មន្ទីរសុខាភិបាលខេត្តសៀមរាប រៀបចំសិក្ខាសាលផ្សព្វផ្សាយវិធានការបង្ការ ការចម្លងជំងឺកូវីដ-១៩
កាលពីរសៀលថ្ងៃទី១៣ ខែមីនា ឆ្នាំ២០២០នេះ មន្ទីរសុខាភិបាលខេត្តសៀមរាប មានរៀបចំសិក្ខាសាលាផ្សព្វផ្សាយវិធានការបង្ការ ការចម្លងជំងឺកូវីដ-១៩ នៅមន្ទីរពេទ្យបង្អែកខេត្តសៀមរាប ក្រោមអធិបតីភាព ឯកឧត្តម ទៀ សីហា អភិបាលខេត្ត និង លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត ដោយមានការចូលរួមជាសិក្ខាកាមមកពីមន្ទីរ អង្គភាពស្ថាប័ននានាក្នងខេត្ត សហភាពសហព័ន្ឋយុវជនកម្ពុជាខេត្ត ផ្នែកឯកជននិងប្រតិបត្តិករទេចរណ៍ជាច្រើននាក់ ។
មានប្រសាសន៍បើកអង្គសិក្ខាសាលានេះ ឯកឧត្តម ទៀ សីហា អភិបាលខេត្តសៀមរាប បានសម្ដែងនូវការកោតសរសើរនិងអរគុណចំពោះថ្នាក់ដឹកនាំ និងមន្ត្រីរាជការនៃមន្ទីរសុខាភិបាលខេត្ត ដែលបានអនុវត្តការងារយ៉ាងសកម្ម ដោយ ប្រុងប្រយ័ត្ន ទប់ស្កាត់ការរីករាលដាលនៃកូវីដ-១៩ រហូតខេត្តសៀមរាបយើង មានស្ថានភាពល្អប្រសើរជាងមុន ប្រជាពលរដ្ឋមិនមានការភ័យខ្លាចដូចការបំផុសពត៌មានមិនពិតនោះទេ ហើយទន្ទឹមនឹងនោះ អាជ្ញាធរខេត្តក៏បានយកចិត្តទុកដាក់សហការជាមួយស្នងការដ្ឋាននគរបាលខេត្ត ពិនិត្យ ស្រាវជ្រាវ ទប់ស្កាត់ និង បានហៅមកណែនាំចំពោះម្ចាស់ គណនេយ្យហ្វេសប៊ុកមួយចំនួនតូចដែល “បំប៉ោងស្ថានភាព បំពុលដល់សង្គម បង្កើនការភ័យខ្លាច បង្កការរើសអើង និង ធ្វើបាបប្រជាពលរដ្ឋខេត្តសៀមរាប ដោយបង្ហោះព័ត៌មានមិនពិត”។
ឯកឧត្តម ទៀ សីហា មានប្រសាសន៍បន្ថែមថា ជំងឺកូវីដ-១៩ ស្រដៀងគ្នាទៅនឹងជំងឺផ្តាសាយធំ បើយើងមានប្រព័ន្ឋការពាររាងកាយល្អ ធ្វើអនាម័យជាប្រចាំជំងឺមិនងាយនឹងឆ្លងចូលបានទេ ហើយតាមរយៈសិក្ខាសាលានេះ សង្ឃឹមថាអ្នកចូលរួមនឹងនាំយកចំណេះដឹងនេះទៅពន្យល់បន្តដល់ក្រុមគ្រួសារ កូនចៅ មិត្តភ័ក្រជិតខាងរបស់ខ្លួន ឱ្យបានយល់ដឹងកាន់តែច្បាស់ ពីវិធីការពារ និង បង្ការពីការឆ្លងជំងឺផ្សេងៗ ជាពិសេសជំងឺកូវីដ-១៩នេះ និងស្វែងយល់ពីជំងឺនេះឱ្យបានច្បាស់លាស់នូវភាពកាចសាហាវរបស់វា ពេលដែលយើងយល់ច្បាស់ហើយ វាកាត់បន្ថយការភ័យខ្លាចបានមួយកម្រិតធំ។
ក្នុងបទបង្ហាញរបស់លោកវេជ្ជបណ្ឌិត សូរ សុទ្ឋី ប្រធានការិយាល័យបច្ចេកទេស នៃមន្ទីរសុខាភិបាលខេត្ត បានពន្យល់ពីការធ្វើអនាម័យដៃ និងរបៀបពាក់ម៉ាសការរពារឱ្យបានត្រឹមត្រូវ ព្រមទាំងបានពន្យល់ពីជំងឺឆ្លងថា គឺជាជំងឺដែលអាចឆ្លងពីមនុស្សម្នាក់ទៅមនុស្សម្នាក់ទៀត ដែលបង្កឡើងដោយពពួកមេរោគផ្សេងៗ ពិសេស អំពីមូលដ្ឋានគ្រឹះនៃជំងឺកូវីដ-១៩ គឺជាក្រុមគ្រួសារវីរុសដ៏ធំមួយ ដែលគេឃើញនៅលើសត្វនិងមនុស្ស ហើយនៅលើមនុស្សមានតាំងពីជំងឺផ្កាសាយធម្មតា រហូតដល់ជំងឺធ្ងន់ធ្ងរជាច្រើនទៀត រីឯវីរុសកូរ៉ូណាប្រភេទថ្មី គឺជាវីរុសកូរ៉ណាថ្មីមួយដែលពីមុនមិនមាននៅលើមនុស្ស ។
លោកវេជ្ជបណ្ឌិត សូរ សុទ្ឋី បានបញ្ជាក់ទៀតថា មនុស្សអាចឆ្លងជំងឺកូវីដ-១៩ ពីអ្នកដទៃដែលមានវីរុសនេះតាមរយៈ ៖រាលដាលនៅពេលក្អក , តំណក់ទឹកទាំងនេះមានលើវត្ថុនិងផ្ទៃ , មនុស្សដទៃមកប៉ះតំណក់ទឹកទាំងនេះ រួចប៉ះ ច្រមុះ មាត់ , មនុស្សអាចឆ្លងជំងឺកូវីត-១៩ ប្រសិនជាដកដង្ហើមនូវតំណក់ទឹក ក្អកឬកណ្តាស់ពីអ្នកមានជំងឺ ដូច្នេះតាមការសិក្សាបង្ហាញថា វីរុសជំងឺកូវីដចម្លងតាមការប៉ះពាល់ជាមួយតំណក់ទឹកពីផ្លូវដង្ហើមជាជាងឆ្លងកាត់ ខ្យល់ ហើយរោគសញ្ញាវីរុសកូវីដ-១៩ ជាទូទៅគ្រុន អស់កម្លាំងតនិងក្អកស្ងួត មានអ្នកជំងឺខ្លះអាចមាន និងតឹងច្រមុះ ហៀរសំបោរឈឺបំពង់ក មនុស្សខ្លះឆ្លងមេរោគប៉ុន្តែមិនមានរោគសញ្ញា ហើយមិនមានអារម្មណ៍ថាមិនស្រួលខ្លួនដែរ ដែលមកដល់ពេលនេះ មិនមានវ៉ាក់សាំងទេ ហើយក៏មិនមានថ្នាំប្រឆាំង ឬព្យាបាលកូវីដ-១៩ ដែរក្នុងដំណាក់កាល ។
លោកវេជ្ជបណ្ឌិត សូរ សុទ្ឋី បានបញ្ជាក់បន្ថែមទៀតថា ដើម្បី ចៀស វាងពីការឆ្លងជំងឺ យើងត្រូវការពារខ្លួនដោយលាងដៃឲ្យបានញឹកញាប់ជាមួយសាប៊ូ និងទឹកស្អាត ឬទឹកអាល់កុលលាងដៃ រក្សាចំងាយយ៉ាងតិចឱ្យបាន១ ម៉ែត្ររវាងខ្លួនអ្នកនិងអ្នកដែលក្អក ឬកណ្តាស់ កាត់បន្ថយជាអតិបរិមានូការយកដៃមកប៉ះភ្នែក ច្រមុះនិងមាត់ ហើយត្រូវខ្ទប់មាត់និងច្រមុះនៅពេលក្អកឬកណ្តាស់ ដោយ យក កន្សែង ឬ ក្រម៉ា ប្រើកែងដៃឬក្រដាសរួចហើយចោលក្រដាសភ្លាមក្នុងធុងសំរាម ត្រូវចៀសវាងប៉ះពាល់ស្និទ្ធជាមួយអ្នកជំងឹផ្លូវដង្ហើមដូចជាគ្រុនក្តៅ ក្អក និងកណ្តាសឬផ្តាសាយ ត្រូវពិសារអាហារដែលចម្អិនឆ្អិនល្អ ជាពិសេសសាច់ ជៀសវាងប៉ះពាល់ជិតស្និទ្ធនៅកសិដ្ឋានដែលមានសត្វរស់ ឬសត្វព្រៃ ឬកន្លែងដែលគេ ដឹងថាមានវីរុសកំពុងចរាចរ ហើយប្រសិនបើលោកអ្នក មានរោគសញ្ញាណាមួយដូចជា គ្រុនក្តៅ ក្អក ពិបាកដកដង្ហើម ទាំងមុនឬក្នុងអំឡុង ពេលធ្វើដំណើរ ឬបន្ទាប់ពីការវិលត្រឡប់មកពីកន្លែងដែលបាននឹងកំពុងរាតត្បាតនៅប្រទេសមួយចំនួន ឬ បានប៉ះពាល់ជាមួយអ្នកជំងឺកូវីដ-១៩ ដែលអះអាងពីមន្ទីរពិសោធន៍ សូមទាក់ទងទូរស័ព្ទ១១៥ជាបន្ទាន់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
