នៅព្រឹកថ្ងៃទី២៣ ខែមីនា ឆ្នាំ២០២០នេះ ក្រុមការងារចម្រុះ ដឹកនាំដោយ លោក ពិន ប្រាកដ អភិបាលរងខេត្តសៀមរាប ចុះធ្វើការរៀបចំសណ្តាប់ធ្នាប់ ផ្នែកខាងក្រៅ ជុំវិញរបងមន្ទីរពេទ្យបង្អែកខេត្តសៀមរាប ដើមី្បលុបបំបាត់ការលក់ដូរអាណាធិបតេយ្យ ធ្វើឲ្យប៉ះពាល់ សោភណ្ឌភាពក្នុងក្រុងសៀមរាប ។
ក្នុងឱកាសនោះ លោក ពិន ប្រាកដ បានណែនាំដល់មន្ទីរជំនាញត្រូវរៀបចំខឿនសម្រាប់អ្នកថ្មើរជើង ដើម្បីបង្កលក្ខណៈងាយស្រួល ដល់ភ្ញៀវទេសចរចូលមកកម្សាន្តនៅតំបន់ផាប់ស្ទ្រីត។ ជាមួយនោះ បញ្ហា ចំណតម៉ូតូនៅលើ ចិញ្ចើមផ្លូវជាប់របងមន្ទីរពេទ្យនេះ គណៈកម្មការឯកភាពឲ្យដាក់ តែមួយជួរជាប់នឹងរបងមន្ទីរពេទ្យ ក្នុងការសម្រួលការកកស្ទះចរាចរណ៍នៅក្នុងតំបន់នេះ។ ចំពោះរថយន្ត ត្រូវបានអនុញ្ញាតឲ្យចតនៅលើគំនូស ដែលបានគូស ដោយឡែក ម៉ូតូរ៉ឺម៉កកង់បី ឬម៉ូតូកង់បីឥណ្ឌា គណៈកម្មការនឹងមានវិធានការដោះស្រាយ ដោយមិនទុកឲ្យពួកគាត់ចត ដោយគ្មានសណ្ដាប់ធ្នាប់នោះឡើយ។
លោកអភិបាលរងខេត្ត ក៏បានណែនាំដល់កងកម្លាំងនរគរបាល ដែលមានប៉ុស្តិ៍ប្រចាំការនៅតំបន់ផាប់ស្ទ្រីត មិនត្រឹមតែមានភារកិច្ចការពារសន្តិសុខប៉ុណ្ណោះទេ តែក៏ត្រូវយកចិត្តទុកដាក់រៀបចំសណ្តាប់ធ្នាប់ទូទៅ ដោយមិនត្រូវអនុញ្ញាតឲ្យ ជនណាម្នាក់មកដាក់ទីតាំងលក់ នៅលើកម្រាលនៃចិញ្ចើមផ្លូវនេះ ដែលជាហេតុបង្កឲ្យបាត់នូវសោភណ្ឌភាព និង បង្កភាពកកស្ទះចរាចរណ៍ឡើយ។ ក្នុងនោះ អាជ្ញាធរក្រុងសៀមរាប ត្រូវណែនាំដល់ម្ចាស់តូប ឲ្យរុះរើជាបន្ទាន់ ចំពោះតូបលក់ ដែលមិនអនុវត្តទៅតាមសេចក្តីណែនាំរបស់រដ្ឋបាលខេត្ត ។
ព័ត៌មានជាតិ ថ្មីៗ
ជាមួយនោះ លោកអភិបាលរងខេត្ត ក៏បានក្រើនរំលឹកដល់ ទីចាត់ការហិរញ្ញវត្ថុ សាលាខេត្ត ត្រូវពិនិត្យលទ្ធភាព ក្នុង ការរៀបចំដាំដើមឈើ ដែលជាគម្រោងរបស់ទីភ្នាក់ងារសហប្រតិបត្តិការជប៉ុន ហៅកាត់ថា ចាយកា ។ ទន្ទឹមនោះ មន្ទីរអង្គភាពពាក់ព័ន្ធ ក៏ត្រូវធ្វើការកែសម្រួល បង្គោលខ្សែភ្លើងប៉ែកខាងជើងមន្ទីរពេទ្យ ដើមី្បសម្រួលដល់ការក្រាលកម្រាលជម្រាបទឹកលើចិញ្ចើមផ្លូវក្នុងតំបន់ផាប់ស្ទ្រីតនេះ ព្រមទាំងកែសម្រួលពង្រីកផ្លូវនេះនៅពេលឆាប់ៗខាងមុខផងដែរ។
អត្ថបទ និងរូបភាព៖ ម៉ី សុខារិទ្ធ
សម្រួលអត្ថបទ៖ សេង ផល្លី
