នៅដើមឆ្នាំ២០២០ ការចិញ្ចឹមមាន់ និងជ្រូក មានការកើនឡើង១៦ភាគរយ បើធៀបទៅនឹង រយៈពេលដូចគ្នា កាលពីឆ្នាំ២០១៩ ចំនួននេះបង្ហាញថា នៅទូទាំងខេត្តសៀមរាប មិនមានបញ្ហាប្រឈម ក្នុងការផ្គត់ផ្គង់សាច់សត្វអំឡុងពេលមានវិបត្តិជំងឺកូវីដ១៩ នៅកម្ពុជាឡើយ នេះបើតាមការឲ្យដឹងពី លោក ទា គឹមសុទ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្តសៀមរាប នៅថ្ងៃទី២១ខែមេសា ឆ្នាំ២០២០នេះ។
ក្នុងឱកាសចុះ ចុះពិនិត្យ និងជំរុញការងារសង្វាក់ផលិតកម្មសត្វ និងការដាំដុះ របស់កសិករតាមសហគមន៍ នៅបណ្តាស្រុកមួយចំនួនក្នុងខេត្តសៀមរាប ដូចជាស្រុកពួក ប្រាសាទបាគង សូទ្រនិគមន៍ បន្ទាយស្រី ស្រុកអង្គរធំ និងក្រុងសៀមរាប លោកប្រធានមន្ទីរ កសិកម្ម រុក្ខាប្រមាញ់ និងនេសាទខេត្ត បញ្ជាក់ថា ការចិញ្ចឹមសត្វនៅតាមសហគមន៍ពុំមានបញ្ហាឡើយ លើកលែងតែការចីញ្ចឹមជ្រូកជាលក្ខណៈគ្រួសារ ប្រជាកសិករនៅមានការស្ទាក់ស្ទើរក្នុងការចិញ្ចឹម ដោយសារបញ្ហាជំងឺឆ្លងកាលពីឆ្នាំមុន ប៉ុន្តែការចីញ្ចឹមជ្រូកលក្ខណៈកសិដ្ឋានពុំមានបញ្ហាឡើយ។
តាមរយៈការយកចិត្តទុកដាក់ខ្ពស់ របស់រាជរដ្ឋាភិបាល លើវិស័យកសិកម្ម លោកប្រធានមន្ទីរ បានអំពាវនាវ ដល់ប្រជាពលរដ្ឋ ទើបត្រឡប់ពីបរទេស សូមងាកមកចូលរួមការងារកសិកម្ម ដូចជាការចិញ្ចឹមសត្វ ការដាំបន្លែផ្សេងៗ នៅតាមមូលដ្ឋាន ដើម្បីរួមចំណែកកាត់បន្ថយនូវភាពខ្វះខាត និងការលំបាកក្នុងគ្រួសារ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
