សហរដ្ឋអាមេរិកបានបង្កើតកំណត់ត្រាថ្មី ដោយក្នុងរយៈពេលត្រឹម ២៤ម៉ោង គិតត្រឹមម៉ោង៨ព្រឹកថ្ងៃទី០២ ខែមេសា ឆ្នាំ២០២០ ប្រទេសមហាអំណាចមួយនេះ មានអ្នកជំងឺស្លាប់ដោយសារជំងឺ COVID-19 រហូតដល់ ១០៤៩នាក់ទៀត ដែលជាអត្រាមួយដ៏ខ្ពស់បំផុត ចាប់តាំងពីមានការផ្ទុះរីករាលដាលជំងឺដ៏កាចសាហាវនេះមក។ នេះបើយោងតាមតួលេខពីគេហទំព័រពិភពលោក www.worldometers.info បានបង្ហាញឲ្យដឹងយ៉ាងដូច្នេះ។
ដោយឡែកសម្រាប់រយៈពេល ២៤ម៉ោងដដែលនេះ សហរដ្ឋអាមេរិកក៏បានកត់ត្រាអ្នកឆ្លងថ្មីៗរហូតដល់ ២៥,២០០ ករណីទៀតនៅទូទាំងប្រទេសផងដែរ។ក្នុងនោះដែរ រដ្ឋញូវយ៉ក គឺជាចំណុចកណ្តាល នៃការរីករាលដាលនៃជំងឺ COVID-19 នៅសហរដ្ឋអាមេរិក ដែលយ៉ាងហោចណាស់មានអ្នកស្លាប់ ដោយសារជំងឺនេះចំនួន ១,៩០០នាក់ត្រូវបានកត់ត្រានៅទីនោះ។
គួរជម្រាបថា បច្ចុប្បន្នសហរដ្ឋអាមេរិកមានករណីឆ្លង COVID-19 សរុបចំនួន ២១៥,២១៥ករណី ក្នុងនោះអ្នកជំងឺស្លាប់សរុប ៥,១១០នាក់។ពលរដ្ឋអាមេរិកជាង ០៨នាក់ក្នុងចំណោម ១០ នាក់ នៅពេលបច្ចុប្បន្នកំពុងស្ថិតនៅក្រោមបទបញ្ជាឲ្យស្ថិតនៅក្នុងផ្ទះ ដើម្បីចូលរួមទប់ស្កាត់នៃការរីករាលដាលជំងឺរាតត្បាតសកលមួយនេះ។
