កាលពីថ្ងៃទី២២ ខែមីនា ឆ្នាំ២០២០ កម្លាំងសមត្ថកិច្ចនៃស្នងការនគរបាលខេត្តសៀមរាប បាននាំខ្លួនឈ្មោះ ង៉ោ កាវតុង ទីលំនៅបច្ចុប្បន្ន ភូមិកំពង់ក្តី០២ ឃុំកំពង់ក្តី ស្រុកជីក្រែង ខេត្តសៀមរាប ដែលជាម្ចាស់គណនីហ្វេសប៊ុកឈ្មោះ NgorKav Tong មកធ្វើការអប់រំ ចំពោះការផ្សព្វផ្សាយព័ត៌មានបំពុលសង្គម នៅលើបណ្ដាញសង្គម។
លោក ឧត្តមសេនីយ៍ត្រី ហួត សុធី ស្នងការរងទទួលការងារសន្តិសុខ នៃស្នងការដ្ឋាននគរបាលខេត្តសៀមរាប បានអោយដឹងថា ម្ចាស់គណនីហ្វេសប៊ុកឈ្មោះ NgorKav Tong បានបង្ហោះសារជាសំឡេង កាលពីថ្ងៃទី១៨ ខែមីនា ឆ្នាំ២០២០ថា មានបុគ្គលម្នាក់ឈ្មោះអែ បានឆ្លងជំងឺកូវីដ១៩ តែការពិតពុំមានករណីឆ្លងលើបុគ្គលរូបនេះឡើយ។
ប្រតិបត្តិការនេះ ដោយមានការសម្របសម្រួលពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប ដឹកនាំកម្លាំងការិយាល័យប្រឆាំងបទល្មើសបច្ចេកវិទ្យា ដោយលោកឧត្តមសេនីយ៍ត្រី ហួត សុធី សហការជាមួយកម្លាំងនៃអធិការដ្ឋាននគរបាលស្រុកជីក្រែង និងបានធ្វើការនាំខ្លួនម្ចាស់គណនីហ្វេសប៊ុកខាងលើ មកសាកសួរនៅស្នងការនគរបាលខេត្តសៀមរាប បន្ទាប់ពីសារភាពទទួលស្គាល់កំហុស សមត្ថកិច្ចក៏បានធ្វើការអប់រំ និងធ្វើកិច្ចសន្យា រួមនិងការធានាពីសំណាក់អាណាព្យាបាល និងបានអនុញ្ញាតឲ្យត្រឡប់ទៅគេហដ្ឋានវិញ ៕
ព័ត៌មានជាតិ ថ្មីៗ
អត្ថបទ និងរូបភាព៖ ថាច់ ពិសុទ្ធ និងស្នងការដ្ឋាននគរបាលខេត្ត
សម្រួលអត្ថបទ៖ សេង ផល្លី
