នាព្រឹកថ្ងៃទី១៥ ខែមេសា ឆ្នាំ២០២០នេះ លោក ពៅ ពិសិដ្ឋ អភិបាល រងខេត្តសៀមរាប តំណាងឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប អមដំណើរដោយលោក លោកស្រី ជា ថ្នាក់ដឹកនាំមន្ទីរ អង្គភាពនានាក្នុងខេត្ត ក្រុមយុវជននៃសហភាពសហព័ន្ធយុវជនកម្ពុជាខេត្តសៀមរាប ក្រុមយុវជនស្ម័គ្រចិត្តគាំទ្ររាជរដ្ឋាភិបាល អាជ្ញាធរស្រុក និង ឃុំស្រែណូយ ចុះត្រួតពិនិត្យកម្លាំងចម្រុះដែលកំពុងនៅប្រចាំការលើគោលដៅព្រំប្រទល់ខេត្តសៀមរាបនិងខេត្តឧត្ដរមានជ័យ ក្នុងភូមិសាស្រ្តស្រុកវ៉ារិន និង ជួបសំណេះ សំណាលជាមួយប្រជាពលរដ្ឋដែលទើបត្រឡប់មកពីប្រទេសថៃ នៅស្រុកវ៉ារិន ដែលកំពុងស្នាក់នៅដាច់ដោយឡែកក្នុងរយៈពេល ១៤ ថ្ងៃ ដើម្បីត្រួតពិនិត្យចំពោះជំងឺកូវីដ១៩ ។
ក្នុងឱកាសជួបសំណេះសំណាលជាមួយប្រជាពលរដ្ឋដែលទើបត្រឡប់មកពីប្រទេសថៃ នៅស្រុកវ៉ារិន ដែលកំពុងស្នាក់នៅដាច់ដោយឡែកក្នុងរយៈពេល ១៤ ថ្ងៃ នៅសាលាវិទ្យាល័យស្រែណូយនេះ លោក ពៅ ពិសិដ្ឋ អភិបាលរងខេត្តសៀមរាប បានសម្ដែងនូវការអរគុណចំពោះបងប្អូនប្រជាពលរដ្ឋដែលទើបត្រឡប់មកពីប្រទេសថៃ ដែលបានស្ម័គ្រចិត្តស្នាក់នៅដាច់ដោយឡែកក្នុងរយៈពេល ១៤ ថ្ងៃ ដើម្បីតាមដាន និងត្រួតពិនិត្យករណីជំងឺកូវីដ១៩ តាមការអំពាវនាវរបស់រាជរដ្ឋាភិបាល ដែលទង្វើនេះជាសក្ខីភាពមួយរបស់បងប្អូន ដែលបញ្ជាក់ថាបានចូលរួមចំណែកមួយយ៉ាងសំខាន់បំផុតជាមួយរាជរដ្ឋាភិបាលកម្ពុជា ក្នុងការទប់ស្កាត់ការឆ្លងរាលដាលនៃជំងឺកូវីដ១៩ ហើយ បញ្ហា នេះមិនមែនជាការឃុំខ្លួននោះទេ ។
លោក ពៅ ពិសិដ្ឋ មានប្រសាសន៍ទៀតថា ដោយសារតែបងប្អូនទើបត្រឡប់មកពីប្រទេសថៃ ដែលនៅប្រទេសថៃ ក៏កើតមានករណីជំងឺកូវីដ-១៩ដែរ ដូច្នេះការស្នាក់នៅដាច់ដោយឡែកក្នុងរយៈពេល ១៤ ថ្ងៃ គឺដើម្បីឲ្យប្រាកដថា បងប្អូនគ្មានវីរុសកូវីដ-១៩នៅក្នុងខ្លួន ហើយបើបងប្អូនគ្មានវីរុសកូវីដ-១៩នៅក្នុងខ្លួនទេនោះ ក្រុមគ្រួសារយើង បងប្អូនប្រជាពលរដ្ឋយើងនៅក្នុងភូមិក៏គ្មានវីរុសកូវីដ-១៩ដែរ ហើយសូមឲ្យជឿជាក់លើរាជរដ្ឋាភិបាល និងក្រសួងសុខាភិបាលរបស់យើង ខណៈរាជរដ្ឋាភិបាលកម្ពុជា បានចេញបទបញ្ជាមួយ ស្ដីអំពីវិធានការបង្ការទប់ស្កាត់ជំងឺកូវីដ១៩ នៅតាមបណ្ដាខេត្តនាពេលថ្មីៗកន្លងមក ដូចជាការផ្អាកការប្រាព្ធពិធីបុណ្យចូលឆ្នាំថ្មីប្រពៃណីជាតិខ្មែរ ដើម្បីបញ្ចៀសការជួបជុំ និង ការរឹតបណ្ដឹងការធ្វើដំណើរពីខេត្តមួយទៅខេត្តមួយក្នុងប្រទេស ដែលអាចបង្កឲ្យមានអត្រាអ្នកឆ្លងជំងឺកូវីដ១៩ នៅក្នុងសហគមន៍ ។
ព័ត៌មានជាតិ ថ្មីៗ
បន្ទាប់មក លោក ពៅ ពិសិដ្ឋ និង ប្រតិភូអមដំណើរ បានចុះត្រួតពិនិត្យកម្លាំងចម្រុះប្រចាំការគោលដៅព្រំប្រទល់ខេត្តសៀមរាបនិងខេត្តឧត្ដរមានជ័យ ដោយលោកបានសម្ដែងនូវការកោតសរសើរចំពោះកងកម្លាំងចម្រុះដែលកំពុងប្រចាំការនៅគោលដៅនេះ ដែលបានយកអស់កម្លាំងកាយចិត្តបំពេញភារកិច្ច តាមតួនាទីរបស់ខ្លួនដោយស្មារតីទទួលខុសត្រូវខ្ពស់ ជាពិសេសការអនុវត្តនូវបទបញ្ជា លេខ០២ របស់រាជរដ្ឋាភិបាលកម្ពុជា បានយ៉ាងខ្ជាប់ខ្ជួន ប្រកប ដោយប្រសិទ្ធភាព សំដៅរួមចំណែកក្នុងការទប់ស្កាត់ការឆ្លងរាល ដាលជំងឺកូវីដ១៩ ខណៈដែលបច្ចុប្បន្ននេះ កំពុងកើតមានឡើងនៅលើសកលលោក បណ្ដាលឲ្យស្លាប់មនុស្សរាប់ម៉ឺននាក់ ។
លោក ពៅ ពិសិដ្ឋ បានណែនាំ និង ផ្ដាំផ្ញើដល់កងកម្លាំងចម្រុះដែលកំពុងប្រចាំការគោលដៅព្រំប្រទល់ខេត្តសៀមរាប និង អាជ្ញាធរស្រុកវ៉ារិន ត្រូវបង្កើនស្មារតីការយកចិត្តទុកដាក់បន្តទៀត តាមបទបញ្ជាលេខ០២ របស់រាជរដ្ឋភិបាលកម្ពុជា ឲ្យបានម៉ឺងម៉ាត់បំផុត ហើយដើម្បីជាការលើកទឹកចិត្ត លោក ពៅ ពិសិដ្ឋ បានជូនថវិកាមួយចំនួនដល់កងកម្លាំងចម្រុះប្រចាំការគោលដៅព្រំប្រទល់ខេត្តសៀមរាបនិងខេត្តឧត្ដរមានជ័យ ក្នុងភូមិសាស្រ្តស្រុកវ៉ារិននេះ សម្រាប់ដោះស្រាយជីវភាពប្រចាំថ្ងៃ ៕
អត្ថបទ ៖ លោក លីវ សាន្ត
រូបថត ៖ ធន់ ពូថេ
