លោក ពៅ សារាវុធ អភិបាលរងក្រុងសៀមរាប បានឲ្យដឹងថា បន្ទាប់ពីមានការណែនាំ និង ផ្សព្វផ្សាយ ស្តីពីការរៀបចំសណ្តាប់សម្អាតបរិស្ថាន អនាម័យ នៅលើទីតាំងលក់ដូរបណ្តោះអាសន្ននៅមុខផ្សារ តាមផ្លូវជុំវិញផ្សារ និងតាមដងផ្លូវធំមុខផ្សារសម្តេចតេជោ ហ៊ុន សែន ដើមក្រឡាញ់ ព្រមទាំងបានអំពាវនាវឲ្យមានកិច្ចចូលរួមសហការពីសំណាក់បងប្អូនអាជីវករផងនោះ ដែលបានធ្វើឡើងក្នុងតំណាក់ការចុងក្រោយ ដោយអាជ្ញាធរក្រុងសៀមរាប នាព្រឹកថ្ងៃទី០១ ខែធ្នូកន្លងមកនេះ គឺនៅថ្ងៃទី០២ ខែធ្នូ ឆ្នាំ២០១៨នេះ បងប្អូនអាជីវករទាំងអស់ បានព្រមព្រៀងបញ្ឈប់ការលក់ដូរនៅមុខទីតាំងផ្សារនេះទៀតហើយ ។
លោក ពៅ សារាវុធ បានបញ្ជាក់ទៀតថា ការកែប្រែមុខមាត់ផ្សារសម្តេចតេជោ ហ៊ុន សែន ដើមក្រឡាញ់ ចេញពីសោភ័ណភាព សណ្តាប់ធ្នាប់ បរិស្ថាន និង អនាម័យមិនល្អ មិនមានការទទួលខុសត្រូវចំពោះការប៉ះពាល់សុខុមាលភាព ដោយសារតែការលក់ដូរលើទីតាំងបណ្តោះអាសន្ន នាំឲ្យមានការកកស្ទះចរាចរណ៍ជាប្រចាំ ដោយសារតែការដាក់តាំងលក់ដូររំលោភលើចំណីផ្លូវ ដែលកើតមានឡើងអស់រយៈពេលប្រហែលជាជិត២ឆ្នាំកន្លងមកនេះ ដែលវាជាបញ្ហាស្មុគស្មាញពិបាកនឹងដោះស្រាយ បើសិនជាគ្មានកិច្ចសហការពីសំណាក់បងប្អូនជាជីវករអ្នកលក់ដូរនៅទីនោះ ដូច្នេះក្នុងឱកាសនេះ ក្នុងនាមអាជ្ញាធរក្រុង សូមថ្លែងអំណរគុណដល់បងប្អូនជាជីវករអ្នកលក់ដូរ ដែលបានសហការជាមួយអាជ្ញាធរក្នុងការរៀបចំសណ្តាប់ធ្នាប់ បរិស្ថាន និង អនាម័យនៃផ្សារសម្តេចតេជោ ហ៊ុន សែន ដើមក្រឡាញ់នេះ ។
លោក សុខ តុញ ប្រធានគណៈកម្មការគ្រប់គ្រងផ្សារសម្តេចតេជោ ហ៊ុន សែន ដើមក្រឡាញ់ បានឲ្យដឹងថា បើតាមគម្រោងប្លង់សាងសង់សង់ផ្សារសម្តេចតេជោ ហ៊ុន សែន ដើមក្រឡាញ់ លើទីតាំងមុខផ្សារ ដែលបានអនុញ្ញាតឲ្យបងប្អូនអ្នកលក់ដូរប្រើប្រាស់បណ្តោះអាសន្ននោះ គឺជាទីលានចំណតរថយន្ត ហើយផ្លូវជុំវិញផ្សារ ក៏ត្រូវបានស្ថិតក្នុងគម្រោងចាក់ក្រាលបេតុងទទឹង៦ម៉ែត្រ ដែលអាចឲ្យរថយន្តពន្លត់អគ្គីភ័យចូលប្រតិបត្តិការបាន ក្នុងករណីមានបញ្ហាកើតឡើងជាយថាហេតុ និងផ្លូវ១ខ្សែទៀត ស្ថិតនៅខាងកើតផ្សារ ដែលអាជីវករប្រើប្រាស់លក់ដូរបណ្តោះអាសន្នដែរនោះ ក៏តម្រូវឲ្យរុះរើចេញហើយត្រូវចូលទៅលក់ដូរនៅក្នុងផ្សារ ដើម្បីបានជួសជុលផ្លូវនោះ សងប្រគល់ឲ្យអាជ្ញាធរក្រុងគ្រប់គ្រងប្រើប្រាស់ជាផ្លូវសាធារណៈរបស់រដ្ឋវិញ ខណៈផ្លូវមួយខ្សែនោះ ស្ថិតក្នុងគម្រោងចាក់ក្រាលបេតុងរបស់អាជ្ញាធរក្រុងសៀមរាប ដែលបច្ចុប្បន្ននៅជាផ្លូវក្រាលដីគ្រួសក្រហមនៅឡើយ ។
គួរំលឹកដែរថា មុនការសាងសង់ថ្មីនេះ ផ្សារដើមក្រឡាញ់ត្រូវភ្លើងឆាបឆេះអស់ទាំងស្រុង កាលពីវេលាទៀបភ្លឺ ថ្ងៃទី០៦ ខែកក្កដា ឆ្នាំ២០១៣ ដូចនេះការសាងសង់ថ្មីនេះ រួមទាំងការរៀបចំសណ្តាប់ធ្នាប់ផងដែរ តម្រូវឲ្យមានលក្ខណៈក្នុងទម្រង់នៃច្បាប់បង្ការហានីភ័យទាំងនោះផងដែរ ជាពិសេសគណៈកម្មការផ្សារ មានគម្រោងកសាងផ្សារសម្តេចតេជោ ហ៊ុន សែន ដើមក្រឡាញ់ ឲ្យស្ថិតក្នុងលំដាប់ជាផ្សារគំរូនៅក្នុងខេត្តសៀមរាប នាពេលអនាគត ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ផ្សារសម្តេចតេជោហ៊ុនសែនដើមក្រឡាញ់
