នៅព្រឹកថ្ងៃទី២៤ ខែមីនា ឆ្នាំ២០២០ នៅសាលាស្រុកស្រុកក្រឡាញ់ ខេត្តសៀមរាប មានរៀបចំកិច្ចប្រជុំ និងអប់រំ ណែនាំការបង្ការ ទប់ស្កាត់ការឆ្លងរីករាលដាលជំងឺកូវីដ១៩ ដល់ម្ចាស់រថយន្តឈ្នួលចំនួន ៣៥រូប ដែលប្រកបរបរក្នុងស្រុកក្រឡាញ់ និងតែងតែដឹកអ្នកដំណើរពីប្រទេសថៃ មកកាន់ប្រទេសកម្ពុជា។
លោក សុខ ណារ៉េត អភិបាលរងស្រុក តំណាងលោកស្រី ម៉ននី រង្សី អភិបាលស្រុកក្រឡាញ់ បានបង្ហាញ ពីការយកចិត្តទុកដាក់ខ្ពស់ពី របស់រដ្ឋបាលស្រុកក្រឡាញ់ ជុំវិញការឆ្លងរីករាលដាលនៃជំងឺកូវីដ១៩ ជាពិសេសនាពេលថ្មីៗនេះ ការវិលត្រឡប់របស់ប្រជាពលរដ្ឋ ដែលចេញទៅធ្វើការនៅប្រទេសថៃ ចូលមកក្នុងប្រទេសកម្ពុជា គឺជាកត្ដាដែលត្រូវចាប់អារម្មណ៍។ ទន្ទឹមនោះ អ្នកប្រកបរបររថយន្តឈ្នួល ដឹកអ្នកដំណើរពីប្រទេសថៃ មកកាន់ប្រទេសកម្ពុជា ត្រូវពាក់ម៉ាស់ឱ្យបានត្រឹមត្រូវ លាងដៃនឹងសាប៊ូ ជែល ឬអាល់កុល ព្រមទាំងសំអាតរថយន្តឱ្យបានស្អាតជាប្រចាំ។
លោកអភិបាលរងស្រុក ក៏បានថ្លែងអំណរគុណដល់ អធិការដ្ឋាននគរបាលស្រុក ប្រធានមន្ទីរពេទ្យបង្អែកស្រុក រួមនិងអាជ្ញាធរមូលដ្ឋានគ្រប់លំដាប់ថ្នាក់ ដែលបានខិតខំបំពេញការងាររបស់ខ្លួន ប្រកបដោយការទទួលខុសត្រូវខ្ពស់ ក្នុងការបង្ការទប់ស្កាត់ការឆ្លងរីករាលនៃជំងឺកូវីដ១៩ ក្នុងស្រុកក្រឡាញ់ទាំងមូល។
សូមជម្រាបថា រដ្ឋបាលស្រុកក្រឡាញ់ បានកំណត់យកបរិវេណមន្ទីរពេទ្យបង្អែកស្រុក ស្ថិតក្នុងភូមិកំពង់ថ្កូវ២ ឃុំកំពង់ថ្កូវ ស្រុកក្រឡាញ់ ខេត្តសៀមរាប ជាទីតាំងសម្រាប់ពិនិត្យសុខភាពបឋម របស់ប្រជាពលរដ្ឋ ដែលទើបវិលត្រឡប់មកពីក្រៅប្រទេស ។ ការពិនិត្យបឋមនេះ រួមមានការពិនិត្យសុខភាព វាស់កម្ដៅ ដើម្បីគ្រប់គ្រងអត្តសញ្ញាណប្រជាពលរដ្ឋដែលទើបវិលត្រឡប់មកពីក្រៅប្រទេស បង្ការនិងទប់ស្កាត់ជំងឺកូវីដ១៩ និងដាក់ឱ្យនៅដាច់ដោយឡែក នៅតាមផ្ទះជាលក្ខណៈបុគ្គល ក្នុងរយៈពេល ១៤ថ្ងៃ។
អត្ថបទ និងរូបភាព៖ រដ្ឋបាលស្រុកក្រឡាញ់
សម្រួលអត្ថបទ៖ សេង ផល្លី
