អាកុល៦០០លីត្រ ម៉ាស់៥០ប្រអប់ គ្លីសេរីនចំនួន២៥ដប ទឹកអុកស៊ីសែនណេ៦០ដប ដែលមានតម្លៃជាទឹកប្រាក់ប្រមាណជា ១០លានរៀល ត្រូវបានផ្តល់ជូនមន្ទីរសុខាភិបាលខេត្តសៀមរាប នៅរសៀលថ្ងៃទី០៧ ខែមេសា ឆ្នាំ២០២០ ដែលការចូលរួមទាំងនោះ គឺជាការបរិច្ចាគរបស់សមាជិកក្លឹបអាជីវកម្មកម្ពុជា។
លោក ប៉ុន បញ្ញា តំណាងក្លឹបអាជីវកម្មកម្ពុជា បានឲ្យដឹងថា នេះគឺជាការចូលរួមចំណែកជាមួយរាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩ ហើយក៏ជាការមើលឃើញផងដែរថា ក្រោមការដឹកនាំដ៏ឈ្លាសវៃនៃសម្តេចតេជោនាយករដ្ឋមន្រ្តី បាននឹងកំពុងពង្រឹងស្មារតីប្រជាពលរដ្ឋ ពង្រីកសមត្ថភាពមន្រ្តីជំនាញ ឆ្ពោះទៅគោលដៅគ្រប់គ្រងឲ្យបាន ការរីករាលដាលនៃវារុសកូវីត១៩ឲ្យមានប្រសិទ្ធភាព ជាមួយនឹងការដាក់ចេញនូវវិធានការចាំបាច់នានាជាបន្តបន្ទាប់។ សំភារៈទាំងនេះ អាចជាមោទនភាពនៅក្នុងចំណែកមួយដ៏តូច ដើម្បីគោលដៅខាងលើនេះ។
លោកបន្តឲ្យដឹងថា ដូចគ្នានឹងការផ្តល់ជូនមន្ទីរសុខាភិបាលខេត្តសៀមរាប សម្ភារៈប្រើប្រាស់ចាំបាច់ទាំងនេះ ក្លិបអាជីវកម្មកម្ពុជា នឹងមានផ្តល់ជូនរដ្ឋបាលខេត្តបន្ទាយមានជ័យផងដែរ ហើយលើសពីនេះ ក៏មានគម្រោងរៀបចំស្បៀងអាហារ យកទៅចែកជូនដល់ពលករចំណាកស្រុក ដែលបានវិលត្រឡប់មកពីប្រទេសថៃ ក្នុងករណីដែលកំពុងស្ថិតក្នុងអំឡុងពេលនៃការដាក់ឲ្យនៅដាច់ដោយឡែកចំនួន១៤ថ្ងៃ។
ព័ត៌មានជាតិ ថ្មីៗ
ក្រៅតែពីការសម្តែងនូវការកោតសរសើរចំពោះសកម្មភាពចូលរួមគាំទ្រ របស់សមាជិកក្លឹបអាជីវកម្មកម្ពុជា ចំពោះការខិតខំប្រឹងប្រែងរបស់រាជរដ្ឋាភិបាល ក្នុងការប្រយុទ្ធប្រឆាំងវារុសកូវីត-១៩នោះ លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានបញ្ជាក់នឹងអះអាងថា ៖ រាល់សម្ភារៈទាំងនេះ មន្ទីរនឹងយកទៅបែងចែកជូនដល់មន្ត្រីពេទ្យ ដើម្បីប្រើប្រាស់ឆ្លើយតបឲ្យបានសមស្របបំផុត ក្នុងកាលៈទេសៈដែលកម្ពុជា ត្រូវតែគ្រប់គ្រងឲ្យបានការរីករាលដាលនៃជម្ងឺកូវីត-១៩។ អ្នកប្រយុទ្ធជួរមុខក្នុងសមរភូមិកូវីត-១៩ បានវាយតម្លៃខ្ពស់ចំពោះការគាំទ្រនេះ ថាពិតជាការផ្តល់នូវកម្លាំងទឹកចិត្ត ដ៏ប្រសើរបំផុត។
សូមបញ្ជាក់ថា បើតាមការប្រកាសរបស់ក្រសួងសុខាភិបាលគិតត្រឹមម៉ោង៧ព្រឹកថ្ងៃទី០៧ខែមេសាឆ្នាំ២០២០ កម្ពុជារកឃើញអ្នកឆ្លងកូវិដ១៩សរុបចំនួន១១៥នាក់ ក្នុងនោះមានអ្នកជាសះស្បើយចំនួន៥៨នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន៥៧នាក់ ៕
អត្ថបទ និង រូបភាព ងឹន គឹមឡេង
