យោងតាមផេកហ្វេសប៊ុក (Page Facebook) របស់ស្ថានទូតចិនប្រចាំនៅកម្ពុជា បង្ហាញថា ក្រុមអ្នកជំនាញវេជ្ជសាស្រ្តចំនួន៧រូប និងសម្ភារៈប្រយុទ្ធប្រឆាំងនឹងជំងឺកូវីដ១៩ ដែលជាជំនួយរបស់ប្រទេសចិនជូនចំពោះប្រទេសកម្ពុជា បានអាកាសយានដ្ឋានអន្តរជាតិរាជធានីភ្នំពេញហើយ នាព្រឹកថ្ងៃទី២៣ ខែមីនា ឆ្នាំ២០២០នេះ។ ពួកគេជាក្រុមអ្នកជំនាញប្រយុទ្ធប្រឆាំងនឹងជំងឺកូវីដ១៩ ដំបូងគេបង្អស់ ដែលរដ្ឋាភិបាលចិន បាន បញ្ជូនមកកាន់តំបន់អាស៊ាន។
ក្នុងឱកាសអញ្ជើញទទួលនោះ គេឃើញមាន ឯកឧត្តមសាស្រ្តាចារ្យបណ្ឌិត ម៉ម ប៊ុនហេង រដ្ឋមន្រ្តីក្រសួងសុខាភិបាលកម្ពុជា ឯកឧត្តម វ៉ាង វិនធៀន (Wang Wentian) ឯកអគ្គរដ្ឋទូតចិនប្រចាំកម្ពុជា ថ្នាក់ដឹកនាំតំណាងសមាគមសម្ព័ន្ធខ្មែរចិននៅកម្ពុជា និងថ្នាក់ដឹកនាំអង្គាភាពស្ថាប័នជាច្រើនទៀត។
តាមរយៈការចុះផ្សាយនេះដែរ បង្ហាញថា ដោយមើលឃើញពីស្ថានភាពជំងឺកូវីដ១៩ ក្នុងប្រទេសកម្ពុជាមានការវិវឌ្ឍន៍ឥតឈប់ឈរ រដ្ឋាភិបាលចិនបានសម្រេចចាត់បញ្ជូនក្រុមគ្រូពេទ្យ នៃតំបន់ស្វយ័ត កួងស៊ី (Guangxi) ប្រទេសចិន ចំនួន៧រូបមកកាន់ប្រទេសកម្ពុជា។ សមាជិកនៃក្រុមគ្រូពេទ្យជំនាញ នឹងអញ្ជើញពិភាក្សាអំពីបទពិសោធន៍នៃកិច្ចប្រយុទ្ធប្រឆាំងនឹងជំងឺកូវីដ១៩ ជាមួយនឹងភាគីកម្ពុជា ជួយសម្របសម្រួលកិច្ចប្រយុទ្ធប្រឆាំងនឹងជម្ងឺវីរុសដល់ភាគីកម្ពុជា ហើយនឹងផ្តល់យោបល់ណែនាំជូនដល់អ្នកជម្ងឺក្នុងពេលព្យាបាល។ ទន្ទឹមនឹងនេះ ដើម្បីជួយដោះស្រាយបញ្ហាកង្វះសម្ភារៈទប់ស្តាត់នឹងជំងឺនេះក្នុងប្រទេសកម្ពុជា រដ្ឋាភិបាលចិនក៏បានផ្ដល់ជំនួយជាម៉ាសវេជ្ជសាស្រ្ត, ម៉ាស N95, សម្លៀកបំពាក់ការពារវីរុស, វ៉ែនតាការពារ និងសម្ភារៈផ្សេងទៀតជាច្រើន ជូនដល់ភាគីកម្ពុជា។
គួរជម្រាបថា គិតរហូតមកដល់យប់ថ្ងៃទី២២ ខែមីនានេះ កម្ពុជាបានរកឃើញអ្នកឆ្លងជំងឺកូវីដ១៩ ចំនួន៨៤ករណីហើយ ក្នុងនោះមានប្រុស៦៣នាក់ និងនារីចំនួន២១នាក់ ខណៈដែលក្រសួងសុខាភិបាល កំពុងបន្តស្វែងរក និងធ្វើតេស្តលើអ្នកពាក់ព័ន្ធផ្សេងទៀត។ នាពេលកន្លងមកថ្មីៗនេះ រាជរដ្ឋាភិបាល បានបង្កើតគណៈកម្មាធិការជាតិប្រយុទ្ធប្រឆាំងនឹងជំងឺកូវីដ ខណៈក្រសួងស្ថាប័នមួយចំនួន ចាប់ផ្តើមដាក់វិធានការទប់ស្កាត់ចំពោះការឆ្លងរីករាលដាលកូវីដផងដែរ៕
អត្ថបទ និងរូបភាព៖ Facebook Page ស្ថានទូតចិនប្រចាកម្ពុជា
សម្រួលអត្ថបទ៖ សេង ផល្លី
