កាលពីល្ងាចថ្ងៃទី២៩ ខែមីនា ឆ្នាំ២០២០ម្សិលមិញនេះ សមត្ថកិច្ចនគរបាលគ្រឿងញៀនខេត្តសៀមរាប បានបញ្ជូនខ្លួនជនសង្ស័យចំនួន០៥នាក់ទៅតុលាការខេត្ត ដើម្បីអនុវត្តតាមនីតិវិធីបន្តជាប់ពាក់ព័ន្ធករណីរក្សាទុក ជួញដូរ ចាត់ចែង និងប្រើប្រាស់ដោយខុសច្បាប់នូវសារធាតុញៀន ។
សមត្ថកិច្ច បានបន្ថែមថា ជនសង្ស័យទាំង ០៥នាក់ត្រូវបានកម្លាំងនគរបាលការិយាល័យប្រឆាំងគ្រឿងញៀន បានសហការជាមួយកម្លាំងប្រឆាំងគ្រឿងញៀននៃអធិការដ្ឋាននគរបាលស្រុកប្រាសាទបាគង និងកម្លាំងអធិការដ្ឋាននគរបាលក្រុងសៀមរាប បានចុះបង្ក្រាបបានកាលពីថ្ងៃទី២៧ ខែមីនា ឆ្នាំ២០២០ នៅទីតាំងចំនួន០២ គឺទីតាំងទី១ នៅចំនុចលើដងផ្លូវជាតិលេខ៦ ស្ថិតក្នុងភូមិលលៃ ឃុំបាគង ស្រុកប្រាសាទបាគង ខេត្តសៀមរាប ដោយក្នុងនោះឃាត់ខ្លួនបានជនសង្ស័យចំនួន ០២នាក់ រួមនឹងវត្ថុតាងមួយចំនួនរួមមាន៖ ម្សៅមេតំហ្វេតាមីនចំនួន ០៣កញ្ចប់ស្មើនឹងទម្ងន់ ០,៨ក្រាម ថ្លឹងទាំងសំបក ទូរស័ព្ទដៃចំនួន០១គ្រឿង ឧបករណ៍ប្រើប្រាស់ និងសំភារៈវេចខ្ចប់គ្រឿង ញៀនមួយចំនួន ។
ទីតាំងទី២ នៅចំនុចក្នុងព្រៃអង្គរ ស្ថិតក្នុងភូមិគោកតាចាន់ សង្កាត់គោកចក ក្រុង/ខេត្តសៀមរាប ដោយឃាត់ខ្លួនជនសង្ស័យបានចំនួន០៣នាក់ និងដកហូតវត្ថុតាងបានរួមមាន៖ម្សៅមេតំហ្វេតាមីចំនួន ១១កញ្ចប់ទម្ងន់១២,៩ក្រាមទាំងសំបក, ទូរស័ព្ទដៃចំនួន០៣គ្រឿង, ឧបករណ៍ប្រើប្រាស់ និងសំភារៈវេចខ្ចប់គ្រឿងញៀនមួយចំនួន ៕
អត្ថបទ និង រូបភាព៖ ថាច់ ពិសុទ្ធ
កែសម្រួល៖ អ៊ុន ណារាជ្យ
