កាលពីព្រឹកថ្ងៃទី៣០ ខែវិច្ឆិកា ឆ្នាំ២០១៨ នេះ គណៈកម្មការចម្រុះខេត្តសៀមរាប ដឹកនាំរបស់លោក នួន ពុទ្ធារ៉ា អភិបាលក្រុងសៀមរាប ដោយមានការនិមន្ត អញ្ជើញចូលរួមពីព្រះគ្រូចៅអធិការវត្តអារញ្ញសាគរ អាជ្ញាធរមូលដ្ឋាន មន្ត្រីមន្ទីរ អង្គភាពជំនាញមានការពាក់ព័ន្ធ និងប្រជាពលរដ្ឋផងដែរ បានធ្វើការបើកផ្លូវសាធារណៈមួយខ្សែ ជាផ្លូវរទេះចាស់ មានបណ្តោយប្រវែង២៥ម៉ែត្រ និង ទទឹងប្រវែង៣ម៉ែត្រ ស្ថិតនៅក្នុងភូមិអារញ្ញ សង្កាត់សៀមរាប ក្រុងសៀមរាប ជូនដល់ការធ្វើដំណើររបស់ប្រជាពលរដ្ឋវិញ បន្ទាប់ពីពលរដ្ឋម្នាក់បានធ្វើរបងបិទអស់រយៈពេល១៥ឆ្នាំកន្លងមក ។
លោក នួន ពុទ្ធារ៉ា បានឲ្យដឹងថា ការបិទផ្លូវនេះ ត្រូវបានប្រជាពលរដ្ឋដែលរស់នៅអាស្រ័យដោយធ្វើដំណើរចេញចូលផ្លូវនេះ បានដាក់ពាក្យបណ្តឹងប្ដឹងឈ្មោះ ដឿន សំអឿន ដែលបានបិទអស់រយៈពេល ១៥ឆ្នាំមកហើយ ហើយអាជ្ញាធរក្រុងសៀមរាប បានធ្វើលិខិតជូនដំណឹងជូនដល់ឈ្មោះ ដឿន សំអឿន ដែលជាតំណាងឲ្យឈ្មោះ ហ៊ិន គា ដែលបានស្លាប់នោះ ធ្វើការរុះរើរបងពីផ្លូវនេះចេញ ជាច្រើនលើកមកហើយ ប៉ុន្តែនៅតែមិនព្រមរុះរើបើកផ្លូវឲ្យបងប្អូនប្រជាពលរដ្ឋខាងក្រោយបានធ្វើដំណើរឡើយ ។
លោក នួន ពុទ្ធារ៉ា បានឲ្យដឹងទៀតថា ដើម្បីអនុវត្តន៍នូវសេចក្តីណែនាំរបស់អាជ្ញាធរខេត្ត និង អាជ្ញាធរក្រុង ឲ្យមានប្រសិទ្ធភាពនោះ ថ្ងៃនេះគណៈកម្មការចម្រុះ បានចុះមកអនុវត្តន៍ជាក់ស្តែង ដោយមិនបណ្តែតបណ្តោយតទៅទៀតឡើយ ដើម្បីបំពេញនូវតម្រូវការរបស់ប្រជាពលរដ្ឋ ហើយចំពោះការរុះរើនេះ អាជ្ញាធរមិនបានទទួលខុសត្រូវ លើការខូចខាត បាត់បង់ទ្រព្យសម្បត្តិនោះឡើយ ខណៈផ្លូវនេះ គឺសំខាន់សម្រាប់ប្រជាពលរដ្ឋ ក្នុងការធ្វើដំណើរ ការដឹកជញ្ជូនកសិផល ទៅកាន់ទីផ្សារ ការធ្វើដំណើររបស់សិស្សានុសិស្ស និង ចាស់ព្រឹទ្ធាចារ្យទៅទីវត្តអារាម ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ក្រុងសៀមរាប
