គិតត្រឹមថ្ងៃទី២៥ ខែមីនា ឆ្នាំ២០២០នេះ មានរយៈពេល៦ថ្ងៃហើយ ដែលអាជ្ញាធរខេត្តសៀមរាប បានបន្តអនុវត្តន៍ ការចុះបាញ់ថ្នាំសម្លាប់មេរោគតាមទីប្រជុំជន កន្លែងផ្ដល់សេវាសាធារណសំខាន់ នៅតាមបណ្ដាក្រុងស្រុកទាំង១២ ដើម្បីចូលរួមបង្ការ ទប់ស្កាត់ការឆ្លងរីករាលដាលជំងឺកូវីដ១៩។
តាមការឲ្យដឹងពីមន្ត្រីសាលាខេត្តសៀមរាប បញ្ជាក់ថា យុទ្ធនាការបាញ់ថ្នាំសម្លាប់មេរោគតាមទីប្រជុំជន និងកន្លែងផ្ដល់សេវាសាធារណសំខាន់ទូទាំងខេត្តនេះ បានចាប់ផ្ដើមពីបន្ទាប់ពីកិច្ចប្រជុំ ដឹកនាំដោយលោក ពិន ប្រាកដ អភិបាលរងខេត្ត និងជាអនុប្រធានគណៈកម្មការប្រយុទ្ធប្រឆាំងនឹងជំងឺកូវីដ១៩ ខេត្តសៀមរាប ថ្ងៃទី២០ ខែមីនា ឆ្នាំ២០២០ ដោយបានណែនាំទៅដល់មន្ទីរអង្គភាព ត្រូវធ្វើការបាញ់ថ្នាំសម្លាប់មេរោគនៅតាមអង្គភាពរបស់ខ្លួន ដោយឡែករដ្ឋបាលក្រុងស្រុកទាំង១២ ត្រូវធ្វើការចុះបាញ់ថ្នាំសម្លាប់មេរោគ នៅតាមទីផ្សារ ទីប្រជុំជន ទីកន្លែងផ្ដល់សេវាសាធារណសំខាន់ៗ នៅក្នុងមូលដ្ឋានរបស់ខ្លួន ដោយមានការជួយសម្រួលបច្ចេកទេសលាយទឹកថ្នាំសម្លាប់មេរោគពីមន្ទីរសុខាភិបាលខេត្ត។
ជាមួយនោះ អាជ្ញាធរខេត្ត ក៏បានអំពាវនាវដល់ បណ្ដាអ្នកគ្រប់គ្រង់ផ្សារ គ្រឺះស្ថានឯកជននានា សូមចូលរួម បាញ់ថ្នាំសម្លាប់មេរោគនៅតាមទីតាំងសំខាន់ៗរបស់ខ្លួន ដើម្បីចូលរួមបង្ការ ទប់ស្កាត់ការឆ្លងរីករាលដាលជំងឺកូវីដ១៩។
គួរជម្រាបថា ក្រៅពីយុទ្ធនាការបាញ់ថ្នាំសម្លាប់មេរោគនេះ រដ្ឋបាលខេត្តសៀមរាប ក៏បានធ្វើការស្រង់ស្ថិតិប្រជាពលរដ្ឋមកពីក្រៅប្រទេស ចូលមកក្នុងខេត្តសៀមរាប ការបិទខិតបណ្ណ និងសារអប់រំជាសំឡេង អំពីវិធីការពារ និងទប់ស្កាត់ការឆ្លងនៃជំងឺកូវីដ១៩ នៅតាមក្រុងស្រុកទាំង១២ របស់ខេត្ត ព្រមទាំងបានណែនាំដល់ប្រជាពលរដ្ឋ ទៅពិនិត្យសុខភាពក្នុងករណីសង្ស័យថា មានឆ្លងជំងឺកូវីដ១៩ នៅតាមមន្ទីរពេទ្យបង្អែក មណ្ឌលសុខភាព ប៉ុស្តិសុខភាពផងដែរ។
អត្ថបទ ៖ សេង ផល្លី
រូបភាព៖ រដ្ឋបាលខេត្តសៀមរាប
