នាព្រឹកថ្ងៃទី០២ ខែមេសា ឆ្នាំ២០២០នេះ នៅស្នងការដ្ឋាននគរបាលខេត្តសៀមរាប មានរៀបចំពីធីបើកវគ្គផ្សព្វផ្សាយ ស្តីពីការពិន័យអន្តរការណ៍ ចំពោះអំពើល្មើសច្បាប់ចរាចរណ៍ផ្លូវគោក និងបំប៉នសមត្ថភាពមន្រ្តីនគរបាលចរាចរណ៍ផ្លូវគោក យោងតាមការកំណែរទម្រង់អនុក្រឹត្យថ្មី ស្តីពីការពិន័យអន្តរការណ៍ ចំពោះអំពើល្មើសច្បាប់ចរាចរណ៍ផ្លូវគោក។
យោងតាមរបាយការណ៍ របស់អគ្គស្នងការនគរបាលជាតិ ក្នុងឆ្នាំ២០១៩កន្លងទៅ គ្រោះថ្នាក់ចរាចរណ៍ទូទាំងប្រទេសមានចំនួន ៤,១២១ករណី កើនលើសឆ្នាំ២០១៨ ចំនួន ២៦ភាគរយ ក្នុងនោះជនរងគ្រោះដែលត្រូវបាត់បងជីវិតមានចំនួន ១,៩៨១នាក់ កើនឡើង ១២ភាគរយ អ្នករងរបួសមានចំនួន ៦,១៤១នាក់ កើនឡើង ២៩ភាគរយ។
លោកឧត្តមសេនីយ៍ទោ ទិត្យ ណារ៉ុង ស្នងការ នៃស្នងការដ្ឋាននគរបាលខេត្តសៀមរាប លើកឡើងថា ផ្អែកលើតួលេខគ្រោះថ្នាក់ចរាចរណ៍ក្នុងឆ្នាំ២០១៩កន្លងទៅ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានដាក់ឆ្នាំ២០២០ ជាឆ្នាំប្រកាសអាសន្នសម្រាប់មានវិធានការ កាត់បន្ថយគ្រោះថ្នាក់ចរាចរណ៍ទូទាំងប្រទេស។
លោកស្នងការ បញ្ជាក់ថា នៅក្នុងអនុក្រឹត្យថ្មី ស្តីពីការពិន័យអន្តរការណ៍ ចំពោះអំពើល្មើសច្បាប់ចរាចរណ៍ផ្លូវគោកនេះ អ្នកប្រព្រឹត្តិអំពើល្មើសច្បាប់ចរាចរណ៍ផ្លូវគោក នឹងរងការពិន័យចាប់ពី ៦ម៉ឺនរៀល រហូតដល់ ៤លានរៀល តាមប្រភេទនៃករណីល្មើស ក្នុងនោះការរងពិន័យ ដែលបានកំណត់នៅក្នុងអនុក្រឹត្យថ្មី មានទំហំលើសពីការកំណត់នៅក្នុងអនុក្រឹត្យចាស់ ពី២ដង ៣ដង និង ៥ដង។
គួរបញ្ជាក់ដែរថា ផែនការសកម្មភាពជាតិទសវត្សរ៍សុវត្ថិភាពចរាចរណ៍ផ្លូវគោក ឆ្នាំ២០១១-២០២០ គឺត្រូវសម្រេចឲ្យបាន ការកាត់បន្ថយចំនួនអ្នកស្លាប់ដោយគ្រោះថ្នាក់ចរាចរណ៍យ៉ាងតិច៥០ភាគរយ។ ឆ្នាំ២០២០ដែលជាឆ្នាំចុងក្រោយនៃការអនុវត្តផែនការនេះ គឺត្រូវអនុវត្តឲ្យបាន ការកាត់បន្ថយអ្នកស្លាប់ក្នុងគ្រោះថ្នាក់់ចរាចរណ៍ឲ្យចុះមកត្រឹម ១៦០០នាក់ លើស្ថានភាពនៃការកើនឡើងនៃអ្នកស្លាប់ដោយគ្រោះថ្នាក់ចរាចរណ៍ក្នុងឆ្នាំ២០១៩កន្លងទៅ មានចំនួន ជាង៤ពាន់នាក់។
យ៉ាងណាក៏ដោយ គេរំពឹងទុកថា ការរឹតបន្តឹងលើអំពើល្មើសច្បាប់ចរាចរណ៍ផ្លូវគោក ដោយការតម្លើងបា្រក់ពិន័យខ្ពស់ នឹងមានការចូលរួមគោរពច្បាប់ចរាចរណ៍កាន់តែច្រើន ពីមជ្ឈដ្ឋាននៃអ្នកប្រើប្រាស់យានយន្ត កាត់បន្ថយអត្រាគ្រោះថ្នាក់ ស្លាប់ របួស ប្រកបដោយប្រសិទ្ធភាព ស្របតាមពាក្យស្លោកដ៏ខ្ពង់ខ្ពស់ សម្តេចតេជោ ប្រមុខនៃរាជរដ្ឋាភិបាលកម្ពុជា ( ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍) ៕
អត្ថបទ និង រូបភាព៖ ងិន គឹមឡេង
កែសម្រួល៖ សេង ផល្លី
