សមត្ថកិច្ចនគរបាលជំនាញខេត្តសៀមរាប បានឲ្យដឹងថា មនុស្សពីរនាក់ គឺទី១. ឈ្មោះ អ៊ុន រតនា ភេទប្រុស (ជាភេទទី៣) កើតឆ្នាំ១៩៨២ ជនជាតិខ្មែរ មុខរបរមិនពិតប្រាកដ ស្នាក់នៅភូមិវត្តដំណាក់ សង្កាត់សាលាកំរើក ក្រុងសៀមរាបដែលទើបចេញពីពន្ធាគារនៅឆ្នាំ២០១៧។ ់់ទី២. ឈ្មោះ មិត្ត ដូង ភេទប្រុស (ជាភេទទី៣) កើតឆ្នាំ១៩៩២ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួលភូមិស្វាយដង្គំ សង្កាត់ស្វាយដង្គំ ក្រុងសៀមរាប ដែលទើបចេញពីពន្ធាគារនៅឆ្នាំ២០១៧ ត្រូវបានកម្លាំងសមត្ថកិច្ចនគរបាលជំនាញ នៃស្នងការដ្ឋាននគរបាលខេត្តចាប់ឃាត់ខ្លួន ពីបទប្រព្រឹត្តករណីអំពើលួចទូរស័ព្ទដៃ , លុយ និងខ្សែ-ក ដោយយោងតាមបណ្តឹងជនរងគ្រោះឈ្មោះ JAMES MICHAEL SARZOTTI ភេទប្រុស កើតឆ្នាំ១៩៥១ ជនជាតិអាមេរិក កាន់លិខិតឆ្លងដែនលេខ ៥៤៦១៦៣៤៧៨ មុខរបរចូលនិវត្តន៍ ស្នាក់នៅភូមិគ្រឹះ ឆាំម៉ូនី ភូមិតាភុល សង្កាត់ស្វាយដង្គំ ក្រុងសៀមរាប ។
សមត្ថកិច្ចនគរបាលជំនាញខេត្តសៀមរាប បានឲ្យដឹងទៀតថា ក្រោយការសាកសួរជនសង្ស័យទាំងពីរនាក់បានឆ្លើយសារភាពថា ខ្លួនពិតជាបានធ្វើសកម្មភាពលួចយកទូរស័ព្ទដៃមួយគ្រឿង ម៉ាក IPHONE X ពណ៌ ស របស់ជនរងគ្រោះប្រាកដមែន កាលពីវេលាម៉ោងប្រហែល០៣ ទៀបភ្លឺ ថ្ងៃទី២៥ ខែវិច្ឆិកា ឆ្នាំ២០១៨ នៅចំនុចតាមផ្លូវមាត់លូ ម្តុំផ្សាររាត្រី ភូមិស្ទឹងថ្មី សង្កាត់ស្វាយដង្គំ ក្រុងសៀមរាប ហើយចំពោះលុយនិងខ្សែកខ្លួនមិនបានលួចទេ ហើយចំពោះទូរស័ព្ទដៃ ០១គ្រឿង ម៉ាក IPHONE X ពណ៌ស ត្រូវកម្លាំងនគរបាលជំនាញបានដកហូត ។
បច្ចុប្បន្នជនសង្ស័យទាំងពីរនាក់ត្រូវបានលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប សម្រេចឲ្យឃាត់ខ្លួនបណ្តោះអាសន្ននៅការិយាល័យស៊ើបអង្កេត និងអនុវត្តនីតិវិធី ដើម្បីរៀបចំកសាងសំណុំរឿងបញ្ជូនទៅសាលាដំបូងខេត្តចាត់ការបន្តតាមនីតិវិធី ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
