ក្នុងឱកាសអបអរសាទរខួប២៥ឆ្នាំ នៃការបង្កើតគណៈកម្មាធិការអន្ដរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានអង្គរ ហៅកាត់ថា អាយស៊ីស៊ី-អង្គរ កាលពីរសៀលថ្ងៃទី២៨ ខែវិច្ឆិកា ឆ្នាំ២០១៨ម្សិលមិញនេះ អាជ្ញាធរជាតិអប្សរា បានធ្វើការដាក់តាំងបង្ហាញរូបថត ស្ដីពីសកម្មភាព និងសមិទ្ធផលសំខាន់ៗ ដែលគណៈកម្មាធិការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្ត្រអង្គរ ជាពិសេសលើការងារជួសជុល និងអភិរក្សរមណីយដ្ឋានអង្គររយៈពេល២៥ឆ្នាំ នៅសួនច្បារ ជិតព្រះអង្គចេកព្រះអង្គចម មានរយៈពេល១៥ថ្ងៃ គឺចាប់ពីថ្ងៃ២៨ ខែវិច្ឆិកា ដល់ថ្ងៃទី១២ ខែធ្នូ ឆ្នាំ២០១៨ ។
លោក ឡុង កុសល អ្នកនាំពាក្យអាជ្ញាធរជាតិអប្សរា បានឱ្យដឹងថា ពិព័ណ៌រូបភាពបង្ហាញពីសកម្មភាព និងសមិទ្ធផលសំខាន់ៗនេះ ធ្វើឡើងក្នុងគោលបំណង អបអរសាទរនៃការបង្កើតគណកម្មាធិការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានអង្គរ ហៅកាត់ថា អាយស៊ីស៊ី អង្គរ ក្នុងរយៈពេល២៥ឆ្នាំ ដែលចាប់ផ្ដើមតាំងពីឆ្នាំ១៩៩៣ដល់ឆ្នាំ២០១៨ ហើយការតាំងបង្ហាញនេះ គឺគោលដៅឱ្យប្រជាពលរដ្ឋ ក៏ដូចជាអ្នកទេសចរបានឃើញថា ក្រុមការងារគណៈកម្មាធិការអាយស៊ីស៊ី-អង្គរ ក្នុងរយៈពេល២៥ឆ្នាំមកនេះ ថាតើពួកគាត់បានខិតខំប្រឹងប្រែងនិងភាពអត់ធ្មត់យ៉ាងណាខ្លះ ក្នុងការងារអភិរក្ស និងអភិវឌ្ឍន៍រមណីយដ្ឋានអង្គរ ។
លោក ឡុង កុសល បានបញ្ជាក់ទៀតថា ពិធីអបអរសាទរខួប២៥ឆ្នាំ នៃការបង្កើតគណៈកម្មាធិការអន្ដរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានអង្គរនេះ គឺដើម្បីបង្ហាញពីមោទនភាពរបស់ព្រះរាជណាចក្រកម្ពុជា ដែលជាមហាអំណាចវប្បធម៌ និងមានប្រវត្តិសាស្ត្រយូលង់មកហើយ និងដើម្បីបណ្តុះស្មារតីយុវជន និងប្រជាពលរដ្ឋខ្មែរឱ្យចេះស្រលាញ់ ចូលរួមថែរក្សាបេតិកភណ្ឌ វប្បធម៌ ទំនៀមទំម្លាប់ប្រពៃណីផូរផង់របស់ខ្មែរឱ្យបានគង់វង្ស។
សូមបញ្ជាក់ថា រាជរដ្ឋាភិបាលកម្ពុជា គ្រោងនឹងប្រារព្ធពិធីអបអរសាទរខួប២៥ឆ្នាំ នៃការបង្កើតគណៈកម្មាធិការអន្ដរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានអង្គរ ហៅកាត់ថា អាយស៊ីស៊ី-អង្គរ នៅថ្ងៃទី០៤ និងថ្ងៃទី០៥ខែធ្នូឆ្នាំ២០១៨ខាងមុខនេះ ដែលកម្មវិធីនេះ នឹងព្រឹត្តទៅក្រោមព្រះរាជអធិបតីភាពដ៏ខ្ពស់របស់ព្រះមហាក្សត្រសម្ដេច ព្រះបរមនាថ នរោត្ដម សីហមុនី និងសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកកម្ពុជា និងអគ្គនាយិកាអង្គការយូណេស្កូ រួមជាមួយអ្នកជំនាញអន្តរជាតិជាច្រើនផងដែរ ៕
អត្ថបទ និង រូបថត ៖ លោក ទ្រា ពន្លឺ និង លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
