កាលពីថ្ងៃទី ០១ ខែមេសា ឆ្នាំ២០២០ ក្រុមការងារសាខាកាកបាទក្រហមកម្ពុជា ស្រុកក្រឡាញ់ បានចុះជួបសំណេះសំណាលសួរសុខទុក្ខក្រុមគ្រូពេទ្យនៅតាមមណ្ឌលសុខភាពចំនួន ០៨កន្លែង ស្ថិតក្នុងឃុំចំនួន៨ ក្នុងស្រុកក្រឡាញ់ ខេត្តសៀមរាប។
ក្នុងការចុះជួបសំណេះសំណាលនេះ ក្រុមការងារបានបែងចែកជា២ក្រុម ក្នុងនោះក្រុមទីមួយដឹកនាំដោយ លោក សុខ ណារ៉េត អភិបាលរងស្រុក តំណាងលោកស្រី ម៉ននី រង្សី អភិបាលស្រុក និងជាប្រធានគណៈកម្មាធិការអនុសាខាកាកបាទក្រហមកម្ពុជា បានចុះជួបសួរសុខទុក្ខលោកគ្រូអ្នកគ្រូពេទ្យ នៅ មណ្ឌលសុខភាព ក្រូចគរ ឃុំក្រូចគរ, មណ្ឌលសុខភាព ស្នួល ឃុំស្នួល, មណ្ឌលសុខភាព រោងគោ ឃុំរោងគោ និង មណ្ឌលសុខភាព ស្រណាល ឃុំស្រណាល។ ក្នុងនោះក្រុមទី២ ដឹកនាំដោយលោកស្រី ចាន់ រ៉ុន អភិបាលរងស្រុក តំណាងលោកស្រីអភិបាលស្រុកក្រឡាញ់ ចុះជួបសួរសុខទុក្ខលោកគ្រូអ្នកគ្រូពេទ្យ នៅមណ្ឌលសុខភាព សំបួរ ឃុំសំបួរ , មណ្ឌលសុខភាព សៀង ណាំ អង់រីកូ សំពៅលូន ឃុំក្រឡាញ់ , មណ្ឌលសុខភាព កំពង់ថ្កូវ ឃុំកំពង់ថ្កូវ និង មណ្ឌលសុខភាព តាអាន ឃុំតាអាន។
ក្នុងឱកាសជួបសំណេះសំណាលនេះដែរ ក្រុមការងារសាខាកាកបាទក្រហមកម្ពុជា ស្រុកក្រឡាញ់ បាននាំយកនូវ សាប៊ូលាងដៃ អាល់កុល ផ្ទាំងផ្សព្វផ្សាយទប់ស្កាត់ជំងឺកូវីដ១៩ ជូនដល់មណ្ឌលសុខភាពទាំង ០៨កន្លែងផងដែរ។
តំណាងឲ្យ លោកស្រីប្រធានគណៈកម្មាធិការអនុសាខាកាកបាទក្រហមកម្ពុជា ស្រុកក្រឡាញ់ លោកសុខ ណារ៉េត និងលោកស្រី ចាន់ រ៉ុន ក៏បាននាំយកនូវផ្ដាំផ្ញើសួរសុខទុក្ខពីសំណាក់សម្ដេចកិត្តិយព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្ដម ទៀ សីហា អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប និងបានថ្លែងអំណរគុណដល់លោកគ្រូអ្នក អ្នកគ្រូពេទ្យ នៅតាមមណ្ឌលសុខភាពខាងលើ ដែលតែងតែយកចិត្តទុកដាក់ខ្ពស់ ក្នុងការពិគ្រោះយោបល់ មើលថែ និងព្យាបាលសុខភាព ជូនដល់បងប្អូនប្រជាពលរដ្ឋនៅមូលដ្ឋាន ពិសេសការផ្ដល់សារអប់រំផ្សព្វផ្សាយអំពីជំងឺរលាកសួតប្រភេទថ្មី (Covid-19) ជូនដល់បងប្អូនប្រជាពលករដែលទើបត្រលប់មកពីប្រទេសជិតខាង និងប្រជាពលរដ្ឋទូទៅផងដែរ។
អត្ថបទ និង រូបភាព៖ ស្រុកក្រឡាញ់
កែសម្រួល៖ សេង ផល្លី
