ថ្មីៗ
សូមបញ្ជាក់ថា វេទិកាអ្នកដឹកនាំតំបន់ ជារបៀបវារៈមួយក្នុងចំណោមរបៀបវារៈផ្សេងទៀត របស់សមាគមមិត្តភាពអាស៊ាន-ជប៉ុនសតវត្សរ៍ទី២១ ត្រូវបានរៀបចំឡើងដោយសមាគមនៃប្រទេសសាម៉ីជាសមាជិក ដែលដើរតួនាទីផ្លាស់វេនគ្នា តាមអក្ខរក្រមនៃឈ្មោះប្រទេសនីមួយៗ និង បានការចូលរួមពីបណ្តាសមាគមអតីតកម្មសិក្សាការី ចាយកា នៃបណ្តាប្រទេសអាស៊ានទាំង១០ ដើម្បីរៀបចំដំណើរការអង្គប្រជុំពិភាក្សា សំដៅស្វែងរកដំណោះស្រាយ លើបញ្ហាប្រឈមរួមនានា ដែលប្រទេសជាសមាជិកកំពុងជួបប្រទះ ជាពិសេសការប្រឈមរបស់បណ្តាប្រទេសក្នុងសហមាគមន៍ប្រជាជាតិអាស៊ីអាគ្នេយ៍ ។
អង្គវេទិកាតំបន់លើកទី២៤ ក្រោមប្រធានបទ ទេសចរណ៍បៃតងនេះ គឺស្របតាមនិន្នាការប្រឈមនៃការប្រែប្រួលអាកាសធាតុ ដែលអ្នកដឹកនាំពិភពលោកកំពុងខ្វល់ខ្វាយរកដំណោះស្រាយ ហើយវេទិកានេះ គឺជាយន្តការមួយទៀត ដែលជាការគាំទ្ររបស់ប្រទេសជប៉ុន ចំពោះកិច្ចដំណើរការធ្វើឲ្យកាន់តែប្រសើរឡើងនៃទំនាក់ទំនង ជប៉ុន-អាស៊ាន ៕
អត្ថបទ និង រូបថត ៖ លោក ងិន គឹមឡេង និង លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
