កាលពីរសៀលថ្ងៃទី០៨ ខែមេសា ឆ្នាំ២០២០ម្សិលមិញនេះ រដ្ឋបាលស្វយ័តក្វាងស៊ីឈួន តាមរយៈការិយាល័យកុងស៊ុលចិនប្រចាំខេត្តសៀមរាប បានផ្ដល់អំណោយជាម៉ាសចំនួន២០កេះ ស្មើនឹង៤ម៉ឺនម៉ាសជូនរដ្ឋបាលខេត្តសៀមរាប ក្នុងគោលបំណងលើកទឹកចិត្ត និងគាំទ្រដល់រដ្ឋបាលខេត្តសៀមរាប ចំពោះការអនុវត្តវិធានការបង្ការ និង ទប់ស្កាត់ការឆ្លងរាលដាលនៃវីរុសកូវីដ-១៩ ។
ឯកឧត្តម លីវ ជឺជា អគ្គកុងស៊ុលចិនប្រចាំខេត្តសៀមរាប លើកឡើងថា ពិតជាមិនអាចបំភ្លេចបាននោះទេ ក្នុងព្រឹត្តិការណ៍ដំបូងនៃការផ្ទុះឡើង ការរាតត្បាតជម្ងឺកូវីត-១៩នៅប្រទេសចិន ដែលឯកឧត្តម ទៀ សីហា អភិបាលខេត្តសៀមរាប បានផ្តល់ជូនម៉ាសចំនួន ១២ម៉ឺនម៉ាស សម្រាប់ក្រុងខេត្តសម្ព័ន្ធមេត្រីភាពចំនួន៤ គឺក្រុងក្វាងស៊ី យូណាន ណានជីង និងខេត្តជើជាំង ដូច្នេះអាចវាយតំលៃថា កម្ពុជា-ចិន គឺជាបងប្អូនពិតប្រាកដក្នុងចំណងសាមគ្គីភាពដែកថែប ចិន-កម្ពុជា រួមបេះដូងតែមួយ ជួយគ្នាក្នុងគ្រាលំបាក ហើយមានជំនឿចិត្តដ៏មុតមាំថា ក្រោមការខិតខំប្រឹងប្រែងរវាងប្រទេសទាំងពីរ កម្ពុជា-ចិននឹងប្រយទ្ធប្រឆាំងយកឈ្នះកូវីត-១៩ ។
មានប្រសាសន៍ក្នុងឱកាសនោះដែរ ឯកឧត្តម ទៀសីហា អភិបាលខេត្តសៀមរាប រំលឹកថា ខេត្តសៀមរាបមានចំណងសម្ព័ន្ធមេត្រីភាពជាមួយខេត្ត-ក្រុងចំនួន៤នៃប្រទេសចិន កន្លងមកភាគីចិននិងកម្ពុជា បានចាប់ដៃគ្នាក្នុងក្របខ័ណ្ឌនៃកិច្ចសហការប្រតិបត្តិការយ៉ាងល្អប្រសើរលើគ្រប់វិស័យ ដើម្បីការអភិវឌ្ឍ ។
ឯកឧត្តម ទៀ សីហា មានប្រសាសន៍បន្ថែមថា ស្ថិតក្នុងគ្រាដ៏លំបាកនៃវិបត្តិកូវីត-១៩នេះ បានបង្កើនកំរឹតលើអត្ថន័យបន្ថែមទៀត នៃការរួមជីវិតតែមួយ លើចំណងសម្ព័ន្ធមេត្រីភាពនេះ ហើយការគាំទ្ររបស់ភាគីចិន និងការផ្តល់ជំនួយសម្ភារបរិក្ខារ និងអ្នកជំនាញវេជ្ជសាស្រ្តមកកាន់កម្ពុជា គឺជាការយកចិត្តទុកដាក់លើសពីក្របខ័ណ្ឌនៃចំណងមិត្តភាព តែជាការរួមបេះដួងតែមួយជាបងប្អូន ចិន-កម្ពុជា ដូច្នេះការផ្តល់អំណោយទាំងនេះ គឺស្របពេលដែលគណៈកម្មា ធិការប្រយុទ្ធប្រឆាំងជំងឺកូវីត១៩ របស់រដ្ឋបាលខេត្ត បានរៀបចំគម្រោងចុះផ្ទាល់ដល់សហគមន៍ ហើយម៉ាសទាំងអស់នេះនឹងត្រូវបានចែកជូនដល់មន្រ្តីសុខាភិបាល គ្រូពេទ្យតាមមណ្ឌលសុខភាព និងក្រុមការងាររបស់អនុគណៈកម្មការថ្នាក់ស្រុក ដើម្បីបំពេញប្រតិបត្តិការរបស់ខ្លួន ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
