កាលពីថ្ងៃទី១២ ខែមីនា ឆ្នាំ២០២០ មានករណីភ្លើងឆេះព្រៃ កើតឡើងនៅចំណុច ព្រៃពូជក្រញូង ស្ថិតនៅភូមិត្រពាំងថ្ម ឃុំឃុនរាម ស្រុកបន្ទាយស្រី ខេត្តសៀមរាប។ ករណីនេះ បានបង្កឲ្យ ផ្ទៃដីព្រៃ ទំហំ ៥៨ហិកតា ត្រូវបានឆេះខូចខាត ប៉ុន្តែពុំបង្កឲ្យ មានជនរងគ្រោះ ឬប៉ះពាល់ដល់ទ្រព្យសម្បត្តិរបស់ប្រជាពលរដ្ឋឡើយ។
សមត្ថកិច្ចនគរបាលនៅមូលដ្ឋាននោះ បានឲ្យដឹងថា ករណីភ្លើងឆេះព្រៃ កម្លាំងនគរបាលនៃអធិការដ្ឋានស្រុកបន្ទាយស្រី សហការជាមួយ កម្លាំងនគរបាលពន្លត់អគ្គីភ័យ ប្រចាំការប៉ុស្តិនគរបាលរដ្ឋបាលឃុំស្រែណូយ នៃអធិការដ្ឋាននគរបាលស្រុកវ៉ារិន បានប្រើកងកម្លាំងចំនួន ៤៣នាក់ រថយន្តពន្លត់អគ្គីភ័យ ចំនួន២គ្រឿង រួមនិងក្រុមប្រឹក្សាស្រុក រដ្ឋបាលព្រៃឈើ និងប្រជាជាពលរដ្ឋចំនួន២៩នាក់។
ក្នុងប្រតិបត្តិការណ៍នេះ បានពន្លត់ភ្លើងទាំងស្រុងនៅវេលាម៉ោង៩:៣០នាទីព្រឹក ប្រើប្រាស់ទឹកអស់ចំនួន០២រថយន្ត។ ជុំវិញករណីភ្លើងឆេះព្រៃនេះ សមត្ថកិច្ចពុំបានបញ្ជាក់ថា មកពីមូលហេតុនៅឡើយទេ។
ព័ត៌មានជាតិ ថ្មីៗ
អត្ថបទនិង រូបថត ៖ ថាច់ ពិសុទ្ធ
កែសម្រួលអត្ថបទ ៖ លោក សេង ផល្លី
