យោងតាមការណែនាំរបស់ក្រសួងសុខាភិបាល និងបទបញ្ជារបស់ប្រមុខរាជរដ្ឋាភិបាល ជុំវិញវិធានការបង្ការទប់ស្កាត់ ជំងឺកូវីដ១៩ លោកឧត្ដមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទិ៤ បញ្ជាក់ កាលពីថ្ងៃទី២៧ ខែមីនា ឆ្នាំ២០២០ ថា កងកម្លាំងនៃយោធភូមិភាគទី៤ទាំងអស់មានសុខភាពល្អ និងពុំមានករណីសង្ស័យឆ្លងជំងឺខូវីដ១៩ឡើយ។
លោកឧត្ដមសេនីយ៍ឯក ពៅ ហេង លើកឡើងថា នាយទាហាន ពលទាហាននៅទូទាំងយោធភូមិភាគ រួមមាន ខេត្តសៀមរាប ព្រះវិហារ ឧត្ដរមានជ័យ និងខេត្ដកំពង់ធំ បាននិងកំពុងអនុវត្តន៍វិធានការយ៉ាងម៉ត់ចត់ ដើម្បីប្រយុទ្ធប្រឆាំង និងការរីករាលដាលនៃជំងឺកូវីដ១៩ ដោយគ្រប់អង្គភាពដែលចំណុះឲ្យ យោធភូមិភាគទី៤ ត្រូវទិញម៉ាស៊ីនវាស់កម្ដៅសម្រាប់កងកម្លាំងយោធា មុនចូលបំពេញការងារនៅតាមអង្គភាពនីមួយៗ នៅតាមអង្គភាព ត្រូវមាន សាប៊ូ ទឹកអាកុល សម្រាប់លាងដៃក្នុងពេលចូលបំពេញការងារ និងពេលចេញទៅវិញ។ ទន្ទឹមនោះ អង្គភាពចំណុះទាំងអស់ ត្រូវរំសាយការជួបជុំដែលមានមនុស្សច្រើន ទៅជារួបភាពតូចៗ ដូចជាការគោរពទង់ជាតិជាដើម។
ដោយឡែក លោកឧត្ដមសេនីយ៍ បញ្ជាក់ថា ការជួបជុំរបស់កងកម្លាំងប្រដាប់អាវុធ មានតែនៅកន្លែងសាលាហ្វឹកហ្វឺនមួយតែប៉ុណ្ណោះ ព្រោះជាកងកម្លាំង ដែលត្រូវធ្វើការហ្វឹកហាត់ដោយមិនអាចអត់បាន។
ព័ត៌មានជាតិ ថ្មីៗ
លើសពីនោះ លោកឧត្ដមសេនីយ៍ ក៏បានជំរុញដល់មន្ដ្រីយោធាផ្នែកសុខាភិបាល ត្រូវបន្តចុះផ្សព្វផ្សាយ ពីវិធានការទប់ស្កាត់ពីជំងឺឆ្លងកូវីដ១៩ ដល់កងកម្លាំងយោធាគ្រប់អង្គភាពចំណុះ និងប្រជាពលរដ្ឋ នៅជិតអង្គភាពយោធភូមិទី៤ ដើម្បីធ្វើឲ្យពួកគេបានយល់ដឹងកាន់តែច្បាស់ពីវិធីបង្ការខ្លួន ពីជំងឺកូវីដ១៩ និងកុំចៀសវាងការភ័យខ្លាចពេក តាមរយៈ ការផ្សព្វផ្សាយព័ត៌មានមិនពិតនៅលើបណ្ដាញសង្គម។
លោកឧត្ដមសេនីយ៍ឯក ពៅ ហេង ក៏បានបញ្ជាក់ផងដែរថា បញ្ជាការយោធភូមិភាគទី៤ បានត្រៀមលក្ខណៈជាស្រេចនូវអាគារ សម្រាប់ផ្ទុកអ្នកដែលសង្ស័យឆ្លងជំងឺកូវីដ១៩ និងអ្នកផ្ទុកជំងឺកូវីដ១៩ រួមមាននៅមន្ទីរពេទ្យយោធភូមិភាគទី៤ និងនៅគិលានដ្ឋាន នៃអង្គភាពនីមួយៗ របស់យោធភូមិភាគទី៤។
អត្ថបទ និងរូបភាព៖ បូ សាវី
សម្រួលអត្ថបទ៖ សេង ផល្លី
