នៅរសៀលថ្ងៃទី១៩ ខែមីនា ឆ្នាំ២០២០នេះ តុលាការខេត្តសៀមរាប បានបើកសាវនាការ ពាក់ព័ន្ធនឹងករណី លោក ឌឹម សួនណាត អគ្គនាយកក្រុមហ៊ុន អ៊ីណារីតា (Enarita) ដែលត្រូវអតិថិជនរបស់ខ្លួនប្រមាណ១០០០នាក់ ដាក់ពាក្យប្តឹងទៅតុលាការពីបទឆបោកលុយជាង៣០០លានដុល្លារ។
ដោយឡែក នៅថ្ងៃដដែលនោះ ក៏មានក្រុមមនុស្សប្រមាណជាង១០០នាក់ មួយក្រុមទៀត ក្នុងនោះគេឃើញមាន គូស្វាមីភរិយា អ្នកស្រី ខាត់ សុឃីម បាននាំគ្នាទាមទារឲ្យតុលាការខេត្តសៀមរាប ដោះលែង អគ្គនាយកក្រុមហ៊ុនខាងលើនេះផងដែរ។
តាមការឲ្យដឹងពីមន្ត្រីតុលារ សុំមិនបង្ហាញអត្តសញ្ញាណ បង្ហាញថា នៅព្រឹកថ្ងៃទី១៩ខែមីនានេះ អ្នកស្រី ខាត់ សុឃីម បានប្រមូលផ្តុំអ្នកតវ៉ា ស្នើដល់ ស្ថាប័នតុលាការដោះលែងលោក ឌឹម សួនណាត។ ដោយអ្នកស្រី និងក្រុមអ្នកតវ៉ា លើកឡើងថា ប្រសិនបើអគ្គនាយកក្រុមហ៊ុនអ៊ីណារីតា រូបនេះត្រូវបានដោះលែង ប្រជាពលរដ្ឋរាប់ពាន់គ្រួសារ ដែលបានដាក់ហ៊ុនវិនិយោគជាមួយរូបលោកកន្លងមក នឹងទទួលបានដំណោះស្រាយតាមរយៈការដោះបំណុលតាមដំណាក់។ ដោយឡែក ប្រសិនបើ អគ្គនាយកក្រុមហ៊ុនរូបនេះ ត្រូវជាប់ឃុំ ប្រជាពលរដ្ឋទាំងនោះនឹងជួបបញ្ហាជីវភាព។
ព័ត៌មានជាតិ ថ្មីៗ
តាមការឲ្យដឹងពីប្រភពដដែល បង្ហាញថា ជនសង្ស័យឈ្មោះ ឌឹម សួនណាត នាពេលកន្លងមក បានប្រកបរបរពុះដីឡូតិ៍ខ្យល់លក់ វិនិយោគដាក់លុយដោយទទួលបានប្រាក់ចំណេញ២០ភាគរយ និងរបរជាច្រើនទៀត។
ត្រូវបាន ចៅក្រមស៊ើបសួរ ជូ លឹមហ៊ាង ចេញដីកាឲ្យឃុំខ្លួន កាលពីថ្ងៃទី២១ ខែកក្កដា ឆ្នាំ២០១៩ ពីបទឆបោក ដោយមានស្ថានទម្ងន់ទោស ដែលបានប្រព្រឹត្តនៅក្រុងសៀមរាប ខេត្តសៀមរាបនិងនៅតាមបណ្តាខេត្តជាច្រើនទៀត កាលពីអំឡុងឆ្នាំ ២០០៩ ដល់បច្ចុប្បន្ន។
ក្រោយការតវ៉ារយៈពេលមួយព្រឹក អយ្យការតុលាការខេត្តសៀមរាប បានអញ្ជើញតំណាងអ្នកតវ៉ា៣រូប ចូលចចារ ដោយខាងតុលាការសន្យារថានឹងជួយរកដំណោះស្រាយជូនប្រជាពលរដ្ឋរងគ្រោះ។
អត្ថបទ និង រូបថត ៖ ខេង ឧត្តម
សម្រួលអត្ថបទ៖ សេង ផល្លី
