អ្នកស្រី សួន កូលាប អ្នកគ្រប់គ្រងផ្នែកបដិសណ្ឋារៈកិច្ច នៃសណ្ឋា គារវិចតូរីយ៉ាអង្គរ រីស៊ត និង ស្ប៉ា ស្ថិតក្នុងក្រុងសៀមរាប បានឲ្យដឹងថា ដើម្បីចូលរួមចំណែកទាក់ទាញអ្នកទេសចរណ៍មកទស្សនានៅខេត្ដសៀមរាប តាមការអំពាវរបស់ប្រមុខរាជរដ្ឋាភិបាលកម្ពុជា នៅក្នុងពិធីចូលឆ្នាំថ្មីប្រពៃណីខ្មែរខាងមុខនេះ ជាពិសេសជុំវិញបញ្ហា សកលដែលបណ្ដាលមកពីបញ្ហាវីរុសខូវីដ-១៩នេះ សណ្ឋា គារវិចតូរីយ៉ាអង្គរ រីស៊ត និង ស្ប៉ា ដែលជាសណ្ឋាគារលំដាប់ផ្កាយ៥ បានសម្រេចបញ្ចុះតម្លៃ៥៤ភាគរយនៃតម្លៃមុនសរុប១៧៥ដុល្លាក្នុងមួយយប់ សម្រាប់ភ្ញៀវទេសចរជាតិ ក្នុងរយៈពេល៣ខែ ដោយចាប់ពីខែមីនា ដល់ដំណាច់ខែឧសភាឆ្នាំ២០២០ខាងមុខនេះ ។
ជាមួយគ្នានេះដែរ អ្នកស្រី សួន កូលាប ក៏បានថ្លែងអំណរគុណដល់ប្រមុខរាជរដ្ឋាភិបាលកម្ពុជា ជាពិសេសសម្ដេចតេជោ ហ៊ុន សែន ដែលបានធ្វើការលើកលែងពន្ធដល់ផ្ទះសំណាក់ សណ្ឋាគារក្នុងរយៈពេល០៤ខែ ខណៈដែលភ្ញៀវទេសចរណ៍ធ្លាក់ចុះដោយសារជំងឺ ខូវីដ-១៩ រាតត្បាត ព្រោះថា ការលើកលែងពន្ធនេះ ធ្វើឲ្យក្រុមម្ចាស់សណ្ឋាគារ មានលទ្ធភាពបន្ដបម្រើសេវាកម្ម និងធ្វើអាជីវកម្មរបស់ខ្លួនទៀត និង បានធ្វើឲ្យបុគ្គលិកបន្ដការងារនៅក្នុងសណ្ឋាគារទៀតផង ហើយការចូលរួមស្នាក់នៅរបស់ភ្ញៀវទេសចរណ៍ខ្មែរ នៅសណ្ឋាគារវិចតូរីយ៉ា ហាក់ដូចជួយលើកស្ទួយជីវភាពបុគ្គលិកខ្មែរដែលកំពុងបម្រើការងារនៅទីនោះ ខណៈដែលភ្ញៀវទេសចរណ៍អន្ដរជាតិធ្លាក់ចុះខ្លាំងនៅដើមឆ្នាំ២០២០នេះ ។
គួររំលឹកថា នៅក្នុងកិច្ចប្រជុំឧត្តមក្រុមប្រឹក្សាពិគ្រោះ និងផ្តល់យោបល់ និងសន្និសីទសារព័ត៌មាន នៅវិមានសន្តិភាព នៅព្រឹកថ្ងៃទី២៤ ខែកុម្ភៈ ឆ្នាំ២០២០កន្លងទៅនេះ ដោយសមាជិកសំខាន់ៗមួយចំនួនរបស់រាជរដ្ឋាភិបាល និងសមាជិកឧត្តមក្រុមប្រឹក្សាពិគ្រោះ និងផ្តល់យោបល់ សម្ដេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានប្រកាសថា ផ្ទះសំណាក់ និងសណ្ឋាគារ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មក្នុងខេត្តសៀមរាប រាជរដ្ឋាភិបាល នឹងលើកលែងការបង់ពន្ធប្រចាំខែគ្រប់ប្រភេទ រយៈពេល៤ខែ ចាប់ពីខែកុម្ភៈ រហូតដល់ខែឧសភា ឆ្នាំ២០២០ ។
សម្ដេចតេជោ ហ៊ុន សែន មានប្រសាសន៍បង្ហាញថា តាមការវាយតម្លៃបឋម វីរុសកូរ៉ូណា Covid-19 បានធ្វើឲ្យវិស័យសេដ្ឋកិច្ចសំខាន់ៗ ចំនួន២ រងផលប៉ះធ្ងន់ជាងគេគឺ វិស័យទេសចរណ៍ និងវិស័យកាត់ ដេរ ខណៈដែលនៅក្នុងខែកុម្ភៈ ឆ្នាំ២០២០នេះ វិស័យទេសចរណ៍នៅកម្ពុជា ធ្លាក់ចុះជាង៦០ភាគរយ ជាពិសេសទេសចរចិន ធ្លាក់ចុះក្នុងរង្វង់៩០ភាគរយ ហើយជាមួយគ្នានេះ អាជីកម្មទេសចរណ៍ក្នុងខេត្តសៀមរាប មានការប៉ះពាល់ធ្ងន់ធ្ងរជាងគេ បើធៀបនឹងគោលដៅទេសចរណ៍សំខាន់ៗក្នុងប្រទេស ៕
អត្ថបទនិង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
