សមត្ថកិច្ចនគរបាលជំនាញខេត្តសៀមរាប បានឲ្យដឹងថា បន្ទាប់ពីបានទទួលពត៌មានពីបុគ្គលិកសណ្ឋាគារថា នៅ វេលាម៉ោងប្រហែល០៨និង៥០នាទីព្រឹក ថ្ងៃទី៣០ ខែវិច្ឆិកា ឆ្នាំ២០១៨ មានជនបរទេសម្នាក់បានដេកស្លាប់នៅក្នុងបន្ទប់សណ្ឋាគាររួចមក ភ្លាមៗនោះ កម្លាំងនគរបាលបានចុះទៅដល់កន្លែងកើតហេតុ ដើម្បីធ្វើការពិនិត្យ ។
ផ្អែកតាមការពិនិត្យបានឲ្យដឹងថា ជនរងគ្រោះមានឈ្មោះ MILLS KYLE ROBERT ភេទប្រុស កើតឆ្នាំ១៩៩២ ជនជាតិអាមេរិក កាន់លិខិតឆ្លងដែន លេខ ៥៨៩០៩៨១៨៧ ជាភ្ញៀវទេសចរណ៍ ចូលមកព្រះរាជាណាចក្រកម្ពុជាកាលពីថ្ងៃទី២៧ ខែ វិច្ឆិកាឆ្នាំ២០១៨ តាមច្រកព្រលានយន្តហោះអន្តរជាតិសៀមរាប ស្នាក់នៅបន្ទប់លេខ៣២១ នៃសណ្ឋាគារ Lub-D ស្ថិតក្នុងក្រុមទី៧ ភូមិវត្តបូព៌ សង្កាត់សាលាកំរើក ក្រុងសៀមរាប ។
ក្រោយការពិនិត្យ និងស្រាវជ្រាវរបស់សមត្ថកិច្ចជំនាញ និង លោកវេជ្ជបណ្ឌិត អ៊ិតឆប ឆរ័ត្ន គ្រូពេទ្យអមតុលាការខេត្តបានសន្និដ្ឋានថា ជនរងគ្រោះស្លាប់ ដោយសារការប្រើថ្នាំងងុយដេកច្រើន បណ្តាលឲ្យគាំងបេះដូង ហើយសាកសពត្រូវបានយកទៅតម្កល់ទុកនៅមន្ទីរពេទ្យមិត្តភាពខ្មែរសូវៀត រាជធានីភ្នំពេញតាមសំណូមពររបស់តំណាងស្ថានទូត ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
