យោងតាមអង្គភាពសារព័ត៌មានហ្វ្រេសញ៊ូ មកដល់ព្រឹកថ្ងៃសៅរ៍ ទី១១ ខែមេសា ឆ្នាំ២០២០ កម្មករ កម្មការិនី នៅតាមរោងចក្រភាគច្រើនបំផុត នៅតែបន្តធ្វើការជាធម្មតាម ពុំមានការវិលត្រឡប់ទៅស្រុកកំណើត ដើម្បីចូលរួមពិធីបុណ្យចូលឆ្នាំប្រពៃណីជាតិខ្មែរឡើយ។ ក្រុមកម្មករ កម្មការិនីនៅតាមរោងចក្រ សហគ្រាសមួយចំនួន ក្នុងរាជធានីភ្នំពេញ ក៏បានថតវីដេអូបង្ហាញ នូវសកម្មភាពរបស់ពួកគេពេលកំពុងធ្វើការផងដែរ
ឯកឧត្តម ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បង្ហាញថា មកដល់ពេលនេះ ក្នុងចំណោមរោងចក្រដែលនៅដំណើរការនោះ គឺកម្មករ កម្មការិនី ប្រមាណជា ៩៥ភាគរយនៅតែបន្តធ្វើការជាធម្មតា។ ដោយឡែក៥ភាគរយទៀត គឺពួកគេបានសុំដោយមានការអនុញ្ញាតត្រឹមត្រូវពីភាគីរោងចក្រ បន្ទាប់ពីពួកគេមានមូលហេតុច្បាស់លាស់។
ឯកឧត្តមរដ្ឋលេខាធិការ ក៏បន្តអំពាវនាវដល់កម្មករ កម្មការិនី នៅតាមរោងចក្រនានា បន្តធ្វើការងារ ដើម្បីចូលរួមទប់ស្កាត់ការរីករាលជំងឺកូវីដ១៩នៅក្នុងប្រទេសកម្ពុជា។
ក្រសួងការងារកាលពីថ្ងៃទី០៩ ខែមេសា កន្លងទៅនេះ បានជូនដំណឹងថា កម្មករនិយោជិត ដែលឈប់សម្រាកក្នុងកំលុងពេលបុណ្យចូលឆ្នាំប្រពៃណីជាតិខ្មែរដោយឯកឯង គ្មានការអនុញ្ញាត ឬព្រមព្រៀងពីភាគីថៅកែនោះ ពួកគេ នឹងត្រូវដាក់ក្នុងវិធានការចត្តាឡីស័កសុខាភិបាល មានន័យថាដាក់ឱ្យនៅដោយឡែក រយៈពេល ១៤ថ្ងៃ មុនចូលបំពេញការងារវិញ នឹងមិនទទួលបានប្រាក់ឈ្នួល ក្នុងរយៈពេលធ្វើចត្តាឡីស័កនេះឡើយ។ ដោយឡែកកម្មករ និយោជិត ដែលការអនុញ្ញាតត្រឹមត្រូវពីភាគីថៅកែ ឱ្យឈប់សម្រាកក្នុងរយៈពេលនេះ នោះនឹងត្រូវដាក់ក្នុងវិធានចត្តាឡីស័កសុខាភិបាល រយៈពេល ១៤ថ្ងៃដូចគ្នាឲ មុនចូលបំពេញការងារវិញ តែនឹងទទួលបានប្រាក់ឈ្នួលពីថៅកែ ក្នុងរយៈពេលធ្វើចត្តាឡីស័កនេះ។
គួររំលឹកថា រាជរដ្ឋាភិបាលកម្ពុជា បានសម្រេចលើកពេលនៃការឈប់សម្រាកបុណ្យចូលឆ្នាំចាប់ពីថ្ងៃទី១៣ រហូតដល់ថ្ងៃទី១៦ ខែមេសា ពោលមន្ត្រីរាជការ កងកម្លាំងប្រដាប់អាវុធ កម្មករ និយោជិត និងបុគ្គលិកក្រុមហ៊ុននានា នៅតែធ្វើការជាធម្មតាក្នុងកំលុងពេលបុណ្យចូលឆ្នាំនៅសប្តាហ៍ក្រោយនេះ។ ការសម្រេចលើកពេលឈប់សម្រាកបុណ្យចូលឆ្នាំនេះ ដើម្បីទប់ស្កាត់ការជួបជុំ ដែលជាដើមចមដ៏ធំបំផុតនាំឱ្យផ្ទុះឡើងនូវជំងឺកូវីដ១៩នៅក្នុងប្រទេសកម្ពុជា។
