នៅព្រឹកថ្ងៃទី២១ ខែមេសា ឆ្នាំ២០២០ ឯកឧត្តម ជា វ៉ាន់ដេត រដ្ឋមន្រ្តី ទើបចូលកាន់ដំណែងថ្មី នៃក្រសួង ប្រៃសណីយ៍ និងទូរគមនាគមន៍ បានអញ្ជើញចូលជួបសំដែងការគួរ ជាមួយ ឯកឧត្តម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន នាទីស្តីការក្រសួង ព័ត៌មាន រួមនិងធ្វើស្វែងយល់អំពីដំណើរការរៀបចំផ្លាស់ប្តូរប្រព័ន្ធផ្សាយពី Analog ទៅ Digital ដើម្បីបញ្ចៀស ផលប៉ះពាល់នៃរលកសញ្ញាវិទ្យុ មកលើសុខភាពប្រជាពលរដ្ឋ ដែលរស់ នៅជិតអង់តែន និង កិច្ចការងារបែងចែក រលកការផ្សាយ វិទ្យុ ទូរទស្សន៍ ជាមួយការ ហ្រ្វេកង់ របស់ប្រៃសណីយ៍ ជាពិសេស បញ្ហាឆ្លង ហ្វេ្រកង់វិទ្យុទាក់ទង របស់ប្រព័ន្ធបញ្ជាយន្តហោះ ឲ្យបានច្បាស់លាស់ និងងាយស្រួលដល់ដំណើរការងារទាំងនេះនាពេលអនាគតបន្ថែមទៀត។
ពាក់ព័ន្ធកិច្ចការងារទាំងអស់នេះ ឯកឧត្តម រដ្ឋមន្រ្តី ខៀវ កាញារីទ្ធ បានបញ្ចាក់ជូនថាដំណើរការ នៃការរៀបចំផ្លាស់ប្តូរប្រព័ន្ធផ្សព្វផ្សាយទូរទស្សន៍ ពី Analog ទៅ Digital គឺបាននឹងកំពុង ដំណើរការទៅមុខ ហើយនៅពេលចប់រួចរាល់កិច្ចការងារ ឌីជីថល ក្រសួង ព័ត៌មាន នឹងប្រគល់ជូននូវ ហ្រ្វេកង់តំបន់៧០០ ជូនទៅក្រសួង ប្រៃសណីយ៍ និងទូរគមនាគមន៍ វិញ ។ ទាក់ទងទៅនឹងយន្តការនៃការប្រើប្រាស់ហ្រ្វេកង់ នៅក្នុងវិស័យសោតទស្សន៍ ក៏ដូចជាហ្រ្វេកង់ផ្សេងៗ ទៀតនោះ ឯកឧត្តម ខៀវ កាញារីទ្ធ បានលើកជាគំនិតផ្តួចផ្តើម ក្នុងការធ្វើយ៉ាងណា រាល់ហ្រ្វេកង់ ទាក់ទងការងារសោតទស្សន៍ ត្រូវផ្តល់មកក្រសួង ព័ត៌មាន ជាអ្នកចាត់ចែងតែម្តង ស្របតាមលិខិតបទដ្ឋាន គតិយុត្តផ្លូវការ។
ចំពោះការឆ្លងរលកការផ្សាយវិទ្យុ ទៅប្រព័ន្ធបញ្ជាយន្តហោះ របស់អាកាសចរណ៍ស៊ីវិល ឯកឧត្តម រដ្ឋមន្រ្តី ក្រសួង ព័ត៌មាន បានបញ្ចាក់ថា កិច្ចការងារនេះ គឺ ក្រុមការងារបច្ចេកទេស បានធ្វើការជាប់ជាប្រចាំ ក្នុងការតាមដាន និងណែនាំ ដល់គ្រប់បណ្តា ស្ថានីយ៍វិទ្យុទាំងអស់ត្រូវពិនិត្យ នូវរាល់គ្រប់ បរិក្ខារសំភារៈម៉ាស៊ីនផ្សាយ ត្រូវតែមាន គុណភាព ខ្ពស់ ដើម្បីបញ្ចៀសការឆ្លងរំខាន បើមិនដូច្នេះទេ ក្រសួងព័ត៌មាន នឹងធ្វើការបិទការផ្សាយ វិទ្យុនោះតែម្តង។
ដោយឡែក ការបារម្ភពីផលប៉ះពាល់សុខភាព របស់ប្រជាពលរដ្ឋ ដែលរស់នៅជិតអង់តែនផ្សាយវិទ្យុ ឯកឧត្តម រដ្ឋមន្រ្តី ខៀវ កាញារីទ្ធ បានគួសបញ្ជាក់ថា អង់តែនសម្រាប់ការផ្សាយវិទ្យុFM មិនធ្វើឲ្យប៉ះពាល់ដល់សុខភាពប្រជាពលរដ្ឋរស់ នៅ ក្បែរឡើយ លើកលែងតែអង់តែន វិទ្យុ AM ប៉ុណ្ណោះ។ ដូច្នេះហើយទើបមានការ រុះរើ អង់តែនវិទ្យុជាតិ AM នៅស្ទឹងមានជ័យ ដោយសម្រេច យកទៅតម្លើងថ្មី នៅតំបន់វាល ក្នុងស្រុក កណ្តាលស្ទឹង ខេត្តកណ្តាលវិញ។
អត្ថបទ និង រូបថត ៖ ក្រសួងព័ត៌មាន
