រយៈពេល២ថ្ងៃ ចាប់ពីថ្ងៃទី២៤ ដល់ទី២៥ ខែមីនា ឆ្នាំ២០២០នេះ លោកទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប វាយតម្លៃថា រយៈពេលេ៣ខែខាងមុខ សត្វពាហនៈ និងត្រី ចិញ្ចឹមតាមបណ្ដាស្រុក សម្រាប់ផ្គត់ផ្គង់ក្នុងខេត្តសៀមរាប មិនមានជួបការខ្វះខាតឡើយ។ ដោយឡែក ការផ្គត់ផ្គង់បន្លែក្នុងខេត្ត អាចជួបការខ្វះខាតដោយសារពុំមានទឹកគ្រប់គ្រាន់។
តាមការចុះត្រួតពិនិត្យនៅតាមមូលដ្ឋាន ក្រុងសៀមរាប ស្រុកប្រាសាទបាគង ស្រុកជីក្រែង និងស្រុកសូទ្រនិគម លោក ទា គឹមសុទ្ធ បង្ហាញថា ការចិញ្ចឹមសត្វពាហនៈ និងត្រី ទទួលបានទិន្នផលល្អប្រសើរ ដោយមិនមានការព្រួយបារម្ភ ចំពោះផ្គត់ផ្គង់នៅទូទាំងខេត្តឡើយ។ ចំពោះទិន្នផលបន្លែ អាចមានការធ្លាក់ចុះ ដោយសារមិនមានទឹកគ្រប់គ្រាន់។
លោកប្រធានមន្ទីរកសិកម្ម បញ្ជាក់ថា ក្នុងមួយថ្ងៃ ប្រជាពលរដ្ឋទូទាំងខេត្ត ត្រូវការបន្លែ ជាមធ្យមប្រមាណ ៨០ទៅ ១០០តោន។ តាមការប៉ាន់ស្មាន បរិមាណផលបន្លែគ្រប់មុខ ទទួលបានពីក្រុងស្រុកទាំង១២ របស់ខេត្តសៀមរាប រយៈពេល៣ខែខាងមុខ គឺចាប់ពីខែមេសា ដល់ខែ មិថុនា ឆ្នាំ២០២០នេះ អាចនឹងទទួលបានទិន្នផល សរុប៧,៣២៦តោនប៉ុណ្ណោះ។
ព័ត៌មានជាតិ ថ្មីៗ
តាមការឲ្យដឹងពីមន្ត្រីជំនាញកសិកម្ម លើកឡើងថា ប៉ុន្មានឆ្នាំចុងក្រោយនេះ ប្រទេសកម្ពុជា បាននិងកំពុងជួបប្រទះការឡើងកំដៅ និងរដូវប្រាំងមានរយៈយូរជាងរដូវវស្សា។ ជាមួយនេះ រាជរដ្ឋាភិបាលកម្ពុជា ក៏បានណែនាំដល់ប្រជាពលរដ្ឋ ត្រូវដាំដុះដំណាំស្រូវ មិនឲ្យលើសពី១ដង និងងាកមកដាំដំណាំរួមផ្សំជំនួសវិញ។ ក្នុងនោះ ប្រជាកសិករ ក៏ត្រូវប្រើប្រាស់ទឹក ដោយការសន្សំសំចៃខ្ពស់ និងបម្រុងទឹកទុកក្នុងពាង អាងរក្សាទឹកនៅក្បែរផ្ទះ ចៀសវាងរក្សាទឹកនៅតាមស្រះ ប្រឡាយ ជាដើម។
អត្ថបទ និងរូបភាព៖ យូ វង្ស
សម្រួលអត្ថបទ៖ សេង ផល្លី
