នៅព្រឹកថ្ងៃទី១៧ ខែមីនា ឆ្នាំ២០២០ នាសាលប្រជុំ សាលាខេត្តពោធិ៍សាត់ មានរៀបចំពិធីប្រកាសចូលកាន់មុខតំណែង របស់លោក លាង ទិត្យដ្ឋាន ជាប្រធានមន្ទីរព័ត៌មានខេត្តពោធិ៍សាត់ថ្មី ជំនួសលោក ឡាយ ចេងលាង ដែលបានចូលនិវត្តន៍។
អញ្ជើញជាអធិបតីក្នុងពិធីនោះ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន បានសម្ដែងនូវការអរគុណចំពោះ ប្រធានក្រុមប្រឹក្សាខេត្ត អភិបាលខេត្ត ដែលបានឯកភាព គាំទ្រប្រធានមន្ទីរព័ត៌មានថ្មី ដែលជាការបង្ហាញនូវកិច្ចសហ ប្រតិបត្តិការល្អ រវាងថ្នាក់លើនិងថ្នាក់ក្រោម ដើម្បីបំពេញកិច្ចការងាររួមជាមួយគ្នាបានល្អប្រសើរ។
ឯកឧត្តមរដ្ឋមន្រ្តី លើកឡើងថា ក្នុងការតែងតាំង ប្រធានមន្ទីរព័ត៌មាននីមួយៗ គឺជំហានដំបងត្រូវមានការឯកភាព យល់ព្រមពីថ្នាក់ដឹកនាំខេត្តជាមុនសិន ព្រោះប្រធានមន្ទីរជាអ្នកធ្វើការងារ នៅក្នុងខេត្តជាប់ជាប្រចាំ ជាមួយថ្នាក់ដឹកនាំ ទាំងពីរ ហើយក៏ជាអ្នកចូលរួមជួយឲ្យការងារក្នុងខេត្តដំណើរទៅបានល្អទាំងអស់គ្នា។ ទន្ទឹមនោះ ប្រធានមន្ទីរ សំខាន់មាន ប្រជាប្រិយភាព និងសមត្ថភាព ហើយជាអ្នកចេះប្រមូលម្តុំកម្លាំងគ្នាបំពេញកិច្ចការងារ សាមគ្គីភាពផ្ទៃក្នុង ដើម្បីបំពេញកិច្ចការព័ត៌មាន។
ព័ត៌មានជាតិ ថ្មីៗ
មានវត្តមានក្នុងឱកាសនោះ ឯកឧត្តម ម៉ៅ ធនិន អភិបាលខេត្តពោធិ៍សាត់ មានប្រសាសន៍ថា មន្ទីរព័ត៌មានខេត្តពោធិ៍សាត់ អាចបំពេញការងារព័ត៌មានបានល្អ គឺដោយសារ មានការដឹកនាំល្អ មន្ត្រីនៅក្នុងអង្គភាពសកម្ម ហើយក៏មានការចូលរួមចំណែកយ៉ាងសំខាន់ ពីសំណាក់ ឯកឧត្តមរដ្ឋមន្ត្រី ក្រសួងព័ត៌មាន ដែលបានគិតគូរ យកចិត្តទុកដាក់ផ្តល់ និងផ្គត់ផ្គង់ ម៉ាស៊ីន វិទ្យុ និងទូរទស្សន៍ សម្ភារៈគ្រឿងឧបករណ៍បច្ចេកទេស និងការបណ្តុះ បណ្តាល ជាបន្តបន្ទាប់។
ឯកឧត្តម អភិបាលខេត្ត ក៏បានលើកទឹកចិត្ត ដល់ប្រធានមន្ទីរថ្មី ព្រមទាំងមន្ត្រីរាជការគ្រប់ថ្នាក់ បន្តកិច្ចខិតខំប្រឹងប្រែង ធ្វើយ៉ាង ឲ្យវិស័យព័ត៌មានក្នុងខេត្ត ធានាបាននូវនិរន្តភាព នៃការផ្សព្វផ្សាយ ច្បាស់លាស់ គ្រប់ជ្រុងជ្រោយ ប្រកបដោយ គុណភាព និងគុណតម្លៃ ដើម្បីលើកកម្ពស់កម្រិត យល់ដឹងរបស់ប្រជាជនទូទាំងខេត្ត។
សូមជម្រាបថា នៅទូទាំងខេត្តពោធិ៍សាត់ មានស្ថានីយវិទ្យុFMសរុប ១៦ស្ថានីយ ក្នុងមាន ស្ថានីយវិទ្យុFM របស់រដ្ឋចំនួន ១ ស្ថានីយ ។ ស្ថានីយទូរទស្សន៍ មាន ១២ ក្នុងនោះ ស្ថានីយផ្សាយបន្ត ១១ស្ថានីយ និងស្ថានីយខ្សែកាប ១ស្ថានីយ។
អត្ថបទ និង រូបថត ៖ ក្រសួងព័ត៌មាន
សម្រួលអត្ថបទ៖ សេង ផល្លី
