នៅថ្ងៃទី១១ ខែមេសា ឆ្នាំ២០២០ ក្រុមការងារខេត្តសៀមរាប ដឹកនាំដោយលោក នាក់ ណេរ៉ុន អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្ត បានបន្តចុះពិនិត្យមើលស្ថានភាព និង ទទួលប្រជាពលរដ្ឋខ្មែរដែលបានវិលត្រឡប់មកពីប្រទេសថៃ នៅតាមច្រកមួយចំនួននៃខេត្តឧត្តរមានជ័យ , ខេត្តបន្ទាយមានជ័យ និង ខេត្តបាត់ដំបង ហើយក្រុមការងារបានទទួលបងប្អូនប្រជាពលរដ្ឋខ្មែរដែលបានវិលត្រឡប់មកពីប្រទេសថៃ ដែលមានលំនៅដ្ឋានក្នុងខេត្តសៀមរាប ចំនួន៥៤នាក់ ក្នុងនោះ ៖ តាមច្រកប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានចំនួន២៥នាក់ ក្នុងនោះស្រីចំនួន១២នាក់ , ច្រកអូរស្មាច់ ខេត្តឧត្តរមានជ័យ ចំនួន១២នាក់ ក្នុងនោះស្រីចំនួន៥នាក់ និង តាមច្រកដូង ខេត្តបាត់ដំបង ចំនួន១៧នាក់ ហើយក្រុមការងារក៏បានដឹកជញ្ជូនពួកគាត់ មកខេត្តសៀមរាបវិញ នៅថ្ងៃនេះផងដែរ ។
គួររំលឹកថា កាលពីម៉ោង ១២ អាធ្រាត្រឈានចូលថ្ងៃទី១១ ខែមេសា ឆ្នាំ២០២០នេះ អាជ្ញាធរខេត្តសៀមរាប បានទៅដឹកជញ្ជូនប្រជាពលរដ្ឋទើបត្រឡប់មកពីប្រទេសថៃ ចូលមកខេត្តសៀមរាប នៅតាមច្រកព្រំដែនកម្ពុជា-ថៃ សរុបចំនួន ១២៣នាក់ ក្នុងនោះ ចំនួន ៩៣នាក់ ត្រូវបានដាក់ឲ្យស្នាក់នៅដាច់ដោយឡែក រយៈពេល ១៤ថ្ងៃ នៅសាលាគរុកោសល្យ និងវិក្រឹត្យការខេត្តសៀមរាប និង ចំនួន ៣០ នាក់ទៀត ត្រូវបានអាជ្ញាធរស្រុកចំនួន២ គឺស្រុកពួក និងស្រុកក្រឡាញ់ បាននាំយកទៅមូលដ្ឋានវិញ និងដាក់ឲ្យនៅដោយឡែករយ:ពេល១៤ថ្ងផងដែរ ៕
អត្ថបទនិងរូបភាព៖មន្ទីរព័ត៌មានខេត្តសៀមរាប
ព័ត៌មានជាតិ ថ្មីៗ
